Read Ngaju NUMERI 21 Bible Online

NUMERI 21 - Ngaju bible

NUMERI 21

¹ Atad iete ije lewu intu hila salatan lewu Kanaan. Katika raja lewu te mahining je oloh Israel dumah mahalau jalan Atarim, ie palus haguet manyarang ewen tuntang mawi pire-pire biti bara ewen induan jadi tawanan.

²Palus oloh Israel hajanji dengan TUHAN kalotoh, “Jaka Ikau manenga kamanang hai akan ikei taharep bangsa te, ewen tuntang kare lewun ewen kareh impalomos ikei sampai lepah.”

³TUHAN manarima palakun oloh Israel mampatei oloh Kanaan te dengan kare lewun ewen, tinai eka te inggare ewen Horma.[5]

⁴ Limbah te oloh Israel malihi Bukit Hor, ewen mahoroi jalan je manintu Telok Akaba, handak mangaliling tanah Edom, tapi intu benteng jalan bangsa te lepah kasabare.

⁵ Ewen bakotok taharep Hatalla dengan Moses. Ewen hamauh, “Mbuhen ikau mimbit ikei balua bara Misir? En handak mampatei ikei intu padang toh? Hong hetoh jaton taloh kinan, tuntang danum kea mahin jaton. Ikei peda dengan panginan je batawah toh!”

⁶TUHAN mampadumah kare handipe tada intu bentok bangsa te. Are oloh Israel matei inotok kare handipe te.

⁷Palus bangsa te dumah manaharep Moses, tuntang hamauh, “Ikei jari badosa awi bakotok dengan TUHAN tuntang dengam. Keleh balakudoa intu TUHAN mangat kare handipe toh ingejau bara ikei.” Palus Moses balakudoa akan bangsa te.

⁸TUHAN balalu manyoho Moses manampa ije handipe bara tambaga tuntang mantajoke intu hunjun ije tihang. Genep biti je inotok handipe, kareh keleh amon nampayah handipe bara tambaga te.

⁹ Palus Moses manampa handipe bara tambaga tuntang mantajoke intu hunjun ije tihang. Genep biti je inotok handipe, tau keleh amon manampayah handipe tambaga te.

¹⁰Oloh Israel haguet tinai, palus mampendeng kemah intu lewu Obot.

¹¹Limbah malihi eka te, ewen mampendeng kemah intu Aye-Abarim hong padang pasir hila timor tanah Moab.

¹²Limbah te ewen mampendeng kemah intu petak rampar Sered.

¹³Bara hete ewen haguet tinai tuntang mampendeng kemah intu dipah Sungei Arnon, intu padang pasir je hamparang manintu tanah oloh Amori.

¹⁴Jete bukue huang ‘Buku Parang ain TUHAN’ tarasurat, “… kampong Waheb, intu tanah Supa tuntang kare petak lampare; Sungei Arnon

¹⁵tuntang petak lampar je hambirang sampai akan desa Ar tuntang manintu helat tanah oloh Moab.”

¹⁶Bara hete ewen haguet akan eka je inyewut Beer, rimae kare kalin danum. Intu hete TUHAN puji hamauh dengan Moses, “Soho ungkup hapumpong; Aku kareh manenga danum akan ewen.”

¹⁷Metoh te bangsa Israel manyanyi auh nyanyi toh, “O, kare kalin danum, kambuar danum aim, ikei kareh manyambute hapan auh nyanyi.

¹⁸Kalin danum je ingali awi kare oloh hai tuntang awi kare pamimpin bangsa ingali hapan sukah parentahe tuntang hapan sukah tanda kuasan ewen.” Bara padang pasir ewen bindah akan Matana;

¹⁹Bara hete akan Nahaliel palus akan Bamot;

²⁰limbah te akan petak rampar hong tanah oloh Moab, intu penda tantan Bukit Pisga je manaharep padang pasir.

²¹Palus bangsa Israel manyoho kare utusan akan Sihon, raja Amori, mangat manyampai peteh toh,

²²“Soho ikei mahalau lewun Tuangku. Ikei tuntang meto ain ikei dia handak mambelok bara jalan tuntang dia handak tame akan kare tana atawa kare kabon anggor atawa mihop danum bara kare kalin danum. Ikei dia handak mambelok bara jalan hai sampai ikei balua bara tanah Tuangku.”

²³Tapi Raja Sihon dia manyoho kare oloh Israel mahalau lewue. Ie mamumpong tantarae tuntang haguet akan Yahas intu padang pasir tuntang manyarang oloh Israel intu hete.

²⁴Tapi intu kalahi te are tentara Amori impatei awi oloh Israel. Palus oloh Israel manduduk tanah te bara Sungei Arnon sampai Sungei Yabok, iete helat tanah oloh Amon, awi helat te aton pertahanan je paham dehen.

²⁵Tumon te oloh Israel marabut uras lewun oloh Amori, tatamput Hesbon tuntang uras lewu korik hakalilinge, palus ewen manetep intu hete.

²⁶Hesbon jete lewu hai ain Raja Sihon. Ie puji parang malawan raja Moab tuntang marabut tanahe sampai Sungei Arnon.

²⁷Jete bukue oloh tukang sansana mawi sansana kalotoh, “Keleh dumah akan Hesbon, akan lewun raja Sihon. Ikei handak mite lewu toh imangun tuntang ingambuah haluli.

²⁸ Puji sinde bara lewu toh tentara ain Sihon miar kilau apui. Je mampahancor lewu Ar intu Moab, tuntang marentah kare bukit mampan Arnon.

²⁹O bangsa Moab, ikau calaka! Je manara Kamos, ikau binasa! Ikau inalua dewa aim jadi oloh babuhau, kare oloh bawi aim jadi indu tawanan Raja Amori.

³⁰Tapi toh keleh turonan ewen binasa, intu hapus jalan bara Hesbon akan Dibon, bara Nasim akan Nopah tokep Medeba.”

³¹Tumon te bangsa oloh Israel manetep intu tanah oloh Amori.

³²Limbah te Moses manyoho oloh haguet manggau jalan je pangkahalape uka manyarang lewu Yaeser. Palus oloh Israel marabut lewu te dengan kare lewu korik tokepe hayak maharak oloh Amori je melai intu hete.

³³Limbah te oloh Israel mambelok tuntang mahalau jalan je manintu Basan. Raja Og bara Basan miar dengan tantarae mangat manyarang oloh Israel intu lewu Edrei.

³⁴TUHAN hamauh dengan Moses, “Ela mikeh dengae. Aku kareh manenga kamanang akam. Ikau kareh mampakalah ie, hapus rayate tuntang lewue. Keleh mawi ie kilau je jari iawi keton dengan Raja Sihon je marentah intu Hesbon.”

³⁵Palus oloh Israel mampakalah tuntang mampatei Raja Og, kare anake, tuntang hapus rayate; jaton ije je balihi. Limbah te ewen manduduk lewu te.