Read Ngaju NUMERI 34 Bible Online

NUMERI 34 - Ngaju bible

NUMERI 34

¹TUHAN manenga akan Moses

²kare parentah toh akan bangsa Israel, “Dia tahi tinai keton tame akan tanah Kanaan, tanah je inenga-Ku akan keton kilau tanah pusaka. Jetoh kare tikas saran lewun keton te.

³Intu hila Salatan, tikas saran te nampara bara padang pasir Sin manyaroroi Edom. Intu hila timor watas te nampara bara puting salatan Tasik Matei,

⁴mambelok akan hila salatan manintu Jalan Akrabim tuntang palus akan Sin sampai Kades-Barnea intu salatan. Bara hete mambelok manintu hila barat tasik sampai Hasar-Adar tuntang tarus akan Asmon.

⁵Intu hete belok akan tanah hong tikas saran Misir je kajariae sampai intu Tasik Bentok.

⁶Tasik Bentok jete tikas saran lewun keton hila barat.

⁷Intu utara, tikas saran te manampara bara Tasik Bentok manintu bukit Hor

⁸tuntang bara hete akan jalan Hamat, palus akan Sedad

⁹tuntang akan Sipron tuntang tende intu Hasar-Enan.

¹⁰Hong timor, tikas saran te manampara bara Hasar-Enan akan Sepam.

¹¹Bara hete mohon akan Ribla intu hila timor Ain, palus akan kare bukit intu pantai timor danau Galilea,

¹²tinai akan salatan mahoroi Sungei Yordan sampai akan Tasik Matei. Jete lewun keton manumon kare tikas sarae hakalilinge.”

¹³ Moses hamauh dengan bangsa Israel, “Jete tanah je kareh inarima keton hapan tenong, tanah je manumon parentah TUHAN musti imbagi akan jalatien satengah suku bangsa Israel.

¹⁴Kare suku Ruben tuntang Gad dengan belahe bara suku Manase, jari manarima bagin ewen, tuntang tanah te kea jari imbagi akan kare keluarga ewen.

¹⁵Tanah pusaka ewen te intu hila timor Sungei Yordan, tokep lewu Yerikho.”

¹⁶TUHAN hamauh dengan Moses,

¹⁷“Oloh je musti mambagi tanah te hong marak keton iete Imam Eleasar, tuntang Yosua anak Nun.

¹⁸Ninjok kea ije biti pamimpin bara genep suku akan mandohop Eleasar tuntang Yosua mambagi tanah te.”

¹⁹Aran kare oloh te iete: [SUKU] — [PAMIMPIN] Yuda — Kaleb anak Yepune Simeon — Samuel anak Amihud Benyamin — Elidad anak Kislon Dan — Buki anak Yogli Manase — Haniel anak Epod Epraim — Kemuel anak Siptan Sebulon — Elisapan anak Parnah Isaskar — Paltiel anak Asan Aser — Ahihud anak Selomi Naptali — Pedael anak Amihud

²⁹Jete kare oloh je irentah TUHAN uka mambagi tanah pusaka akan bangsa Israel intu tanah Kanaan.