Read Ngaju NUMERI 18 Bible Online

NUMERI 18 - Ngaju bible

NUMERI 18

¹TUHAN hamauh dengan Aron, “Ikau, kare anakm, tuntang kare oloh Lewi musti mananggong kajarian kare kasalan je iawi intu huang Kemah-Ku. Tapi baya ikau tuntang kare anakm bewei je musti mananggong kasalan huang gawin kare imam.

²Tundah paharim, suku Lewi, musti iimbitm jadi pelayan amon manguan gawin ewen tuntang gawin anakm.

³Suku Lewi musti malalus kapatut ewen dengan keton tuntang mawi gawin ewen intu Kemah-Ku. Tapi ewen dia tau manokep mesbeh atawa maningong kare ramo je barasih intu Kamar Ije Barasih. Amon ewen malanggar atoran te, ewen tuntang keton kareh matei.

⁴Ewen musti bagawi mandengan ikau tuntang mawi kare gawi je hatontong dengan kakare gawi huang Kemah-Ku. Tapi oloh je dia inenga hak akan jete, ingahana bagawi dengam.

⁵Baya ikau, Aron, tuntang kare anakm je musti malalus gawi intu Kamar Ije Barasih tuntang mesbeh. Jete mangat Aku dia balait tinai dengan bangsa Israel.

⁶Toto, Aku jari mintih tundah paharim kare oloh Lewi bara marak bangsa Israel kilau panenga akam. Ewen jari ingabeken akang-Ku indu bagawi hong Kemah-Ku.

⁷Tapi baya ikau tuntang kare anakm bewei je tau malalus gawi kilau imam, huang kakare gawi je tege hubungae dengan mesbeh tuntang taloh je aton huang Kamar Ije Barasih Haliai. Jete tanggongan ayum, awi Aku jari manenga akam pangkat kilau imam. Genep biti je jaton dinon hak te kareh ihukum matei amon manokep kare ramo barasih te.”

⁸TUHAN hamauh dengan Aron, “Ingat! Uras parapah je ingabeken je tantai inenga akang-Ku je dia imapui jete akam. Jete bagin oloh je jari inukas palus katatahie. Jete inenga-Ku akam tuntang kare turonam.

⁹Bara kare parapah je pangkarasihe je dia imapui intu hunjun mesbeh, je manjadi bagi akam iete; Parapah taloh kinan, parapah ampun dosa tuntang parapah gantin karugi. Kakare taloh te jete parapah barasih je akan indu bagim tuntang bagin kare anakm.

¹⁰Jete barasih akam, awi te musti ikau kumae intu eka je barasih kea. Baya oloh hatue tau kumae.

¹¹Uras parapah je beken je ingabeken uka iluput oloh Israel baya akang-Ku jete akam kea. Aku manenga te akam tuntang akan kare anakm hatue tuntang bawi. Atoran toh ilalus sampai katatahie. Genep biti bara keluarga je dia papa tau kumae.

¹²Inenga-Ku akam uras taloh je pangkahalape bara hasil getem je solake je iluput oloh Israel akang-Ku genep nyelo, iete undus saitun, danum anggor tuntang gandom.

¹³Uras jete akam. Genep biti bara keluargam je dia papa tau kumae.

¹⁴ Kakare taloh je aton hong tanah Israel je jari ingabeken akang-Ku, jete akam.

¹⁵Kakare anak je solake inakan bara marak olon atawa meto je iluput oloh Israel akang-Ku, jete bagin aim. Tapi ikau musti manewus kare anak bakas ayum, tinai anak meto papa je solake inakan.

¹⁶Kare anak musti inewus metoh ewen umure ije bulan. Regan je inukas akan jete iete lime duit perak, tumon rega je aton intu Kemah-Ku.

¹⁷Tapi sapi, tabiri tuntang kambing je solake inakan dia tau inewus. Meto te musti bagin aing-Ku tuntang musti iluput indu parapah. Nata dahae akan mesbeh tuntang je ingehu enyake kilau parapah. Ewaue manyanang atei-Ku.

¹⁸Isie jete akam, sama kilau usok tuntang sapak gantau bara parapah je iayun akang-Ku.

¹⁹Sampai katatahie, uras parapah je ingabeken tantai akang-Ku bara kare oloh Israel, inenga akam tuntang akan kare anakm hatue tuntang bawi. Atoran toh ilalus katatahie tuntang jadi peteng janji je dia tau imbalang bara Aku tuntang bara ikau tuntang turonam.”

²⁰TUHAN hamauh dengan Aron, “Ikau dia dinon waris en-en. Intu lewu je injanji-Ku te, ije kalambar petak mahin jaton je ayum. Aku, TUHAN bewei, jete bagin waris akam.”

²¹ Koan TUHAN dengan Aron, “Uras parapah sapersapuluh bara oloh Israel inenga-Ku akan oloh Lewi. Jete manjadi bagin waris ewen akan gawin ewen intu Kemah-Ku.

²²Kare oloh Israel je beken dia tau tinai manokep kemah te mangat ewen ela mawi dosa tuntang ihukum matei.

²³Nampara bara katika toh baya oloh Lewi ih je tau halaluan Kemah-Ku tuntang manduan hapus tanggongan akan gawi te. Atoran toh kea akan turonam sampai katatahie. Oloh Lewi jaton mandino waris intu Israel.

²⁴Akan bagin waris ewen Aku jari manenga hapus parapah sapersapuluh je iluput oloh Israel akang-Ku kilau panenga je ingabeken. Jete bukue tahiu oloh Lewi Aku hamauh je ewen kareh dia mandino bagin waris hong Israel.”

²⁵TUHAN manyoho Moses

²⁶manyampai parentah toh akan oloh Lewi: Amon keton manarima bara oloh Israel parapah sapersapuluh je inyarah TUHAN akan keton indu bagin keton, keton musti manenga sapersapuluh akan TUHAN indu parapah ayun keton je ingabeken.

²⁷Parapah je ingabeken te iitong sama dengan parapah gandom taheta tuntang danum anggor taheta.

²⁸Kalote keton kea maluput indu parapah je ingabeken baya akan TUHAN belahe bara parapah sapersapuluh bara oloh Israel. Parapah je ingabeken te musti keton manyarahe akan Imam Aron.

²⁹Tenga bagi je pangkahalape bara taloh je inarima keton.

³⁰Limbah manyarah taloh te, keton musti manduan tisae, kilau ije biti pamalan kea manduan taloh je batisa limbah ie mimbit parapahe.

³¹Je tisae te tau keton kumae intu kueh bewei hayak dengan keluarga keton, kilau upah gawin keton intu Kemah TUHAN.

³²Keton dia sala amon kumae, asal bagi je pangkahalape jari iluput keton akan TUHAN. Ela mamapa parapah barasih ain oloh Israel awi kuman taloh bara parapah te helo bara bagi je pangkahalape te ingabeken akan TUHAN. Amon keton malanggar parentah te, keton kareh matei.