Read Ngaju MIKHA 2 Bible Online

MIKHA 2 - Ngaju bible

MIKHA 2

¹Calaka kare oloh je marencana kapapa metoh menter intu ekae batiroh hamalem, palus malaluse hanjewu awi ewen bara kaabas akan malaluse.

²Amon ewen mipen ije tana, ewen marampase. Amon ewen mipen ije huma, ewen manduae. Awi te aloh olon atawa jawet ramo, jaton je dia ingaraen.

³Awi te TUHAN hamauh, “Aku marencana kapehe akan keton, sampai keton dia tau liwus. Hong katika je basial te keton kareh dia tau tinai mananjong dengan kajoho.

⁴Kajarian keton kareh ihapan oloh uka manyindir, tuntang ewen kareh mawi auh nyanyi tatum toh, ‘TUHAN jari marunap lewun ikei toh tuntang manenga akan oloh je manawan ikei. Ikei jari rotek samasinde.”

⁵Awi te, amon dumah katikae lewu toh ilian akan ungkup TUHAN, jaton ije bara keton kareh manarima bagie.

⁶Kare oloh mansanan peteh Hatalla akangku, tahiu kare taloh handiai te koae, “Ela mansanan peteh Hatalla te akan ikei. Ela mambarita tahiu taloh handiai te. Ikei dia kareh mahamen.

⁷Ela manyangka Israel jari inyapa TUHAN! TUHAN dia kareh malalus taloh te, Ie dia puji nihau kasabar Ayue. En dia Ie hakotak hapan kataun Aie akan oloh je malalus kahalap?”

⁸TUHAN tombah, “Keton toh je mawi ungkup-Ku sama kilau musoh. Oloh haluli bara parang dengan kaharap kareh mangkeme sanang intu humae. Padahal intu hete keton mentai haream handak marampas human ewen.

⁹Kare oloh bawi marak ungkup-Ku iharak keton bara humae je inyintae, tuntang keton marampas sampai katatahie kare berkat je inenga-Ku akan kare anak ewen.

¹⁰Lius haguet; intu hetoh dia mangat tinai. Kare dosan keton jari mampadumah calaka je babehat akan eka toh.

¹¹Keton nahuang nabi je rajin mananjaro tuntang manipu hayak manujum je keton kareh tempon anggor tuntang taloh ihop je bahari malabien karee.”

¹²TUHAN hamauh tinai, “O ungkup Israel je magon batisa! Keton batantu imumpong-Ku tuntang impahinje-Ku sama kilau tabiri je haluli akan karambange. Sama kilau padang oru je kontep dengan tabiri, kalote kea lewum je kontep dengan olon.

¹³Aku kareh mambangah jalan tuntang mimbit keton balua bara eka tawanan. Keton kareh manelak kare lawang lewu tuntang haguet dengan bebas. Aku, TUHAN kabuat, iete Rajam, tuntang Aku kareh mamimpin ikau balua.”