Read Ngaju NUMERI 20 Bible Online

NUMERI 20 - Ngaju bible

NUMERI 20

¹Intu bulan ije, oloh Israel sampai intu padang pasir Sin tuntang manetep intu Kades. Miryam matei tuntang ingubur intu hete.

² Sinde katika hong eka kare kemah ewen jaton danum. Palus kare oloh te dumah mangarimbong Moses tuntang Aron;

³ewen bakotok, “Labih bahalap amon ikei matei intu taharep TUHAN haya-hayak dengan kare paharin ikei!

⁴Mbuhen ikau mimbit ikei akan padang pasir toh? En mangat ikei matei intu hetoh haya-hayak dengan meto ain ikei?

⁵Kanduem mimbit ikei balua bara Misir akan eka kapehe toh eka je dia tau mimbul taloh en-en? Intu hetoh jaton gandom, jaton batang ara, jaton anggor tuntang dalima. Tinai danum ihop mahin jaton!”

⁶Moses tuntang Aron mangejau arepe bara kare oloh te palus mendeng tokep bauntonggang Kemah TUHAN. Ewen sontop, palus kalawan TUHAN dumah manyangkowong ewen.

⁷TUHAN hamauh dengan Moses,

⁸“Duan sukah je aton intu hila baun Patin Janji, palus ikau tuntang Aron musti mamumpong hapus ungkup. Intu taharep baun ewen samandiai, ikau musti hamauh dengan bukit batu je aton intu hete mangat mampalua danum. Tumon te ikau mampalua danum bara bukit batu te mangat rayat dengan meto ain ewen tau mihop.”

⁹Moses balalu haguet manduan sukah te tumon je irentah TUHAN.

¹⁰Moses tuntang Aron mamumpong hapus ungkup manaharep bukit batu te, Palus Moses hamauh, “Hining o, oloh darhaka! En ikei musti mampalua danum bara bukit batu toh akan keton?”

¹¹Palus Moses manggatang sokahe tuntang mamukule intu bukit batu te handue. Salenga manampusak are danum sampai uras oloh tuntang meto tau mihop.

¹²Tapi TUHAN maningak Moses tuntang Aron, Ie hamauh, “Awi ikau tapas kaparcayam dengangku akan mamparahan kuasang-Ku je barasih hong taharep bangsa Israel, keton dia olih mamimpin ewen tame intu lewu je injanji-Ku akan ewen.”

¹³Jete tahasak danum Meriba.[4] Intu hete bangsa Israel bakotok dengan TUHAN, tuntang intu hete kea TUHAN mamparahan kuasan Aie je barasih akan bangsa Israel te.

¹⁴Limbah te bara Kades, Moses manyoho kare utusan uka manaharep raja Edom. Koan ewen, “Ikei bara kare suku Israel je magon aton horoi pahari dengan Tuangku. Mikeh Tuangku jari katawan kapehe je jari buah ikei.

¹⁵Tato hiang ikei haguet akan Misir tuntang manetep intu hete banyelo-nyelo katahie. Tato hiang ikei tuntang ikei iawi oloh dia bahalap awi bangsa Misir;

¹⁶ikei mangkariak intu TUHAN balaku dohop. Ie mahining kariak ikei tuntang manyoho ije biti malekat. Malekat te mimbit ikei balua bara Tanah Misir. Toh ikei aton intu Kades, lewu je ije kahelat dengan lewun Tuangku.

¹⁷Ikei balaku, keleh Tuangku manyoho ikei mahalau lewu toh. Ikei tuntang meto ain ikei dia handak mambelok bara jalan tuntang dia handak tame akan kare tana atawa akan kare kabon anggor. Ikei dia handak mihop danum bara kare kalin danum ayun Tuangku. Ikei kareh mananjong intu jalan hai bewei sampai ikei balua bara tanah Tuangku.”

¹⁸Tapi oloh Edom tombah, “Ikei dia manyoho keton mahalau tanah ikei. Amon keton bahanyi malawan, ikei kareh manyarang keton!”

¹⁹Oloh Israel hamauh, “Ikei kareh mananjong mahalau jalan hai, tuntang amon ikei atawa meto ain ikei mihop danum keton, ikei kareh mambayar. Ikei baya handak mahalau.”

²⁰Oloh Edom hamauh tinai, “Dia tau!” Palus ewen balua dengan tentara je abas akan manyarang bangsa Israel.

²¹Oloh Israel balalu mules tuntang manggau jalan beken, awi dia inyoho oloh Edom mahalau tanah ewen.

²²Hapus ungkup Israel malihi Kades palus sampai intu bukit Hor,

²³ije kahelat dengan Edom. Intu hete TUHAN hamauh dengan Moses tuntang Aron,

²⁴“Aron dia tau tame lewu je jari injanji-Ku akan bangsa Israel. Ie kareh matei, awi keton due jari malawan parentah-Ku tokep tahasak danum Meriba.

²⁵Imbit Aron tuntang Eleasar anake, mandai bukit Hor.

²⁶Engkak pakaian Aron tuntang kepan intu Eleasar. Aron kareh matei intu eka te.”

²⁷Moses malalus taloh je irentah TUHAN. Moses, Aron tuntang Eleasar mandai Bukit Hor inampayah awi hapus ungkup.

²⁸ Palus Moses mengkak pakaian Aron tuntang mangkepae intu Eleasar. Intu puncak bukit te Aron matei. Limbah te Moses tuntang Eleasar mohon haluli.

²⁹Hapus ungkup mahining je Aron jari matei. Ewen samandiaie manatum ie telo puluh andau katahie.