Read Ngaju NUMERI 33 Bible Online

NUMERI 33 - Ngaju bible

NUMERI 33

¹Limbah bangsa Israel malihi Misir, huang barisan manumon genep suku intu penda pimpinan Moses tuntang Aron, ewen tende intu pire-pire eka.

²TUHAN marentah Moses mangat mancatet aran genep eka ewen tende.

³Bangsa Israel malihi Misir intu tanggal lime walas bulan ije, jandau limbah Paska je solake. Intu penda kalindong TUHAN ewen malihi lewu Rameses, inampayah awi bangsa Misir,

⁴je metoh te mangubur kare anak bakas ewen je jari impatei awi TUHAN. Hapan gawi te TUHAN mambukti je Ie labih abas bara kare dewa Misir.

⁵Limbah bangsa Israel malihi Rameses, ewen mampendeng kemah intu Sukot.

⁶Palus ewen haguet tinai tuntang mampendeng kemah intu Etam, intu saran padang pasir.

⁷Bara hete ewen haluli akan Pi-Hahirot, hila timor Baal-Sepon, palus mampendeng kemah intu tokep Migdol.

⁸Limbah te ewen malihi Pi-Hahirot, dimpah tasik tuntang tame akan padang pasir Etam; limbah panjalanan telo andau, ewen mampendeng kemah intu Mara.

⁹Bara hete ewen tarus tuntang mampendeng kemah intu Elim; intu hete aton due walas tahasak danum tuntang uju puluh upon korma.

¹⁰Limbah te ewen malihi Elim tuntang mampendeng kemah tokep telok Sues.

¹¹Limbah te tinai ewen mampendeng kemah intu padang pasir Sin, palus tokep Dopka, limbah te tinai intu Alus, limbah te tinai intu Rapidim, tapi intu hete jaton danum ihop.

¹⁵Bara Rapidim ewen palus akan bukit Hor tuntang mampendeng kemah hong kare eka toh: padang pasir Sinai, Kibrot-Taawa, “Kubur Kabongo,” Haserot, Ritma, Rimon-Peres, Libna, Risa, Kahelata, Bukit Saper, Harada, Makelot, Tahat, Tarah, Mitka, Hasmona, Moserot, Bene-Yaakan, Hor Gidgad, Yotbata, Abrona, Esion-Geber, padang pasir Sin, tuntang padang pasir Hor, intu helat tanah Edom.

³⁸ Hapan parentah TUHAN, Imam Aron mandai akan bukit Hor. Intu hete ie matei intu tanggal ije bulan lime hong nyelo je kaepat puluh limbah ungkup Israel malihi Misir. Metoh matei, umur Aron 123 nyelo.

⁴⁰ Pandehan te raja lewu Arad, intu Tanah Negep, Kanaan hila salatan mandino kabar je ungkup Israel metohe manintu lewu te.

⁴¹Hong pangguet bara bukit Hor akan janah Moab oloh Israel mampendeng kemah intu kare eka toh: Salmona, Punon, Obot, kaleka Abarim intu saran tanah Moab, Dibon-Gad, Almon Diblataim, Bukit Abarim tokep Bukit Nebo, tuntang intu janah Moab saran Sungei Yordan, tokep lewu Yerikho, intu helat Bet-Yesimot tuntang janah Sitim

⁵⁰Intu petak rampar Moab te intu saran Sungei Yordan, tokep lewu Yerikho, TUHAN manenga akan Moses,

⁵¹kare parentah toh akan bangsa Israel, “Amon keton dimpah Sungei Yordan mangat tame lewu Kanaan,

⁵²keton musti maharak lepah kare oloh tanah te. Palomos uras kare hampatong dewae je bara batu tuntang je inoang, dengan kare eka sombayang ain ewen.

⁵³Tanah te ela sampai dia irabut tuntang inguasa awi keton, karana Aku manenga jete akan keton.

⁵⁴ Limbah te keton musti mambagie akan indu pusaka akan kare jalahan keton mahapan tenong. Akan jalahan je hai keton musti manenga bagi je hai, tuntang akan jalahan je korik, bagi je korik.

⁵⁵Tapi amon oloh lewu te dia keton maharake, kare oloh je tetep melai intu hete kareh manyusah keton kilau baras intu matan keton tuntang duhi intu pain keton.

⁵⁶Amon keton dia maharak ewen, Aku kareh mambinasa keton sama kilau je irencana-Ku akan ewen.”