Read Ngaju MIKHA 3 Bible Online

MIKHA 3 - Ngaju bible

MIKHA 3

¹Keleh hining, o keton kare oloh panguasa hong Israel! Sapunae keton katawan taloh je bujur.

²Tapi keton basingi haream dengan taloh je bahalap, tuntang rajin dengan taloh je papa. Bangsa ayung-Ku ingupak keton belo-belom, tuntang irabit keton isie bara kare tulange.

³Keton kuman bangsa ayung-Ku tuntang upake imisak-minit keton belo-belom hayak kare tolange imparotek keton. Keton manasang-maraga ewen sama kilau maraga isin meto akan inamean huang balanai.

⁴Kareh dumah katikae keton mangkariak balaku dohop dengan TUHAN, tapi Ie dia maku tombah. Ie dia akan mahining lakudoan keton, awi keton jari malalus kapapa.

⁵Bangsa ayung-Ku inipu awi kare nabi je manujum taloh bahalap akan oloh je manenga duit, tapi manyingi tuntang manawah oloh je dia manenga duit. Akan kare nabi je kalote TUHAN hamauh,

⁶“O kare nabi, katikae akan keton tokep hapus; matanandau keton handak belep. Keton kareh dia tinai mandino paite je mamparahan kare rencana aing-Ku. Keton dia tau tinai manujum taloh en-en.”

⁷Kare oloh je manujum tahiu kare taloh je manjadi hong andau rahian kareh mahamen awi tujume sala. Ewen kareh dahe-dahei awi Hatalla dia tombah auh ewen.

⁸Tapi tahiu arepku toh, TUHAN jari manyoang aku hapan roh Ayue tuntang kuasae. Aku inenga kaharati tahiu kaadilan, tuntang kea kahanyi uka mansanan akan oloh Israel kare dosa je jari ilaluse.

⁹Keleh hining kare auhku toh, o keton oloh je kuasa intu Israel je basingi dengan kaadilan tuntang mobah kabujur hapan tanjaro.

¹⁰Keton mamangun Yerusalem, lewun Hatalla, hagalang pampatei tuntang kadarhaka.

¹¹Kare oloh je manguasa lewu marentah uka mandino duit suap. Kare imam majar parentah TUHAN uka mandino upah, tuntang kare nabi balaku pangarinah bara Hatalla uka mandino duit. Palus ewen uras manyangka TUHAN aton intu hila ewen. Ewen hamauh, “TUHAN aton intu bentok itah; itah dia akan buah calaka.”

¹² Awi kapapa te, Sion kareh ilukum sama kilau tana, Yerusalem kareh manjadi kilau tuyok ramon huma je baduroh, tuntang bukit Human TUHAN kareh jadi parak bahu.