Read Ngaju NUMERI 30 Bible Online

NUMERI 30 - Ngaju bible

NUMERI 30

¹Moses manenga kare atoran toh akan kare pamimpin kare suku bangsa Israel.

² Amon ije biti oloh hatue mawi nasar atawa manyewut auh janji dengan sumpah akan TUHAN, sampai ie manukas arepe huang ije janji, ie musti malalus taloh je injanjie te, tuntang ie dia tau mungkir janjie.

³Amon ije biti oloh bawi je melai intu human bapae mawi nasar akan TUHAN, tuntang manukas arepe akan ije janji, tuntang bapae dia mangahana metoh mahining taloh te, maka oloh bawi te musti malalus kakare nasar tuntang janjie.

⁵Tapi amon mahining taloh te bapae mangahana, maka oloh bawi te dia buah nasar atawa janjie. TUHAN kareh mampun ie, awi ie ingahana bapae.

⁶Amon ije biti oloh bawi je hindai kawin mawi nasar atawa manukas arepe akan ije janji, en te jari inirok labih helo atawa kakai bewei, maka ie leket huang nasar atawa janjie te. Amon intu rahian andau ie kawin, ie te tetep leket dengan nasar atawa janjie te, asal banae dia mangahana metoh ie mahining taloh te.

⁸Tapi amon banae metoh mahininge palus mangahana ie, maka ie dia leket dengan nasar tuntang janjie te. TUHAN kareh mampun ie.

⁹Amon ije biti balo atawa oloh bawi je jari hatulang mawi nasar atawa janji je manjarat arepe, ie injarat nasar atawa janji te tuntang musti malaluse.

¹⁰Amon ije biti oloh bawi je jari kawin mawi nasar je tau manjarat arepe,

¹¹ie musti malalus kakare taloh je injanjie te, asal banae dia mangahana metoh ie mahining hal te.

¹²Tapi amon metoh mahining taloh te banae mangahana ie, maka oloh bawi te dia injarat tinai intu nasar atawa janjie. TUHAN kareh mampun ie, tagal ie ingahana awi banae.

¹³Banan oloh aton hak manyoho atawa mambalang genep nasar atawa janji je inampa sawae.

¹⁴Tapi metoh mahining taloh te banae dia mangahana, oloh bawi te musti malalus hapus nasar atawa janjie. Banae manarima nasar atawa janji te awi ie dia mangahana metoh mahininge.

¹⁵Amon rahian andau banae te mambalang nasar atawa janjin sawae, maka banae te je musti mananggong kajarian kabalang te.

¹⁶Jete kare atoran je inenga TUHAN akan Moses tahiu nasar tuntang janji je inampa awi ije biti oloh bawi je melai intu human bapae, atawa awi ije biti oloh bawi je jari kawin.