Read Ngaju NUMERI 29 Bible Online

NUMERI 29 - Ngaju bible

NUMERI 29

¹Intu tanggal ije bulan uju keton musti mawi pumpong sombayang, tuntang dia tau mawi gawi babehat. Hong andau te kare tarompet musti impahiau.

²Kaleh maluput akan TUHAN parapah je ingehu hapan ije kongan sapi hatue tabela, ije kongan tabiri hatue, tuntang ije kongan anak tabiri hatue umur ije nyelo, je uras jaton cacate. Ewau parapah te manyanang atei TUHAN.

³Keleh maluput kea parapah taloh kinan je musti iliput, bara tepong inyampur undus saitun: telo kilo akan sapi hatue, due kilo akan tabiri hatue

⁴tuntang ije kilo akan genep kongan anak tabiri.

⁵Keleh maluput kea ije kongan kambing hatue akan parapah ampun dosa. Dengan cara te keton malalus upacara akan ampun dosan ungkup.

⁶Kare parapah te kilau pandahang akan parapah je ingehu je iluput haya-hayak dengan parapah taloh kinan, hong tanggal ije genep bulan. Kea kilau pandahang akan parapah je ingehu sining andau je iluput haya-hayak dengan parapah taloh kinan tuntang parapah danum anggore. Ewau parapah je ingehu te manyanang atei TUHAN.

⁷ Intu tanggal sapuluh bulan uju keton musti malalus pumpong sombayang. Intu andau te keton musti puasa tuntang dia tau bagawi.

⁸Keleh maluput akan TUHAN parapah je ingehu bara ije kongan sapi hatue tabela, ije kongan tabiri hatue tuntang uju kongan anak tabiri hatue umur ije nyelo, je uras jaton cacate. Ewau parapah te manyanang atei TUHAN.

⁹Keleh maluput parapah taloh kinan, je musti ilalus, bara tepong je inyampur dengan undus saitun: Telo kilo akan sapi hatue, due kilo akan tabiri hatue,

¹⁰tuntang ije kilo akan genep kongan anak tabiri.

¹¹Keleh maluput kea ije kongan kambing hatue akan upacara ampun dosa akan ungkup, beken bara parapah ampun dosa tuntang parapah je ingehu sining andau hayak parapah taloh kinan tuntang parapah danum anggor je iluput hong andau te.

¹² Intu tanggal lime walas bulan uju keton musti mawi pumpong sombayang, dia tau mawi gawi babehat. Katahin uju andau keton musti malalus pesta akan mahormat TUHAN.

¹³Intu andau je solake keleh maluput akan TUHAN parapah je ingehu bara telo walas kongan sapi hatue tabela, due kongan tabiri hatuee tabela, tuntang epat walas kongan anak tabiri hatue umur ije nyelo, je uras jaton cacate. Ewau parapah te manyanang atei TUHAN.

¹⁴Keleh maluput kea parapah taloh kinan je musti ilalus bara tepong je inyampur dengan undus saitun: telo kilo akan genep kongan sapi hatue, due kilo akan genep kongan tabiri hatue,

¹⁵tuntang ije kilo akan genep kongan anak tabiri. Haya-hayak dengan parapah taloh kinan te musti iluput kea parapah danum anggor je imerlu.

¹⁶Beken bara te iluput kea ije kongan kambing hatue akan parapah ampun dosa. Parapah te parapah pandahang akan parapah je ingehu sining andau hayak parapah taloh kinan tuntang parapah danum anggore.

¹⁷Intu andau je kadue keleh maluput duewalas kongan sapi hatue tabela, due kongan tabiri hatue, tuntang epat walas kongan anak tabiri hatue umur ije nyelo, je uras jaton cacate.

¹⁸Keleh maluput haya-hayak dengan jete uras parapah beken sama kilau je ihapan akan andau je solake.

²⁰Intu andau je katelo keleh maluput sawalas kongan sapi hatue tabela, due kongan tabiri hatue, tuntang epat walas kongan anak tabiri hatue umur ije nyelo, je uras jaton cacate.

²¹Haya-hayak dengan jete luput kea uras kare parapah je beken kilau je ihapan akan andau je solake.

²³Intu andau je kaepat keleh maluput sapuluh kongan sapi hatue tabela, due kongan tabiri hatue, tuntang epat walas kongan anak tabiri hatue umur ije nyelo, je uras jaton cacate.

²⁴Haya-hayak dengan jete luput kea uras kare parapah beken sama kilau je ilalus akan andau je solake.

²⁶Hong andau je kalime keleh maluput jalatien kongan sapi hatue, due kongan tabiri hatue, tuntang epat walas kongan anak tabiri umur ije nyelo, je uras jaton cacate.

²⁷Haya-hayak dengan jete keleh maluput kea uras kare parapah je beken kilau je ilalus huang andau je solake.

²⁹Intu andau je kajahawen keleh maluput hanya kongan sapi hatue tabela, due kongan tabiri hatue, epat walas kongan anak tabiri umur ije nyelo, je uras jaton cacate.

³⁰Haya-hayak dengan jete, keleh maluput kea uras kare parapah je beken kilau je ilalus huang andau je solake.

³²Intu andau je kauju keleh maluput uju kongan sapi hatue tabela, due kongan tabiri hatue, epat walas kongan anak tabiri umur ije nyelo, je genep kongae uras jaton cacate.

³³Haya-hayak dengan jete keleh maluput kea uras kare parapah beken sama kilau je ilalus huang andau je solake.

³⁵Intu andau je kahanya keton musti mawi pumpong sombayang tuntang dia tau bagawi babehat.

³⁶Keleh maluput akan TUHAN parapah je ingehu mahapan ije kongan sapi hatue tabela, ije kongan tabiri hatue, tuntang uju kongan anak tabiri hatue umur ije nyelo, je uras jaton cacate. Ewau parapah te manyanang atei TUHAN.

³⁷Haya-hayak dengan jete keleh maluput kea uras kare parapah beken sama kilau je ilalus huang andau je solake.

³⁹Jete wei kare atoran tahiu parapah je ingehu, parapah taloh kinan, parapah danum anggor, dengan parapah hapa badamai je musti iluput keton akan TUHAN intu kare pesta je jari inukas. Kare parapah te akan pandahang kare parapah je iluput keton hapa malalus nasar atawa parapah tumon kahias atei.

⁴⁰Moses manyampai akan bangsa Israel samandiai je irentah TUHAN akae.