Read Ngaju NUMERI 27 Bible Online

NUMERI 27 - Ngaju bible

NUMERI 27

¹Selapehad aton lime anake bawi, iete Mahla, Noa, Hogla, Milka tuntang Tirsa. Bapa Salapehad iete Heper, bapa Heper iete Gilead. Bapa Gilead iete Makhir, bapa Makhir iete Manase, tuntang bapa Manase iete Yosep.

²Lime-lime anak Selapehad te haguet manaharep Moses, tuntang Imam Eleasar dengan kare pamimpin tuntang hapus ungkup je metoh te aton tokep bauntonggang Kemah TUHAN. Koan ewen,

³“Bapa ikei matei intu padang pasir tuntang ie jaton anake hatue. Ie dia omba oloh ain Korah je mandarhaka malawan TUHAN. Bapa ikei te matei awi dosae kabuat.

⁴Mbuhen arae musti nihau bara bangsa Israel baya awi jaton turunae hatue? Keleh manenga akan ikei petak pusaka sama kilau je inenga akan paharin bapa ikei.”

⁵Palus Moses manyampai auh tahiu ewen te akan TUHAN.

⁶TUHAN hamauh dengan Moses,

⁷ “Taloh je insanan kare anak Selapehad te puna buah. Tenga akan ewen petak pusaka kilau je akan tundah paharin bapa ewen. Waris Selapehad te musti inenga akan kare anake je bawi.

⁸Sanan akan bangsa Israel iete amon ije biti oloh hatue matei tuntang dia aton anake hatue, maka petak pusakae musti iwaris akan kare anake je bawi.

⁹Amon ie dia aton anake bawi, petak pusakae te iwaris akan kare paharie hatue.

¹⁰Amon ie dia aton anake hatue, petak te akan paharin bapae je hatue.

¹¹Amon ie jaton bara pahari hatue tuntang jaton kea paharin bapae je hatue, petak te manjadi ain kola je pangkatokepe bara jalahae.” Atoran te musti inumon oloh Israel kilau atoran parentah je irentah TUHAN mahalau Moses.

¹² TUHAN hamauh dengan Moses, “Keleh mandai akan Bukit Abarim, tuntang bara hete tampayah lewu je kareh inenga-Ku akan oloh Israel.

¹³Limbah manampayah jete ikau kareh matei kilau kakam Aron,

¹⁴awi intu padang pasir Sin keton due jari malawan parentah-Ku. Metoh intu Meriba hapus rayat bakotok dengang-Ku. Keton dia maku mamparahan kuasang-Ku intu taharep ewen tagal danum te.” (Taloh te manjadi intu tahasak danum Meriba hong Kades, intu padang pasir Sin).

¹⁵Palus Moses balakudoa, “O TUHAN, Hatalla je manenga pambelom akan oloh samandiai je belom. Aku balaku parahan ije biti je tau mamimpin bangsa toh;

¹⁷ ije biti oloh je tau jadi pangkalima metoh ewen parang. Ela manalua ungkup Ayum toh sama kilau kawan tabiri je jaton bara sakatik.”

¹⁸ Koan TUHAN dengan Moses, “Tehau Yosua, anak Nun. Ie ije biti oloh je tau. Andak lengem akan hunjun takoloke.

¹⁹Soho ie mendeng intu taharep Imam Eleasar tuntang hapus ungkup. Intu taharep baun ewen ikau musti mansanan je Yosua te oloh je mangganti ikau.

²⁰Sarah akae belahe bara kuasam, mangat ungkup Israel manumon auhe.

²¹ Yosua musti balaku tirok bara Imam Eleasar, tuntang Eleasar musti misek kanahuang-Ku mahapan Urim tuntang Tumim.[6] Hapan cara te Eleasar mamimpin Yosua tuntang hapus bangsa Israel huang kakare taloh je inaharep ewen.”

²²Moses malalus taloh je sama kilau irentah TUHAN akae. Ie manyoho Yosua mendeng intu taharep Imam Eleasar tuntang hapus ungkup.

²³ Palus ie mandak lengee intu hunjun takolok Yosua tuntang manansan je Yosua te oloh je mangganti ie, kilau je insanan TUHAN akae.