Read Ngaju NUMERI 25 Bible Online

NUMERI 25 - Ngaju bible

NUMERI 25

¹Metoh bangsa Israel melai intu Sitim, kare oloh hatuen ewen nampara habandong dengan kare bawin oloh Moab je aton intu hete.

²Kare oloh bawi te mimbit ewen akan kare pesta parapah indu mahormat dewa ain ewen. Oloh Israel kea omba kuman parapah te tuntang manyembah dewan oloh Moab.

³Awi oloh Israel manyembah Baal intu Peor, TUHAN balait dengan ewen tuntang hamauh dengan Moses,

⁴“Singkap kare oloh je mamimpin bangsa te, patei ewen intu taharep baun oloh are hapan malalus parentah-Ku, mangat Aku dia balait tinai dengan bangsa te.”

⁵Limbah te Moses hamauh dengan kare hakim Israel, “Gagenep keton musti mampatei kare oloh intu suku ain keton je jari manyembah Baal intu Peor.”

⁶Katika Moses tuntang hapus ungkup metoh manangis intu bauntonggang Kemah TUHAN, ewen mite ije biti oloh Israel mimbit ije biti bawin oloh Midian tame akan huang kemahe.

⁷Metoh Pinehas, anak Eleasar, eson Imam Aron mite taloh te, ie mendeng tuntang malihi pumpong te. Ie manduan ije lunju

⁸palus ie manggoang oloh hatue dengan oloh bawi te akan huang kemah. Kadadue oloh te imunoe hapan lunju te palus calaka je kanjerae sabak intu Israel te tende.

⁹Tapi metoh te oloh je matei jari aton 24.000 biti.

¹⁰Palus TUHAN hamauh dengan Moses,

¹¹“Pinehas, anak Eleasar, eson Imam Aron, dengan karajie jari mampahai hormat akang-Ku intu marak oloh Israel, sampai mawi kalait-Ku terai tuntang Aku balang mambinasa bangsa te.

¹²Awi te sanan akan Pinehas je Aku mampendeng janji dengae.

¹³Ie tuntang turonae imatut-Ku kilau imam palus katatahie, awi ie kalote jari mampahai Aku, Hatalla, tuntang jari malalus gawi mangambuah kare dosan oloh Israel.”

¹⁴Oloh Israel je impatei hayak dengan bawin oloh Midian te arae Simri anak Salu, kapala keluarga bara ije suku Simeon.

¹⁵Oloh bawi te arae Kosbi anak ije biti kapala bara jalahan oloh Midian.

¹⁶TUHAN manenga parentah toh akan Moses,

¹⁷“Keleh malawan oloh Midian tuntang palomos ewen

¹⁸tagal kapapa je jari irencana ewen dengan keton hong Peor tuntang tagal Kosbi anak ije biti kapala bara jalahan oloh hong Midian. Kosbi te oloh bawi je jari impatei katika calaka manjadi ganan kare taloh je manjadi intu Peor.”