Read Ngaju NUMERI 24 Bible Online

NUMERI 24 - Ngaju bible

NUMERI 24

¹Bileam palus katawan je Hatalla bara kahandak mangat ie mamberkat bangsa Israel. Tagal te ie dia haguet manggau kare tanda sama kilau je ilaluse helo bara te. Bileam manampayah akan padang pasir,

²tuntang ie mite bangsa Israel je metohe mampendeng kemah habaris-habaris tumon kare suku ayu-ayue. Palus Roh Hatalla marentah Bileam,

³tuntang ie manyewut auh toh, “Jetoh peteh Bileam anak Beor, auh kotak tutur oloh panujum

⁴je jari mahining auh Hatalla tuntang manampayah taloh je imparahan bara Ie je Paham Kuasae, sambil balongkang, tapi matae marenang.

⁵Lalehan kahalape kare kemahm o, Yakob, tuntang kare ekam melai o, Israel!

⁶Kilau petak je lombah, atawa kabon intu saran sungei; kilau upon jati je imbul TUHAN, atawa upon aras intu saran sungei.

⁷Ewen mandino are toto danum ujan malabien karee sampai mamurai, binyin taloh imbule mandino karean danum. Rajae kareh manang, labih bara raja Agag, tuntang karajaae kareh impahai.

⁸Hatalla je mimbit ewen balua bara Misir, sama kilau banteng baliar je parang akan ewen. Kare bangsa je musoh ewen kareh lepah inelen Awie, kare tulang ewen imparamok Awie, tuntang panah ewen imeleke.

⁹ bangsa te sama kilau singa hatue tuntang singa bawie, je mahukup tuntang menter. Eweh je bahanyi mampisik ie? Keleh oloh je mamberkat ikau imberkat, tuntang oloh je manyapa ikau inyapa.”

¹⁰Hayak balait Balak mangarakop tampare tuntang hamauh dengan Bileam, “Ikau intehauku uka manyapa kare musohku, tapi ewen imberkatm haream sampai hantelo tingkat.

¹¹Toh ikau tau haguet, buli humam! Aku manjanji upah akam, tapi TUHAN dia manyoho ikau manarima upah te.”

¹²Tombah Bileam, “En dia jari insanangku akan kare sarohan Tuangku,

¹³aloh Tuangku manenga akangku uras perak tuntang amas je aton intu Istana Tuangku, aku dia tau malawan parentah TUHAN tuntang malalus taloh en-en sakahandak ateiku? Aku baya tau mansanan taloh je inyoho TUHAN aku mansanae.”

¹⁴Koan Bileam dengan Balak, “Toh aku handak buli akan bangsa aingku. Tapi helo bara aku buli, keleh aku mansanan akan Tuangku, tahiu taloh je kareh ilalus bangsa Israel akan bangsa Tuangku hong rahian andau.”

¹⁵Palus Bileam manyewut auh tujum toh, “Jetoh peteh Bileam anak Beor; auh kotak tutur ije biti oloh panujum

¹⁶je jari mahining auh kare kotak Hatalla, tuntang tau mangasene Je Pangkahai; je manampayah taloh je imparahan bara Je Jaton Tikas Kuasae hayak balongkang tapi matae magon marenang.

¹⁷Aku mite ie, tapi dia hong katika toh; aku manampayah ie, tapi bara kejau. Ije biti raja bara Israel, handak dumah kilau bintang je paha-pahai. Kare Pamimpin oloh Moab akan imparamoke bangsa Set akan impahancore.

¹⁸Tanah Edom kareh irentah musohe, tapi Israel malalus gawi hai.

¹⁹Bara Yakob kareh lembut ije biti oloh kuasa, je mambinasa kare musohe.”

²⁰Limbah te intu paite te Bileam mite kare oloh Amalek. Palus ie manyewut auh tujum toh. “Bara kare bangsa hong kalunen, Amalek te je pangkahain kuasae. Tapi bangsa te kajariae, lilap kea sampai katatahie.”

²¹Intu paite te Bileam mite turonan Keni, palus manyewut auh tujum toh, “Ekam melai puna dehen, sama kilau sarangan intu hunjun bukit batu.

²²Tapi keton, oloh Keni, kareh imbinasa, dia tahi tinai Asur mimbit keton kilau tawanan.”

²³Limbah te Bileam manyewut auh tujum toh kea, “Calaka! eweh je belom, amon Hatalla malalus taloh te?

²⁴Tapi bara Siprus kareh dumah ije pasukan bara tasik, ewen kareh mampakalah Asur tuntang Heber, limbah te pasukan te kea kareh binasa.”

²⁵Palus Bileam tata-tatap handak buli akan ekae melai, tuntang Balak haguet kea.