Read Ngaju NUMERI 36 Bible Online

NUMERI 36 - Ngaju bible

NUMERI 36

¹Kare kapala keluarga hong jalahan Gilead, anak Makhir, iete eson Manase anak Yosep, haguet manaharep Moses tuntang kare pamimpin je beken.

² Koan ewen, “TUHAN manyoho keton mambagi petak toh akan bangsa Israel mahapan tenong. Ie kea manyoho keton manenga petak pusaka paharin ikei Selapehad akan kare anake je bawi.

³Tapi musti iingat amon ewen te kawin dengan oloh hatue bara suku beken, petak ewen manjato akan lengen suku te. Awi te petak je inantu indu eka ikei kareh sasar isut.

⁴Huang Nyelo Halalian, metoh te hapus kare panatau je jari injual ilian akan tempoe je solake, petak kare anak bawin Selapehad te kareh tetep jadi ayun kare banan ewen, mawi suku ikei nihau petak te.”

⁵Balalu Moses mansanan akan bangsa Israel parentah toh bara TUHAN, “Narai je insanan kare oloh turonan Yosep te toto,

⁶tuntang awi te TUHAN hamauh je kare anak bawi ain Selapehad bebas kawin dengan eweh bewei je ingahandak ewen asal sukue sama dengan ewen.

⁷Petak pusaka gagenep oloh Israel tetep leket dengan sukue.

⁸Genep oloh bawi je mawaris petak pusaka intu huang ije bara suku Israel musti kawin dengan oloh je bara suku te kea. Kalote genep bitin oloh Israel kareh tetep mandino waris petak pusaka ain tato hiange.

⁹Awi te petak pusaka te dia akan mindah bara ije suku akan suku je beken. Genep suku bangsa Israel kareh tetep tempon petak pusakae kabuat.”

¹⁰Jadi hasaroroi dengan parentah TUHAN akan Moses, kalime-lime anak bawi ain Selapehad te, iete Mahla, Tirsa, Hogla, Milka tuntang Noa kawin dengan kare oloh je magon hampahari dengan ewen bara hila bapae.

¹²Ewen kawin dengan kare oloh bara kare jalahan huang suku Manase, anak Yosep. Kalote petak pusaka ewen tetep jadi ayun suku ain bapa ewen.

¹³Jete kare atoran tuntang parentah je inenga TUHAN akan bangsa Israel nahalau Moses, metoh bangsa Israel aton intu janah Moab hong saran Sungei Yordan, tokep lewu Yerikho.