Read Ngaju NUMERI 7 Bible Online

NUMERI 7 - Ngaju bible

NUMERI 7

¹Metoh Moses lepah mampendeng Kemah TUHAN, kemah te dengan kare pakakase intahbis awie mohos taloh samandiai te hapan undus upacara. Kalote kea ie mawie intu mesbeh tuntang kare pakakase.

²Palus kare pamimpin oloh Israel, iete kapala suku je batanggong jawab akan malalus sensus,

³maluput intu taharep TUHAN jahawen garobak tuntang due walas kongan sapi; genep due biti pamimpin te manenga ije garobak, tuntang genep pamimpin ije kongan sapi. Limbah ewen malupute,

⁴TUHAN hamauh dengan Moses,

⁵“Duan kare panenga te hapan munda Kemah-Ku. Sarah taloh samandiai te akan oloh Lewi hakabuah dengan gawin ewen.”

⁶Palus kare garobak tuntang sapi te inyarah Moses akan oloh Lewi.

⁷Due garobak tuntang epat kongan sapi inengae akan kare oloh Gerson,

⁸epat garobak tuntang hanya kongan sapi akan kare oloh Merari, hakabuah dengan gawin ewen tumon atoh Itamar, anak imam Aron.

⁹Tapi kare oloh Kehat dia manarima garobak atawa sapi bara Moses, awi kare ramo barasih je jadi tanggongan ewen, musti ewen metoe intu hunjun bahae.

¹⁰Kare pamimpin mimbit parapah hapa mawi upacara mantahbis mesbeh. Metoh ewen jari tatap handak mimbit panengan ewen akan baun mesbeh,

¹¹TUHAN hamauh dengan Moses, “Suman akan ewen je genep andau katahin due walas andau ije biti bara kare pamimpin te musti maluput parapahe akan upacara mantahbis mesbeh.”

¹²Genep biti mimbit parapah manumon gilir toh: [ANDAU] — [SUKU] — [PAMIMPIN] Ka-1 — Yuda — Nahason anak Aminadab Ka-2 — Isakhar — Netaneel anak Suar Ka-3 — Sebulon — Eliab anak Helon Ka-4 — Ruben — Elisur anak Sedeur Ka-5 — Simeon — Selumiel anak Surisadai Ka-6 — Gad — Elyasap anak Rehuel Ka-7 — Epraim — Elisama anak Amihud Ka-8 — Manase — Gamaliel anak Pedasur Ka-9 — Benyamin — Abidan anak Gideoni Ka-10 — Dan — Ahieser anak Amisadai Ka-11 — Aser — Pagiel anak Okhran Ka-12 — Naptali — Ahira anak Enan Parapah genep bitin ewen jete sama: ije pinggan perak je ehate 1,5 kilogram tuntang ije sangko perak je ehate 800 gram, manumon timbangan je aton intu Kemah TUHAN. Due-due eka te inyuang kontep dengan tepong inyampur undus akan parapah taloh kinan. Tinai ije pinggan amas je ehate 110 gram basuang garo; ije kongan sapi tabela, ije kongan tabiri hatue tuntang ije kongan anak tabiri je umure ije nyelo akan parapah je(...)

⁸⁴Parapah je imbit awi duewalas pamimpin akan mantahbis mesbeh te samandiaie aton: — due walas pinggan perak tuntang due walas sangko je ehat samandiaie 27,6 kilo. — due walas pinggan amas je ehat samandiaie 1,32 kilo, kontep basuang garo. — due walas kongan sapi hatue, due walas kongan tabiri hatue, tuntang due walas kongan anak tabiri je ije nyelo umure, haya-hayak dengan parapah taloh kinan hapa manyukup parapah je ingehu. — due walas kongan kambing akan parapah ampun dosa. — due puluh epat kongan sapi hatue, jahawen puluh kongan tabiri hatue, jahawen puluh kongan kambing, tuntang jahawen puluh kongan anak tabiri je ije nyelo umure akan parapah hapa badamai.

⁸⁹Genep katika Moses tame akan huang Kemah TUHAN mangat hakotak dengan TUHAN, ie mahining auh TUHAN je hamauh dengae bara hunjun tutup Patin Janji intu helat due-due hampatong kerub.[1]