Read Ngaju NUMERI 22 Bible Online

NUMERI 22 - Ngaju bible

NUMERI 22

¹Oloh Israel haguet tinai tuntang mampendeng kemah intu janah Moab, intu tanah hila dipah Sungei Yordan, tokep lewu Yerikho.

²Metoh raja Moab je arae Balak, anak Sipor, mahining kilen ampie bangsa Israel jari mawi oloh Amori tuntang je oloh Israel te oloh je paham karee, ie tuntang hapus rayate paham mikeh.

⁴Palus oloh Moab hamauh dengan kare pamimpin oloh Midian, “Dia tahi tinai kawan asang te malalap taloh samandiai hakaliling itah, kilau sapi malalap oru intu janah.” Raja Balak balalu

⁵ mangirim sarohan uka mantehau Bileam, anak Beor, je melai intu lewu Petor tokep Sungei Eprat intu tanah Amau. Ewen inyoho oloh manyampai akan Bileam peteh toh bara Balak, “Keleh ikau katawan aton ije bangsa dumah bara Misir; kare oloh te tayap akan hete-hete tuntang tatap manyarang tanah ikei.

⁶Ewen labih abas bara ikei. Keleh dumah! Keleh manyapa ewen akangku. Mikeh ikei tau mampakalah ewen tuntang maharak ewen bara lewun ikei. Awi aku percaya oloh je imberkatm kareh mandino berkat, tuntang oloh je inyapam kareh buah sapa.”

⁷Kare pamimpin oloh Moab tuntang oloh Midian te balalu haguet hayak mimbit upah akan Bileam mangat ie maku manyapa oloh Israel. Limbah sampai eka Bileam, ewen manyampai akae peteh Raja Balak.

⁸Koan Bileam dengan ewen, “Keleh baramalem intu hetoh. Jewu aku handak mangabar akan keton taloh je insanan TUHAN akangku.” Kare pamimpin oloh Moab te melai intu eka Bileam.

⁹Palus Hatalla dumah talih Bileam tuntang misek, “Eweh kare oloh te je melai intu ekam, Bileam?”

¹⁰Tombah Bileam, “Ewen sarohan Raja Balak bara Moab uka mangabar

¹¹tahiu ije bangsa je dumah bara Misir jari tayap intu hete-hete. Raja Balak manyoho aku manyapa bangsa te akae, mangat ie tau mamarang tuntang maharak ewen.”

¹²Koan Hatalla dengan Bileam, “Ela haguet dengan kare oloh te, tuntang ela manyapa bangsa te, karana ewen jari imberkat-Ku.”

¹³Andau jewue Bileam hamauh dengan kare sarohan Balak te, “Keleh buli, TUHAN dia manyoho aku haguet dengan keton.”

¹⁴Ewen balalu haluli manalih Balak tuntang mangabar akae je Bileam dia maku dumah hayak ewen.

¹⁵Palus Balak mangirim labih are sarohan je labih gantong pangkate bara je solake.

¹⁶Ewen manyampai akan Bileam peteh toh bara Balak, “Aku balaku toto-toto: Keleh dumah, tuntang ela manolak.

¹⁷Aku kareh manenga upah je are toto, tuntang malalus en bewei je insanam. Keleh dumah tuntang manyapa bangsa te akangku.”

¹⁸Tapi Bileam tombah, “Aloh samandiai perak tuntang amas je aton intu huang Istana Raja imbayar akangku, aku dia tau malawan parentah TUHAN, Hatalla je inyembahku. Aloh huang taloh je korik, aku mahin dia tau malawae.

¹⁹Tapi keleh keton baramalem intu hetoh, tumon je ilalus kare sarohan je helo. Aku handak katawan en magon aton je handak insanan TUHAN akangku.”

²⁰Alem te Hatalla dumah manalih Bileam tuntang hamauh, “Kare oloh te dumah handak balaku ikau haguet dengan ewen. Tatap arepm uka haguet. Tapi keleh ikau malalus baya taloh je irentah akam.”

²¹Andau jewue Bilem mangkepan ekae mondok intu kalidaie, palus omba dengan kare pamimpin oloh Moab te.

²²Tapi metoh Bileam haguet, Hatalla balait. Metoh Bileam manungkang kalidaie, impahayak awi due pembantue, malekat TUHAN mendeng intu benteng jalan handak mangampeng ie.

²³Mite malekat mendeng intu hete dengan padang inyilak, kalidai te mambelok bara jalan, tuntang manintu tana. Bileam mamukul kalidai te tuntang mimbite haluli akan jalan.

²⁴Limbah te malekat TUHAN intu hila jalan je simit, helat due kabon anggor dengan dinding batu hasansila.

²⁵Metoh kalidai te mite malekat TUHAN, ie manyare sampai pain Bileam hapit akan dinding. Bileam mamukul tinai kalidai te.

²⁶Palus malekat TUHAN bindah, tuntang mendeng intu eka je labih simit sampai jaton hindai jalan eka mahalau intu sambil atawa gantaue.

²⁷Mite malekat TUHAN, kalidai te mampeter arepe. Bileam balait tuntang mamukul kalidai te hapan sukah.

²⁸Palus TUHAN mawi kalidai te tau bapander. Koan meto te dengan Bileam, “En je ilalusku dengan Tuan sampai Tuan mamukul aku sampai telo kali?”

²⁹Tombah Bileam, “Ikau mureh aku! Jaka aton padang intu aku, tantu ikau impateiku!”

³⁰Tombah kalidai te, “En aku dia kalidai Tuan je jari tahi Tuan manungkange? En puji aku malawan Tuan?” “Dia,” tombah Bileam.

³¹Palus TUHAN mawi Bileam tau mite malekat TUHAN mendeng intu hete dengan padang inyilak. Bileam balalu sontop akan petak tuntang manyembah.

³²Malekat TUHAN misek, “Mbuhen ikau mamukul kalidaim sampai hantelo? Aku dumah mangat mangampeng ikau, awi manumon tirok-Ku dia bahalap ikau haguet.

³³Metoh kalidaim mite Aku, ie manyare sampai hantelo. Amon dia, tantu ikau jari impatei-Ku, tapi kalidai te inyalamat-Ku.”

³⁴Tombah Bileam, “Aku jari balakudoa. Aku dia katawan je Tuan mendeng intu bentok jalan mangat mangampeng aku. Tapi toh, amon manumon tirok Tuan dia bahalap aku manontong panjalanangku, aku nahuang buli.”

³⁵Tapi malekat TUHAN hamauh, “Omba ih dengan kare oloh te. Tapi ikau baya tau mansanan taloh je inyohoku,” Palus Bileam manontong jalanae dengan kare sarohan Balak te.

³⁶Metoh Balak mahining je Bileam handak dumah, ie haguet manyondau Bileam intu lewu Moab, je intu saran Sungei Arnon, intu watas tanah Moab.

³⁷Koan Balak dengae, “Mbuhen ikau dia dumah metoh aku mantehau ikau je solake? En nyewutm aku dia olih mambayar upahm?”

³⁸Bileam tombah, “Item, aku dumah. Tapi aku jaton bara hak mansanan en-en kacuali je inyoho Hatalla aku mansanae.”

³⁹Bileam palus haguet dengan Balak akan lewu Husot.

⁴⁰Intu hete Balak maluput pire-pire kongan sapi tuntang tabiri. Belah bara isin meto te inengae akan Bileam tuntang kare pamimpin je mampahayak ie.

⁴¹Andau jewue Balak mimbit Bileam mandai bukit Bamot Baal. Bara hete Bileam tau mite belahe kare bitin oloh Israel.