Read Ngaju NUMERI 17 Bible Online

NUMERI 17 - Ngaju bible

NUMERI 17

¹TUHAN hamauh dengan Moses,

²“Soho kare oloh Israel manenga akang-Ku due walas sukah; genep suku ije sukah, je musti inyarah akan pamimpin suku. Nyurat aran genep pamimpin te intu sukahe.

³Aran Aron intu sukah suku Lewi. Akan genep pamimpin suku musti aton ije sukah.

⁴Imbit kare sukah te akan Kemah-Ku, tuntang andak intu baun Patin Janji, eka aku bahut hasondau dengan keton.

⁵Sukah oloh je intih-Ku kareh manyalundik. Hapan cara te Aku kareh mampaterai kotok kare oloh je harajur bakotok dengan keton.”

⁶Taloh te inyampai Moses akan oloh Israel. Palus kare pamimpin ewen manyarah akae ije sukah akan genep pamimpin suku. Urase aton duewalas, tuntang sukah Aron aton marak jete.

⁷Palus Moses mandak kare sukah te intu huang Kemah TUHAN intu baun Patin Janji.

⁸ Andau jewue metoh Moses tame akan huang Kemah TUHAN, ie mite je sukah Aron, iete sukah suku Lewi, jari manyalundik. Sukah te mamuso, mangambang tuntang mamua bua kanari je batue!

⁹Moses manduan uras sukah te palus manjuloke akan oloh Israel. Ewen mite taloh je manjadi, palus genep pamimpin manduan sokahe haluli.

¹⁰Limbah te TUHAN hamauh dengan Moses, “Andak sukah Aron haluli intu baun Patin Janji. Sukah te musti iingkes kilau pampingat akan oloh Israel je rajin malawan balalu malihi Hatalla te, iete ewen kareh matei amon ewen dia terai bakotok.”

¹¹Moses malalus taloh je irentah TUHAN.

¹²Palus oloh Israel hamauh dengan Moses, “Amon kalote, calaka ikei! Ikei kareh binasa!

¹³Amon oloh je manokep Kemah TUHAN musti matei, maka jaton tinai kaharap akan ikei!”