Read Ngaju NUMERI 8 Bible Online

NUMERI 8 - Ngaju bible

NUMERI 8

¹ TUHAN hamauh dengan Moses,

²“Suman akan Aron, amon ie mangkepan uju sumbo intu tantahan sumbo te, ie musti mangkepae buah ampie sampai mampalawa hila baun tantahan sumbo te.”

³Aron malalus taloh je irentah TUHAN. Ie mangkepan kare sumbo te manaharep hila baun tantahan sumbo.

⁴Eka sumbo te, sampai akan hunjue tuntang kare kambang ramon kahalape inampa bara amas masak, manumon sonto je imparahan TUHAN akan Moses.

⁵TUHAN hamauh dengan Moses, “Keleh mangabeken oloh Lewi bara oloh Israel je beken tuntang lalus upacara uka mamparasih ewen

⁷hapan cara toh: Birik ewen hapan danum akan upacara je mamparasih tuntang soho ewen mangikis hapus bitie hapan lading cukur tuntang mampukan pakaian ewen. Hapan cara te maka ewen tau barasih.

⁸Palus soho ewen manduan ije kongan sapi hatue tabela akan parapah taloh kinan bara tepong je inyampur undus. Palus ikau musti manduan ije kongan sapi hatue beken akan parapah ampun dosa.

⁹Limbah te mumpong hapus ungkup Israel, soho oloh Lewi mendeng intu baun Kemah-Ku.

¹⁰Ungkup musti mandak lengen ewen intu hunjun takolok kare oloh Lewi.

¹¹Palus Aron musti maluput kare oloh Lewi te indu parapah je ingabeken bara oloh Israel akang-Ku, mangat ewen tau malalus sombayang ayung-Ku.

¹²Palus oloh Lewi musti mandak lengen ewen intu hunjun takolok due-due kongan sapi hatue te. Je ije kongan musti iluput akan parapah ampun dosa, je ije kongan tinai akan parapah je ingehu. Dengan upacara te oloh Lewi imparasih.

¹³Keleh mangabeken kare oloh Lewi akang-Ku tuntang soho ewen bagawi akan Aron tuntang kare anake.

¹⁴Hapan upacara te keton mangabeken kare oloh Lewi bara oloh Israel je beken, mangat jadi ayung-Ku.

¹⁵Limbah ikau mawi upacara manyarah kare oloh Lewi te, ewen bara hak bagawi intu huang Kemah-Ku.

¹⁶Aku jari mawi ewen manjadi gantin uras kare anak hatue tambakas Israel; maka ewen te ingabeken tantai akang-Ku.

¹⁷ Metoh Aku mampatei uras anak bakas intu Misir, anak hatue bakas bara genep keluarga Israel tuntang genep meto je solake inakan iawi-Ku jadi ayung-Ku je ingabeken.

¹⁸Toh kilau gantin kare anak bakas Israel, induang-Ku kare oloh Lewi.

¹⁹Kare oloh Lewi te inyarah-Ku akan Aron tuntang kare anake mangat bagawi akan oloh Israel intu huang Kemah-Ku. Tinai mangat ewen balaku ampun intu Aku akan bangsa Israel mangat bangsa te dia buah calaka amon ewen dumah lalau tokep akan eka ije barasih te.”

²⁰Tagal te Moses, Aron tuntang hapus oloh Israel maluput oloh Lewi akan TUHAN, kilau je irentah TUHAN akan Moses.

²¹Kare oloh Lewi te malalus upacara mamparasih arep tuntang mampukan pakaian ewen. Palus Aron maluput ewen indu panenga je ingabeken akan TUHAN. Ie malalus kea upacara uka mamparasih ewen.

²²Oloh Israel malalus kakare taloh je irentah TUHAN akan Moses tahiu oloh Lewi. Tumon te oloh Lewi mandino hak mangat bagawi intu huang Kemah TUHAN manumon atoh Aron tuntang kare anake.

²³TUHAN hamauh dengan Moses,

²⁴“Gagenep bitin oloh Lewi je umure due puluh lime nyelo kahunjun, musti bagawi intu huang Kemah-Ku;

²⁵hong umur lime puluh nyelo ewen te ilapas bara kare gawie.

²⁶Limbah te ie tau mandohop oloh Lewi beken je bagawi intu huang Kemah-Ku, tapi ie dia tinai mimbing gawi je tetep. Jete carae mator gawin kare oloh Lewi.”