Read Ngaju NUMERI 16 Bible Online

NUMERI 16 - Ngaju bible

NUMERI 16

¹ Korah anak Yishar bara jalahan Kehat, suku Lewi, mandarhaka malawan Moses. Ie indohop awi telo biti bara suku Ruben, iete Datan tuntang Abiram, ewen te kare anak Eliab, tuntang On anak Pelet, tuntang awi 250 biti pamimpin je kapala basewut je intih awi rayat.

³Ewen haguet haya-hayak manaharep Moses tuntang Aron palus hamauh, “Terai, Moses! Hapus ungkup Israel ingabeken akan TUHAN, tuntang TUHAN aton intu bentok itah samandiai. Tapi mbuhen ikau mite arepm labih gantung bara ungkup TUHAN?”

⁴Mahining jete, Moses sontop sampai petak tuntang balakudoa intu TUHAN.

⁵Palus ie hamauh dengan Korah tuntang oloh je dengae, “Hanjewu jewu TUHAN handak mamparahan akan itah eweh oloh je Ayue, tuntang eweh je ingabeken Akae. Oloh je iintih Awie kareh inyoho manokep Ie.

⁶Hanjewu jewu ikau tuntang oloh je dengam manduan parapen, manyuange hapan barah apui tuntang garo, palus mimbite akan mesbeh. Keleh itah kareh mitee eweh bara itah je jari intih TUHAN. Jadi ih, o keton, oloh Lewi!”

⁷

⁸Limbah te Moses hamauh dengan Korah, “Hining, o, oloh Lewi!

⁹En koan keton hal ije korik amon Hatallan Israel mintih keton bara marak kare oloh Israel mangat katon tau manokep Ie, tuntang bagawi intu Kemah Ayue, hayak bagawi akan ungkup Israel tuntang manyang ewen?

¹⁰Ikau, Korah, tuntang hapus ungkup oloh Lewi jari mandino hormat te bara TUHAN. Tuntang toh keton balaku uka jari imam kea!

¹¹Amon ikau tuntang oloh dengam bakotok dengan Aron, toto ikau malawan TUHAN!”

¹²Palus Moses manyoho mantehau Datan tuntang Abiram, tapi ewen hamauh, “Ikei dia maku dumah!

¹³En hindai belaim mimbit ikei balua bara tanah Misir je basiwoh te mangat mampatei ikei intu padang pasir toh? En ikau musti marentah ikei kea?

¹⁴Toto ikau dia mimbit ikei akan petak je basiwoh, atawa manenga akan ikei kare tana, kare kabon anggor indu pusakan ikei. Dia, ikei dia maku dumah!”

¹⁵Moses balait toto tuntang hamauh dengan TUHAN, “TUHAN, ela manarima parapah ewen. Aku dia puji mamparugi ewen, aloh ije biti; aloh ije kongan kalidai dia puji aku manduae bara ewen.”

¹⁶Palus Moses hamauh dengan Korah, “Dumah andau jewu akan Kemah TUHAN hayak 250 oloh je dengam. Aron kea kareh aton intu hete. Keton musti mimbit parapah keton kabuat-kabuat. Ina garo huange, palus luput akan TUHAN.”

¹⁷

¹⁸Palus genep biti manduan parapahe, manyuange dengan barah apui tuntang garo, palus mendeng intu baun tonggang Kemah TUHAN hayak dengan Moses tuntang Aron.

¹⁹Limbah te Korah mamumpong hapus ungkup. Ewen mendeng hataharep dengan Moses tuntang Aron intu bauntonggang Kemah TUHAN. Salenga hapus ungkup mite kalawa kahain TUHAN.

²⁰Balalu TUHAN hamauh dengan Moses tuntang Aron,

²¹“Undur bara kare oloh te. Aku handak mambinasa ewen jam toh kea.”

²²Tapi Moses tuntang Aron sontop manyembah hayak hamauh, “O Hatalla ikau je manenga pambelom akan kakare taloh belom: Amon baya ije bewei je badosa, en ikau balait dengan hapus ungkup?”

²³TUHAN hamauh dengan Moses,

²⁴“Soho kare oloh mangejau arep bara kemah Korah, Datan tuntang Abiram.”

²⁵Palus Moses impahayak kare pamimpin oloh Israel, haguet manalih Datan tuntang Abiram.

²⁶Moses hamauh dengan kare oloh Israel, “Ngejau arep keton bara kare oloh papa toh. Ela manigong en-en bara ramon ewen. Amon keton dia manumon, keton kareh imbinasa hayak ewen awi kare dosan ewen.”

²⁷Palus kare oloh Israel te mangejau arep bara kare kemah Korah, Datan tuntang Abiram. Datan tuntang Abiram jari balua tuntang metohe mendeng intu bauntonggang kemah kabuat-kabuat, dengan anak sawan ewen.

²⁸Palus Moses hamauh, “Hapan jetoh keton kareh katawan je TUHAN jari manyoho aku mangat malalus taloh samandiai toh. Jete dia kahandak aingku kabuat.

²⁹Amon kare oloh te matei tumon kapatute, dia dengan hukuman en-en bara Hatalla, jete tandae TUHAN dia manyoho aku.

³⁰Tapi amon TUHAN mawi taloh je hindai puji keton mahininge katahin toh, tuntang amon petak te basila manelen ewen hayak dengan kare ramon ewen, sampai ewen tame belo-belom akan eka oloh matei, katawan keton je kare oloh te malawan TUHAN.”

³¹Sana limbah Moses hakotak, petak intu penda pain ewen basila,

³²tuntang manelen ewen dengan keluarga ewen hayak dengan kare oloh je dengan Korah, lepah dengan kakare ramon ewen.

³³Palus ewen tambohos belo-belom akan huang eka kare oloh matei lepah dengan kare ramon ewen. Petak je basila te harantep haluli tuntang ewen lilap inelen petak.

³⁴Uras kare oloh Israel je aton intu hete mandari arepe metoh mahining ewen mangkariak “Dari! Kareh itah inelen petak!”

³⁵Palus TUHAN mampadumah apui je mangehu 250 biti oloh je maluput garo te.

³⁶Palus TUHAN hamauh dengan Moses,

³⁷“Soho Eleasar anak imam Aron manggatang kare parapen bara kare tisan kehu te tuntang manawor kawoe akan eka beken awi parapen te barasih. Kare ramo te jadi parapah akan kare oloh je ihukum matei tagal dosae. Kare ramo te barasih awi jari iluput intu taharep TUHAN. Tagal te musti ininih jadi kare bindang banipis akan tutup luar mesbeh. Taloh te kareh jadi pampingat akan bangsa Israel.”

³⁸

³⁹Palus Imam Eleasar manduan kare parapen te tuntang manyoho oloh maninihe jadi kare bindang banipis hapa mangalukup luar mesbeh.

⁴⁰Jete indu pampingat akan bangsa Israel je beken bara turonan Aron, aloh ije biti mahin dia tau dumah akan mesbeh mangat mamapui garo akan TUHAN. Oloh je malanggar atoran te kareh imbinasa kilau Korah tuntang kare oloh je dengae. Uras taloh te ilalus kilau je irentah TUHAN akan Eleasar mahalau Moses.

⁴¹Andau jewue, hapus ungkup Israel lai-lait dengan Moses tuntang Aron. Ewen hamauh, “Keton jari mampatei ungkup TUHAN.”

⁴²Metoh ewen hapumpong malawan Moses tuntang Aron, ewen tampaliau akan Kemah TUHAN, tuntang mite baunandau manutup kemah te. Balalu mamala kalawan TUHAN dumah.

⁴³Moses tuntang Aron haguet akan baun Kemah TUHAN,

⁴⁴Palus TUHAN hamauh dengan Moses,

⁴⁵“Undur bara kare oloh te. Aku handak mambinasa ewen intu eka te kea!” Ewen due sontop manyembah,

⁴⁶palus Moses hamauh dengan Aron, “Duan parapen ayum, nyuang barah apui bara mesbeh, tuntang ina garo hunjue. Imbit jeleng akan ungkup, tuntang awi upacara ampun dosa akan ewen. Jeleng! Kasangit TUHAN jadi hasep tuntang panyakit jari nampara.”

⁴⁷Aron mawi taloh je insanan Moses. Ie hadari akan bentok ungkup je kanjerae hapumpong tuntang jari nampara buah panyakit. Palus Aron mina garo intu hunjun barah apui, tuntang mawi upacara ampun dosa akan ungkup.

⁴⁸Panyakit te tende, tuntang Aron aton intu bentok oloh je magon belom hayak dia matei.

⁴⁹Je matei metoh te aton 14.700 biti, dia tamput ewen je matei huang kadarhakan Korah.

⁵⁰Limbah panyakit te tende, Aron haluli manalih Moses intu bauntonggang Kemah TUHAN.