Read Ngaju NUMERI 23 Bible Online

NUMERI 23 - Ngaju bible

NUMERI 23

¹Koan Bileam dengan Balak, “Pendeng intu eka toh uju mesbeh akangku, tuntang inatap intu hetoh uju kongan sapi hatue tuntang ije kongan tabiri hatue.”

²Balak malalus taloh je insanan Bileam akae. Hong genep hunjun mesbeh te ewen maluput ije kongan sapi hatue tuntang ije kongan tabiri hatue.

³Palus Bileam hamauh dengan Balak, “Mendeng tokep parapah je ingehu ain Tuangku. Pandehan te aku haguet mite en TUHAN maku hasondau dengangku atawa dia. Kareh aku manyarita kakare taloh je insanan TUHAN akangku.” Maka Bileam haguet kabuat akan tantan ije bukit,

⁴intu hete Hatalla dumah manalih ie. Koan Bileam dengan Hatalla, “Aku jari mampendeng uju mesbeh tuntang maluput ije kongan sapi hatue tuntang ije kongan tabiri hatue intu hunjun gagenep mesbeh te.”

⁵Palus TUHAN mansanan akan Bileam taloh je musti insanae, tuntang manyoho ie haluli manalih Balak uka manyampai peteh TUHAN dengae.

⁶Bileam haluli tuntang mite Balak magon mendeng tokep parapah je ingehu te, haya-hayak dengan kare pamimpin oloh Moab.

⁷Palus Bileam manyewut auh toh, “Bara Aram, bara kare bukit hila timor te, Balak, raja Moab mantehau aku koae, ‘Keleh dumah, hakotak dengangku. Sapa oloh Israel te!’

⁸En tau aku manyapa, amon Hatalla dia manyapa? En tau aku mahukum, amon Hatalla dia mahukum?

⁹Bara tantan kare bukit te aku mite ewen; bara kare bukit gitangku ewen. Item, ije bangsa je ingabeken dia omba baris kare bangsa je beken.

¹⁰Turonan Yakob kilau kawo dia taraise; bangsa Israel karee dia lue-luen. Keleh jaka aku matei kilau oloh bujur, keleh jaka pampateiku sama kilau pampatei kare oloh te.”

¹¹Palus Balak hamauh dengan Bileam, “En je iawim dengangku? Aku mimbit ikau akan hetoh mangat manyapa kare musohku. Tapi ikau mamberkat ewen haream.”

¹²Koan Bileam, “Aku baya tau mansanan taloh je inyoho TUHAN aku mansanae.”

¹³Palus Balak hamauh dengan Bileam, “Keleh itah haguet haya-hayak akan eka beken; bara hete ikau tau mite belahe bewei bara bangsa Israel. Sapa ewen bara hete.”

¹⁴Balak balalu mimbit Bileam akan janah Sopim, intu tantan Bukit Pisga. Intu hete impendenge kea uju mesbeh tuntang maluput ije kongan sapi hatue tuntang ije kongan tabiri hatue intu hunjun genep mesbeh te.

¹⁵Koan Bileam dengan Balak, “Nunggu ih intu hetoh, tokep parapah je ingehu ain Tuangku, pandehan aku haguet manyondau TUHAN intu hete.”

¹⁶TUHAN manyondau Bileam tuntang mansanan akae taloh je musti insanae, palus manyoho ie haluli manalih Balak mangat manyampai peteh TUHAN te.

¹⁷Bileam balalu haluli tuntang mite Balak magon mendeng tokep parapah je ingehue, haya-hayak dengan kare pamimpin oloh Moab. Balak misek taloh je jari insanan TUHAN,

¹⁸palus Bileam manyewut auh toh, “O, Balak, anak Sipor, kantoh, hining taloh je handak insanangku.

¹⁹Hatalla dia sama kilau oloh je murah manyasal tuntang rajin mananjaro. Amon Hatalla mampendeng janji batantu Ie malaluse! Amon Ie hakotak batantu auh Aie kareh manjadi!

²⁰Aku inyoho mamberkat; tuntang amon Hatalla mamberkat, dia tau aku mambalange.

²¹Intu Yakob jaton gitan kapapa; hong Israel kajake jaton mamala. TUHAN, Hatallan ewen, mampahayak ewen. Ewen basasurak; Ie Raja!

²²Hatalla je mimbit ewen balua bara Misir; kilau banteng baliar ie parang akan ewen.

²³Dia aton kaji lampah je olih manambelan Yakob. jaton kea tenong je olih mawi Israel. Tahiu bangsa te oloh kareh hamauh, ‘Item taloh heran je ilalus Hatalla!’

²⁴Bangsa te hingkat kilau singa bawi, tuntang mendeng tagap kilau singa hatue. Ie dia menter helo bara kuman taloh impae tuntang mihop dahan ongohe”.

²⁵Palus Balak hamauh dengan Bileam, “Terai, amon ikau dia maku manyapa bangsa Israel; tapi ela samasinde mamberkat ewen!”

²⁶Tombah Bileam, “En dia jari aku mansanan akan Tuangku je aku kareh baya tau malalus taloh je irentah TUHAN?”

²⁷Balak hamauh, “Keleh itah akan eka beken. Eweh katawae Hatalla manalua ikau manyapa Israel akangku intu eka te.”

²⁸Ie mimbit Bileam akan tantan Bukit Peor je manaharep padang.

²⁹Koan Bileam dengan Balak, “Pendeng uju mesbeh intu eka toh tuntang nyadia uju kongan sapi hatue tuntang uju kongan tabiri hatue.”

³⁰Balak malalus tumon je insanan Bileam. Ie maluput ije kongan sapi hatue tuntang ije kongan tabiri hatue akan indu parapah hong hunjun gagenep mesbeh te.