Read Ngaju NUMERI 28 Bible Online

NUMERI 28 - Ngaju bible

NUMERI 28

¹TUHAN manyoho Moses,

²manyampai akan bangsa Israel iete ewen musti maharago toto-toto mangat intu kare katika je inukas, iluput kare parapah taloh kinan je manyanang atei TUHAN.

³Jetoh parapah je musti iluput akan TUHAN: Akan parapah genep andau, due kongan anak tabiri hatue je umure ije nyelo tuntang je jaton cacate;

⁴je ije kongan akan parapah hanjewu, tuntang je ije kongan tinai akan parapah halemei.

⁵Haya-hayak dengan anak tabiri te musti iluput ije kilo tepong inyampur dengan ije liter undus saitun je pangkahalape.

⁶Jete parapah je sining andau je pangkasolake iluput intu bukit Sinai. Ewaue manyanang atei TUHAN.

⁷Haya-hayak dengan anak tabiri te musti iluput kea ije liter danum anggor je inata akan hunjun mesbeh.

⁸Anak tabiri je iluput halemei musti ilalus hapan cara je sama kilau parapah hanjewu, impahayak danum anggor. Ewau parapah je ingehu te manyanang atei TUHAN.

⁹ Intu andau Sabat musti iluput due kongan tabiri hatue umure ije nyelo, je jaton cacate, due kilo tepong inyampur dengan undus saitun akan parapah taloh kinan tuntang parapah danum anggor.

¹⁰Parapah je ingehu te musti iluput genep andau Sabat kilau pandahang akan parapah sining andau haya-hayak dengan parapah danum anggor.

¹¹Intu tamparan genep bulan musti iluput akan TUHAN parapah je ingehu mahapan due kongan anak sapi hatue tabela, ije kongan tabiri hatue, uju kongan anak tabiri hatue je umure ije nyelo, uras je jaton cacate.

¹²Indu parapah taloh kinan musti iluput tepong je inyampur dengan undus saitun; telo kilo tepong akan genep kongan sapi hatue; tuntang due kilo tepong akan tabiri hatue;

¹³tinai ije kilo tepong akan genep kongan anak tabiri hatue. Parapah je ingehu te iete parapah taloh kinan, je ewaue manyanang atei TUHAN.

¹⁴Haya-hayak dengan parapah je ingehu te musti iluput kea parapah danum anggor, due liter karee akan genep kongan sapi hatue, ije satengah liter akan tabiri hatue, tuntang ije liter akan genep kongan anak tabiri. Jete atoran tahiu parapah je ingehu je musti iluput intu tanggal ije genep bulan hapus nyelo.

¹⁵Indu pandahang akan parapah je ingehu sining andau dengan parapah danum anggor, musti iliputm kea ije kongan kambing hatue akan parapah ampun dosa.

¹⁶ Intu tanggal epat walas bulan ije, jete andau Paska akan TUHAN.

¹⁷ Andau je ijee limbah te, tanggal limewalas, Pesta Rote je dia iragi nampara; katahin uju andau keton dia tau kuman rote je inampa hapan ragi.

¹⁸Intu andau je solake pesta te keton musti mawi pumpong sombayang, tuntang dia tau malalus gawi babehat.

¹⁹Keleh maluput akan TUHAN parapah je ingehu bara due kongan sapi hatue tabela, ije kongan tabiri hatue, tuntang uju kongan anak tabiri hatue je umure ije nyelo, je uras jaton cacate.

²⁰Luput parapah taloh kinan je musti inumon, iete tepong je inyampur dengan undus saitun; telo kilogram tepong akan genep kongan sapi hatue, due kilogram akan tabiri hatue,

²¹tuntang ije kilogram akan genep kongan anak tabiri hatue.

²²Luput kea ije kongan kambing hatue akan parapah ampun dosa. Mahapan cara te keton malalus upacara ampun dosa akan ungkup.

²³Uras parapah jete akan pandahang parapah je ingehu sining hanjewu kilau bahut.

²⁴Mahapan cara te kea musti keton maluput akan TUHAN parapah je ingehu katahin uju andau. Parapah jete akan pandahang parapah je ingehu genep andau dengan parapah danum anggore. Ewau parapah te manyanang atei TUHAN.

²⁵Intu andau je kauju keton musti mawi pumpong sombayang tuntang dia tau malalus gawi babehat.

²⁶ Hong andau je solake Pesta Manggetem, andau hai limbah uju minggu, metoh keton maluput gandom taheta akan TUHAN, keton musti mawi pumpong sombayang, tuntang dia tau mawi gawi babehat.

²⁷Keleh maluput akan TUHAN parapah je ingehu mahapan due kongan sapi hatue, ije kongan tabiri hatue tabela tuntang uju kongan tabiri hatue je umure ije nyelo, je uras jaton cacate. Ewau parapah je ingehu te manyanang atei TUHAN.

²⁸Keleh maluput parapah taloh kinan je musti ilalus, mahapan tepong inyampur undus saitun: telo kilo akan genep kongan sapi hatue,

²⁹tuntang ije kilo akan genep kongan anak tabiri.

³⁰Keleh maluput kea ije kongan kambing hatue akan parapah ampun dosa. Mahapan cara te keton malalus upacara hapa badamai akan ungkup.

³¹Kare parapah te dengan parapah anggore jete pandahang akan parapah je ingehu sining andau tuntang parapah taloh kinan.