Read Ngaju NUMERI 4 Bible Online

NUMERI 4 - Ngaju bible

NUMERI 4

¹TUHAN manyoho Moses tuntang Aron

²manyensus oloh Lewi bara jalahan Kehat manumon genep keluargae,

³palus mancatet aran kakare oloh hatue je umure telo puluh nyelo sampai lime puluh nyelo, je olih malalus gawi intu Kemah TUHAN.

⁴Gawin ewen iete maharago kare ramo je paham barasih.

⁵TUHAN manenga akan Moses atoran toh: Amon sampai katikae uka mungkar kare kemah, Aron tuntang kare anake musti tame akan Kemah TUHAN, manipas dinding benang intu baun Patin Janji, tuntang manutup Pati te hapan benang te.

⁶Limbah te ewen musti manutupe tinai hapan ije kalambar upak meto je lamos, palus mambirang ije kalambar benang biru intu hunjue, tuntang mangkepan kayu pikul Pati te.

⁷Ewen musti mambirang ije kalambar benang biru intu hunjun meja eka rote panenga akan TUHAN, tuntang intu hunjun meja te musti iandak pinggan, dadupa, baki eka parapah, tuntang kandi akan parapah danum anggor. Rote panenga musti harajur aton intu meja te.

⁸Ewen musti manutup taloh samandiai te dengan ije kalambar benang bahandang, palus mambirang ije kalambar upak meto je lamos intu hunjue, tuntang mangkepan kayu pikul meja te.

⁹Ewen musti manduan ije kalambar benang biru tuntang manutup tantahan sumbo dengan kare sumboe, taloh hapan marasih hampulur sumbo tuntang panantalaie, tuntang uras kare eka undus saitun.

¹⁰Tantahan sumbo tuntang hapus pakakase musti imbungkos ewen dengan ije kalambar upak meto je lamos palus mingkese intu hunjun eka pikul.

¹¹Limbah te ewen musti mambirang ije kalambar benang biru intu hunjun mesbeh bara amas te, tuntang manutupe dengan ije kalambar upak meto je halus, palus mangkepan kayu pikul mesbeh te.

¹²Uras kare pakakas je ihapan intu huang Kamar Ije Barasih musti induan ewen tuntang imbungkos dengan ije kalambar benang biru. Palus ewen musti manutupe hapan ije kalambar upak meto je lamos, tuntang mingkese intu hunjun pikul.

¹³Ewen musti marasih mesbeh te bara kawo, palus mambirang ije kalambar benang ungu intu hunjue.

¹⁴Tinai intu hunjue ewen musti mingkes kare pakakas je ihapan huang sombayang intu mesbeh te: eka apui, simpang, sendok kawo, tuntang sangko. Palus ewen musti manutup samandiai te hapan ije kalambar upak meto je lamos tuntang ingkepan kayu pikule.

¹⁵TUHAN hamauh dengan Moses tuntang Aron, “Metoh keton mungkar kare kemah, Aron tuntang kare anake musti tame akan huang Kemah-Ku tuntang manutup uras ramo dengan pakakas je aton intu hete. Harue limbah te, kare oloh Kehat tau dumah uka metoe. Tapi ewen dia tau manampayah, manokep atawa manigong kare taloh te, awi jari ingabeken akang-Ku. Amon ewen mawie kea, ewen kareh matei. Maka, mangat uras kare oloh Kehat te ela nihau bara suku Lewi, Aron tuntang kare anake musti manyoho genep biti bara marak ewen mimbit kare taloh je musti ewen mimbite. Jete gawin oloh Kehat metoh Kemah-Ku iindah. Eleasar anak Aron, aton tanggong jawab akan hapus Kemah-Ku, minyak sumbo, garo, parapah taloh kinan je iluput sining andau, minyak upacara tuntang kakare taloh je aton intu huang Kemah-Ku te.”

²¹TUHAN manyoho Moses

²²manyensus oloh Lewi bara jalahan Gerson manumon genep keluargae.

²³Moses musti mancatet aran kakare oloh hatue je umure telo puluh sampai lime puluh nyelo je olih malalus gawi intu Kemah TUHAN.

²⁴Ewen inyoho manggatang kare ramo toh:

²⁵Dinding benang Kemah te dengan tutupe hila huang tuntang hila luar bara upak meto je lamos, dinding benang bauntonggang kemah;

²⁶kare dinding tuntang kare tali akan parantaran kaliling kemah tuntang mesbeh; dinding benang lawang parantaran tuntang pakakas je ihapan akan mangkepan uras kare taloh te. Ewen aton tanggong jawab akan kakare gawi je aton hubungae dengan kare ramo te.

²⁷Moses tuntang Aron musti manantuani mangat gawi je inyarah Aron tuntang kare anake akan oloh Gerson te ilalus; tuntang uras kare ramo je musti iunda, mangat iunda.

²⁸Jete gawin kare oloh Gerson intu huang kemah. Kare gawi te musti ilalus manumon pimpinan Itamar, anak Aron.

²⁹TUHAN manyoho Moses manyensus oloh Lewi bara jalahan Merari manumon genep keluargae.

³⁰Moses musti mancatet aran oloh hatue je umure telo puluh sampai lime puluh nyelo je tau bagawi intu Kemah TUHAN.

³¹Ewen inyoho manggatang kare rangka kemah te, kare baloke, kare tihange tuntang lasehe.

³²Kea kare tihang parantaran kaliling kemah te dengan lasehe, kare pasake tuntang kare talie dengan kare pakakas je ihapan katika mampendenge. Genep oloh inyoho mimbit ramo je inukas.

³³Jete kare gawi ain jalahan Merari; kare gawin ewen intu Kemah TUHAN te musti ilalus manumon atoh Itamar, anak Imam Aron.

³⁴Tumon parentah TUHAN, Moses, Aron tuntang kare pamimpin ungkup je manyensus telo-telo jalahan ain suku Lewi, iete Kehat, Gerson tuntang Merari. Ewen mawi sensus te intu gagenep biti huang keluargae. Ewen mancatet aran oloh hatue je umure telo puluh sampai lime puluh nyelo je olih malalus gawi intu Kemah TUHAN. Jetoh hasile; [JALAHAN] — [KARE BITIE] Kehat — 2.750 Gerson — 2.630 Merari — 3.200 Samandiaie — 8.580

⁴⁹Awi parentah TUHAN mahalau Moses, genep biti indaptar tuntang inenga tanggong jawab kabuat-kabuat akan taloh je musti iawie atawa taloh je musti inanggonge.