Read Ngaju NUMERI 6 Bible Online

NUMERI 6 - Ngaju bible

NUMERI 6

¹TUHAN manyoho Moses

²manenga kare atoran toh akan oloh Israel. Genep bitin oloh hatue atawa oloh bawi je hajanji belom tantai akan TUHAN kilau oloh nasir,

³ dia tau mihop anggor atawa taloh ihop je bahari. Ie dia tau mihop taloh bahari en kea je bara bua anggor atawa bua awang beken. Ie dia tau kuman bua anggor je taheta atawa je keang, atawa en kea je bara batang anggor; bawake atawa kudope dia tau ie kumae.

⁵Katahin wayah janjie te ie dia tau manetek balaue atawa bagunting. Katahin te balaue tuntang janggute musti inalua tumbo panjang. Ie bahimbing intu janjie sampai wayah mangurong arepe akan TUHAN lepah.

⁶Balaue te jadi tanda je ie ingabeken akan TUHAN. Katahin janjie ilalus ie dia tau mamapa arepe. Ie dia tau manokep hantu, aloh jete hantun bapae, indue atawae paharie.

⁸Katahin ie oloh nasir, ie oloh je puna tantai akan TUHAN.

⁹Amon balau ije biti nasir je jari ingabeken te papa awi ie salenga manokep oloh matei, ie musti mentai uju andau katahie. Limbah te ie musti bagunting, harue ie barasih.

¹⁰Intu andau je kahanya ie musti mimbit due kongan burong dara atawa burong kuku akan imam intu bauntonggang Kemah TUHAN.

¹¹Borung je ije musti iluput imam indu parapah ampun dosa. Je ije kongan tinai akan parapah je ingehu hapa mampanihau kapapa. Hong andau te kea ie musti mangabeken balaue haluli tantai akan TUHAN.

¹²Ie manampara taheta tinai bitie kilau oloh nasir. Wayah je jari halau dia itong tinai awi ie jari papa. Kilau parapah gantin karugi, ie musti maluput ije kongan anak tabiri je umure ije nyelo.

¹³ Amon wayah janjin oloh nasir te jari lepah, ie musti mawi upacara toh. Oloh te musti iagah akan baun bauntonggang Kemah TUHAN,

¹⁴dengan mimbit akan TUHAN telo kongan meto je jaton cacate: ije anak tabiri hatue umure ije nyelo akan parapah je ingehu, ije anak tabiri bawie umure ije nyelo kea akan parapah ampun dosa, tuntang ije anak tabiri hatue akan parapah hapa badamai.

¹⁵Ie musti kea maluput ije kasarangan rote je dia iragi, iete rote bulat je inampa bara tepong inyampur undus saitun, tuntang sarabi je iohos undus saitun. Tinai ie musti kea maluput parapah taloh kinan tuntang parapah taloh ihop.

¹⁶Imam musti mimbit taloh samandiai te intu taharep TUHAN, palus maluput parapah ampun dosa tuntang parapah je ingehu.

¹⁷Hayak dengan rote ije kasarangan te, ie musti maluput tabiri hatue te akan TUHAN indu parapah hapa badamai. Tinai parapah taloh kinan tuntang taloh ihop te musti ilupute akan TUHAN.

¹⁸Oloh nasir te musti manggunting balaue intu bauntonggang Kemah TUHAN, palus manjakahe akan apui eka parapah hapa badamai te kanjeran jete imapui.

¹⁹Limbah te amon sapak lengen tabiri hatue te jari impakasak, imam musti manduae tuntang mandake haya-hayak dengan ije rote bulat tuntang ije sarabi bara sarangan te, akan huang lengen oloh nasir te.

²⁰Palus imam musti mayun panginan te indu parapah je iayun baya akan TUHAN. Jete bagi je barasih je manjadi bagin imam, beken bara usok tuntang sapak tabiri hatue je manumon atoran jete bagin imam. Harue limbah te oloh nasir te tau mihop danum anggor.

²¹Jete atoran akan oloh nasir; tapi amon oloh nasir manjanji parapah je labih bara kapatut janjie, ie musti malalus uras taloh je injanji te.

²²TUHAN manyoho Moses

²³manyampai akan Aron tuntang kare anake je ewen musti manyewut kare auh toh hong katika ewen mamberkat bangsa Israel:

²⁴Keleh TUHAN mamberkat tuntang mahaga keton.

²⁵Keleh TUHAN bahalap ateie tuntang bajenta dengan keton.

²⁶Keleh TUHAN masi keton tuntang manenga kasanang aka keton.

²⁷Tinai TUHAN hamauh, “Amon ewen manyewut arang-Ku kilau berkat akan bangsa Israel, Aku kareh mamberkat ewen.”