Read Ngaju NUMERI 19 Bible Online

NUMERI 19 - Ngaju bible

NUMERI 19

¹TUHAN marentah Moses tuntang Aron

²uka manenga kare atoran toh akan bangsa Israel: Duan ije kongan sapi bawie je bahandang je jaton cacate tuntang dia puji ihapan akan mamikul ramo.

³Sarah sapi te akan Imam Eleasar. Meto te musti imbit balua bara watas kemah palus inyambalih intu taharep imam.

⁴Palus Imam Eleasar musti manduan isut dahan meto te tuntang mambirike uju tingkat akan hila Kemah TUHAN.

⁵Hapus bitin meto te, dengan upake, isie, dahae tuntang taloh huang kanaie, musti imapui intu taharep imam.

⁶Limbah te imam musti manduan isut bara kayu aras, ije kadereh hisop tuntang ije tali bahandang, palus manjakahe akan huang apui je kanjerae mamapui sapi bahandang te.

⁷Limbah te imam musti mampukan pakaiae tuntang mandoi. Palus ie tau tame akan huang watas kare kemah. Tapi ie magon papa sampai matanandau belep.

⁸Oloh je mamapui sapi te musti kea mampukan pakaiae tuntang mandoi. Ie kea magon papa sampai matanandau belep.

⁹ Balalu ije biti imam je dia papa musti mamumpong kawon sapi te tuntang mingkese intu eka je barasih hila luar watas kare kemah. Kawo te iingkes intu hete mangat ungkup Israel tau mahapae akan manatap danum upacara, mamparasih ungkup indu ampun dosa.

¹⁰Oloh je mamumpong kawon sapi te musti mampukan pakaiae, tapi ie magon papa sampai matanandau belep. Atoran toh ilalus sampai katatahie, aloh akan oloh Israel atawa akan oloh asing je melai manetep intu bentok ewen.

¹¹Oloh je buah hantu itong papa katahin uju andau.

¹²Intu andau je kateloe tuntang je kaujue ie musti mamparasih arepe hapan danum upacara; harue ie barasih. Tapi amon intu andau je kateloe tuntang je kaujue ie dia mamparasih arepe, ie tetep papa.

¹³Oloh je buah hantu tuntang dia mamparasih arepe, ie te papa, awi ie hindai inata hapan danum upacara. Ie mamapa Kemah TUHAN, awi te dia tinai iitong oloh ungkup TUHAN.

¹⁴Amon ije biti oloh hatue matei intu ije kemah, eweh bewei je aton huang kemah te atawa je tame akan huange, papa katahin uju andau.

¹⁵Uras kandi tuntang rinjing je jaton tutupe, papa kea.

¹⁶Genep biti oloh je buah hantun olon je buah patei, atawa je matei kabuat intu tana, papa katahin uju andau. Kalote kea oloh je manigong kubur atawa tulang oloh matei.

¹⁷Akan mamparasih oloh je papa te, musti induan isut kawon sapi bawie je jari imapui akan mampanihau dosa. Kawo te musti inamean akan huang ije kenceng, palus induan danum je inyuang bara tahasak danum.

¹⁸Tahiu taloh je solake, iete amon aton oloh je matei intu huang kemah, oloh je dia papa musti manduan ije kapating hisop, mansulope akan huang danum te, palus mambirik kemah te tuntang uras taloh je aton huange, kea kare oloh je aton hete. Tahiu taloh je kadue, iete amon aton ije biti oloh buah hantu, kubur atawa tulang oloh matei, oloh je dia papa musti mambirik oloh je papa te mahapan cara je sama kilau te kea.

¹⁹Ie musti mambirike intu andau je kateloe tuntang andau je kaujue. Intu andau je kaujue upacara mamparasih oloh papa te hapus. Oloh te musti mampukan pakaiae tuntang mandoi. Sana matanandau belep, ie jari barasih.

²⁰Oloh je buah taloh papa tapi dia malalus upacara uka mamparasih arepe, tetep papa awi hindai inata hapan danum upacara. Ie mamapa Kemah TUHAN tuntang dia tinai iitong oloh ungkup ain Hatalla.

²¹Atoran toh ilalus sampai katatahie. Oloh je mambirik danum upacara te kea musti mampukan pakaiae, tuntang oloh je buah danum te, papa sampai matanandau belep.

²²Ramo je inigong awi oloh je papa te papa kea, tuntang oloh beken je manigonge papa kea sampai matanandau belep.