Read Ngaju NUMERI 32 Bible Online

NUMERI 32 - Ngaju bible

NUMERI 32

¹Suku Ruben tuntang Gad are mahaga kawan meto. Metoh ewen mite paham kahalape tanah Yaeser tuntang tanah Gilead akan eka mahaga kawan meto,

²ewen palus haguet manaharep Moses, Imam Eleasar tuntang kare pamimpin beken ain Israel. Koan ewen,

³“Tanah kare lewu Atarot, Dibon, Yaeser, Nimra, Hesbon, Eleale, Sebam, Nebo tuntang Beon je jari irentah Israel awi pandohop TUHAN, paham bahalap akan eka manyakatik kawan meto. Tuntang awi kawan meto ain ikei are toto,

⁵ikei balaku mangat tanah toh inenga akan ikei jadi ayun ikei. Ela manyoho ikei bindah akan dipah Sungei Yordan.”

⁶Tombah Moses, “Lalehan kahakun keton melai intu hetoh, padahal kare oloh ije kabangsa dengan keton haguet parang?

⁷Mbuhen keton mawi bangsa Israel mikeh dimpah Sungei Yordan tuntang tame lewu je inenga TUHAN akan ewen?

⁸ Kare bapa keton mawi gawi kalote kea katika aku manyoho ewen bara Kades-Barnea uka mangombang lewu te.

⁹Ewen jari sampai intu janah Eskol tuntang jari kea mite tanah te. Tapi katika ewen haluli, ewen mawi bangsa Israel mikeh tame tanah je jari inenga TUHAN akan ewen.

¹⁰ Palus TUHAN balait metoh te sampai Ie hamauh, “Kare oloh toh dia baketep dengang-Ku. Tagal te Aku sumpah iete bara ewen je umure jadi due puluh nyelo kahunjun metoh ewen malihi Misir, jaton ije kareh je tau tame lewu je injanji-Ku akan Abraham, Isaak tuntang Yakob.”

¹²Uras oloh buah hukuman te, kacuali Kaleb anak Yepune, oloh Kenas, tuntang Yosua anak Nun, awi ewen due baketep dengan TUHAN.

¹³TUHAN balait dengan bangsa Israel sampai ie manalua ewen mangombang padang pasir epat puluh nyelo katahie mawi hapus pangereng je jari mandarhaka Dengae matei samandiaie.

¹⁴Toh, keton mandarhaka kilau kare bapa keton! Keton puna baris kare oloh badosa je mawi kalait TUHAN hasep tinai akan bangsa Israel!

¹⁵Amon keton mules manalikut TUHAN, maka hapus bangsa toh kareh inaluae labih tahi tinai intu padang pasir, tuntang keton je mawi sabab ewen binasa!”

¹⁶Palus kare oloh Ruben tuntang kare oloh Gad te manaharep Moses tuntang hamauh, “Keleh ikei labih helo mampendeng kare karambang badinding akan kare tabirin ikei, tuntang kare lewu je hakota akan anak sawan ikei.

¹⁷Ikei kareh tata-tatap mangat jeleng miar parang haya-hayak dengan kare paharin ikei. Ikei kareh mamimpin gawi manyarang te tuntang mimbit ewen tame akan tanah je manjadi ayun ewen. Pandehan te anak sawan ikei tau melai intu hetoh, intu kare lewu hakota kejau bara kare oloh je manyarang lewu toh.

¹⁸Ikei kareh dia buli akan human ikei helo bara kakare oloh Israel manduan petak manjadi waris ewen.

¹⁹Ikei isut mahin dia maku manarima bara petak ewen intu dipah Sungei Yordan, awi ikei jari manarima bagin ikei intu hetoh, intu hila timor Sungei Yordan.”

²⁰Tombah Moses, “Amon keton toto-toto handak tata-tatap uka parang akan TUHAN,

²¹tuntang kakare keton je tau parang dimpah Sungei Yordan, tuntang intu penda pimpinan TUHAN manyarang kare musoh sampai TUHAN maharak ewen,

²²mawi lewu te mamenda Ie, maka keton tau buli; keton palus lapas bara kare kapatut keton dengan TUHAN tuntang dengan kare paharin keton. TUHAN kareh manenga tanah intu hila timor te jadi ain keton.

²³Tapi ingat, amon keton dia malalus janjin keton, keton badosa intu taharep TUHAN tuntang kareh ihukum tagal dosan keton te.

²⁴Keleh lius mampendeng kare lewu tuntang kare karambang tabirim, tuntang ela kalapean malalus taloh je jari injanji keton te.”

²⁵Palus kare oloh Gad tuntang oloh Ruben te hamauh, “Tuan, ikei kareh malalus taloh je irentah tuan.

²⁶Anak sawan ikei tuntang sapi dengan tabirin ikei kareh melai intu hetoh, intu kare lewu hong Gilead.

²⁷Tapi ikei toh tatap haguet parang penda pimpinan TUHAN. Ikei kareh dimpah Sungei Yordan tuntang parang sama kilau je jari insanan TUHAN.”

²⁸ Palus Moses manenga parentah toh akan Imam Eleasar, Yosua tuntang kare pamimpin Israel,

²⁹“Amon kare oloh Gad tuntang kare oloh Ruben manumon parentah TUHAN tuntang dimpah Sungei Yordan uka parang, tuntang amon tagal pandohop ewen keton olih manduan lewu te, maka tanah Gilead musti inenga keton akan ewen jadi ayun ewen.

³⁰Tapi amon ewen dia dimpah Sungei Yordan uka parang haya-hayak dengan keton, maka ewen musti manarima bagi petak pusaka intu lewu Kanaan, sama kilau keton.”

³¹Tombah kare oloh Gad tuntang kare oloh Ruben, “Tuan, ikei kareh malalus taloh je irentah TUHAN.

³²Intu penda pimpinan TUHAN ikei kareh dimpah akan tanah Kanaan tuntang miar parang, tapi keleh petak intu hila timor Sungei Yordan te tetep ayun ikei.”

³³Palus Moses manyarah akan kare suku Gad tuntang Ruben tuntang akan satengah suku Manase hapus tanah Sihon, raja Amori, tuntang tanah Og, raja Basan, tatame kare lewu tuntang tanah hakalilinge.

³⁴Suku Gad mamangun haluli lewu Dibon, Atarot, Aroër,

³⁵Atarot-Sopan, Yaeser, Yogbeha,

³⁶Bet-Nimra, tuntang Bet-Haran kilau kare lewu hakota tuntang kilau kare eka karambang tabiri.

³⁷Suku Ruben mamangun haluli kare lewu Hesbon, Eleale, Kiryataim,

³⁸Nebo, Baal-Meon, tuntang Sebam. Kare lewu je impendeng ewen haluli te ingganti ewen arae.

³⁹Jalahan Makir, anak Manase, manyarang Tanah Gilead, palus marampase tuntang maharak kare oloh Amori je aton intu hete.

⁴⁰Awi te Moses manenga tanah Gilead te akan jalahan Makir, tuntang ewen manetep intu hete.

⁴¹Yair, bara suku Manase, manyarang tuntang marabut pire-pire desa, palus manggare arae, “Kare Desa Yair”.

⁴²Nobah manyarang tuntang marabut Kenat dengan kare kampong hakalilinge, palus manggare arae Nobah manumon arae kabuat.