Read Ngaju NUMERI 9 Bible Online

NUMERI 9 - Ngaju bible

NUMERI 9

¹ Intu bulan ije hong nyelo kadue limbah oloh Israel malihi Misir, TUHAN hakotak dengan Moses intu padang pasir Sinai.

²“Hong tanggal epat walas bulan toh, nampara katika matanandau belep, oloh Israel musti mahaga Paska tumon atoran je jari inukas.”

⁴Palus Moses manyoho oloh Israel mahaga Paska.

⁵Ewen mamestae intu padang pasir Sinai halemei tanggal epat walas bulan ije. Uras te ilalus ewen pas tumon je irentah TUHAN akan Moses.

⁶Tapi intu marak ewen aton pire-pire biti oloh je papa awi jari manigong hantu, mawi ie dia tau mahaga Paska andau te. Ewen tolak manaharep Moses tuntang Aron hayak hamauh,

⁷“Ikei toh papa awi jari manigong hantu. Tapi mbuhen ikei musti ingabeken sampai dia tau maluput parapah akan TUHAN hayak dengan kare paharin ikei?”

⁸Moses tombah, “Entai helo sampai aku mandino pansanan bara TUHAN.”

⁹TUHAN manyoho Moses

¹⁰mansanan akan bangsa Israel, “Amon intu marak keton atawa turonan keton aton je papa awi jari manigong hantu atawa metoh hong pangguet je kejau, ie musti kea mahaga Paska akan TUHAN.

¹¹Tapi Pesta te musti ilalus ije bulan limbah te, iete intu alem tanggal epat walas hong bulan due. Keleh mahaga andau te awim kuman tabirin Paska je dia iragi tuntang joho je bapait.

¹² Ela mampelai taloh en-en bara panginan te sampai hanjewu jewue. Ela kea mamelek aloh ije bara tulang meto je iluput akang-Ku. Haga Paska te tumon kakare atorae.

¹³Tapi oloh je dia papa tuntang dia kea huang jalanae tapi aloh kalote dia mahaga Paska, dia itong-Ku tinai kilau ije biti bara ungkup-Ku, ganan ie dia maluput parapah akang-Ku intu katika je inantu. Oloh te musti mananggong kasalae.

¹⁴Amon intu marak keton aton ije biti oloh asing je handak mahaga Paska, ie musti mahaga tumon kakare atoran tuntang taloh je inukas. Kare atoran te buah akan genep biti, aloh oloh Israel atawa oloh asing.”

¹⁵Intu andau Kemah TUHAN impendeng, palus baunandau dumah tuntang manutup kemah te. Hong katika hamalem sampai hanjewu baunandau te gitan kilau apui.

¹⁷Sining katika baunandau te mandai, oloh Israel mungkar kemah ewen palus haguet. Palus hong kueh baunandau te mohon, intu eka te kea ewen mampendeng kemah tinai.

¹⁸Hapan parentah TUHAN bangsa Israel te mungkar kemah tuntang hapan parentah TUHAN kea ewen mangkepae haluli. Katahin baunandau te aton intu hunjun Kemah TUHAN, ewen tetep melai intu eka te.

¹⁹Amon baunandau te tahi aton intu hunjun kemah te, ewen manumon kare atoran TUHAN tuntang dia haguet bara eka te.

²⁰Tapi kanateke baya pire-pire andau bewei baunandau te aton intu hunjun kemah te. Aloh kilen ampie kea, parentah TUHAN bewei je manukas en ewen melai intu ije eka atawa haguet.

²¹Kanateke baunandau te baya melai bara halemei sampai hanjewu; palus metoh baunandau te mandai hong hanjewu, ewen haguet.

²²Katahin baunandau te aton hunjun Kemah TUHAN, en te katahin due andau, ije bulan, ije nyelo atawa labih, katahin te kea ewen melai intu eka te. Amon baunandau te mandai, harue ewen haguet.

²³Ewen melai intu ije eka tuntang haguet akan eka je beken tumon parentah TUHAN je inenga TUHAN mahalau Moses.