Read Ngaju NUMERI 5 Bible Online

NUMERI 5 - Ngaju bible

NUMERI 5

¹TUHAN hamauh dengan Moses,

²“Tenga parentah toh akan oloh Israel: Uras oloh je buah panyakit kulit je bakaike-ikeh, atawa panyakit kahawen, atawa je jari manigong hantu, musti impalua bara kare kemah oloh Israel.

³Ewen musti inyoho haguet, mangat dia mamapa kare kemah, eka akang-Ku melai hong bentok ungkup-Ku.”

⁴Oloh Israel malalus parentah te tuntang mampalua uras oloh je kilau te bara kare kemah.

⁵ TUHAN manenga akan Moses

⁶kare atoran toh akan oloh Israel: amon ije biti oloh dia baketep dengan TUHAN awie mawi kasalan dengan oloh beken,

⁷oloh te musti mangaku dosae tuntang mambayar tewus lepa-lepah, indahang due puluh persen, akan oloh je imparugi awie.

⁸Tapi amon oloh je imparugie te jari matei, tuntang jaton bara kola tokep, maka tewus te musti inenga akan TUHAN, tuntang jadi bagin imam. Tewus te dia tame tabiri hatue akan upacara mampuas dosa akan oloh je mawi kasalan te.

⁹Bara taloh je iluput oloh Israel akan TUHAN, parapah je tantai ingabeken jadi bagin imam je manarima parapah te.

¹⁰Taloh je iluput oloh akan TUHAN, jadi bagin oloh te kabuat. Baya taloh je inyarahe akan imam, jete jadi bagin imam te.

¹¹TUHAN manyoho Moses,

¹²manenga kare atoran toh akan oloh Israel. Tau kea ije biti oloh hatue salenga dawa-dawa angate dengan sawae. Ie manyangka sawae te dia baketep dengae tuntang jari mamapa arepe awi marantep oloh hatue beken. Tapi banae te dia olih mambukti, awi taloh te ilalus suni-suni, saksie jaton tuntang ie dia tarasondau mawi taloh te. Atawa, tau kea ije biti banan oloh dengan sawae, padahal sawae te dia habandong.

¹⁵Intu due-due pakara te maka banan oloh te musti mimbit sawae akan imam. Ie kea musti mimbit parapah je ihapan, iete ije kilo tepong gandom. Tepong te dia tau inata hapan undus saitun atawa imbuwor garo. Awi jete parapah kadawa je inukas akan mananda kadawa banan oloh taharep sawae.

¹⁶Imam musti manyoho oloh bawi te akan baun mesbeh tuntang mendeng manaharep TUHAN.

¹⁷Tuntang imam musti manduan ije mangkok tuntang manusoh isut danum barasih huange. Limbah te ie musti manduan isut kawo bara laseh Kemah TUHAN tuntang manameae akan huang danum te.

¹⁸Limbah te ie musti murai balau oloh bawi te, tuntang mandak tepong parapah intu lengee. Imam kabuat mimbing danum sapa je bapait te.

¹⁹Limbah te imam musti manyewut auh sumpah tuntang balaku oloh bawi te maku manarimae. Imam musti hamauh, “Amon ikau dia habandong, ikau dia buah sapa je lembut awi danum toh.

²⁰Tapi amon ikau jari habandong,

²¹keleh TUHAN mawi aram jadi sumpah sapa intu marak bangsa ayum. Keleh ie mawi upon sapakm kambareot tuntang kanaim habosong kembang.

²²Danum je mampalembut sapa toh kareh tame akan huang kanaim tuntang mambosong kanaim hayak mangaritip upon sapakm.” Oloh bawi te tombah, “Aku manarima jete; keleh TUHAN malalus taloh te.”

²³Palus imam musti manyurat sapa te intu balon karatas tuntang mangabuse hapan danum bapait te.

²⁴Imam manyoho oloh bawi te mihop danum bapait je mimbit sapa. Amon danum te iihop, jete mawi angat kapehe.

²⁵Imam palus manduan parapah tepong te, tuntang mananjongae intu taharep TUHAN, Palus mimbite akan mesbeh.

²⁶Palus ie manduan ije karakop tepong kilau tanda je uras tepong te jari iluput, palus imapuie intu hunjun mesbeh. Kajariae danum te impihop akan oloh bawi te.

²⁷Amon oloh bawi te jari habandong, danum te mawi angat kapehe toto. Kanaie habosong tuntang upon sapake karitip. Arae kareh jadi sumpah sapa intu marak bangsae.

²⁸Tapi amon ie dia sala ie dia buah sapa tuntang magon tau manak.

²⁹Jete atoran amon ije biti banan oloh ngabehu tuntang dawa-dawa angate tagal sawae jari habandong tuntang mamapa arepe. Oloh hatue te musti mimbit sawae te manaharep TUHAN tuntang imam musti malalus atoran te akae.

³¹Oloh hatue te lapas bara kasalan, tapi sawae, amon puna sala, musti mananggong kasalae.