Read Ngaju MIKHA 5 Bible Online

MIKHA 5 - Ngaju bible

MIKHA 5

¹TUHAN hamauh, “O Betlehem Eprata, ikau ije lewu je pangkakorike intu Yuda! Tapi bara ikau kareh lembut ije biti oloh panguasa akan Israel je tamparae bara horan.”

² Jadi, TUHAN kareh manalua ungkup Ayue inguasa awi kare musoh ewen sampai oloh bawi je inukas akan jadi indu oloh panguasa te jari manak Ie. Limbah te kare oloh sama bangsae je aton intu eka tawanan, kareh impahinje tinai dengan bangsa ewen kabuat.

³Amon oloh panguasa te dumah, Ie kareh marentah ungkup Ayue hapan kaabas tuntang kuasan Hatalla kabuat. Ungkup Ayue kareh belom sanang, awi kakare oloh hong hapus kalunen kareh mangaku kahain Aie,

⁴tuntang Ie kareh manenga kasanang. Amon raja Asur manyarang lewun itah tuntang manelak kotan itah, itah kareh mirak kare pamimpin itah je pangkaabase akan mamarang ewen. Kare pamimpin itah te kareh mampakalah Asur mahapan pakakas parang, tuntang manyalamat itah bara lengen ewen.

⁶ Oloh Israel je magon batisa kareh jadi sama kilau ambon sadingen bara TUHAN akan are bangsa, tuntang sama kilau ujan akan pambolan. Ewen kareh manempo Hatalla, tapi dia manempo olon.

⁷Oloh Israel je magon melai marak kare bangsa kareh sama kilau singa marak kare meto intu parak kayu atawa intu bentok kawan tabiri hong padang oru. Singa te tame akan bentok kawan tabiri sambil mampijak-manandik tuntang mamisak-maminit; jaton je tau maliwus kare tabiri te.

⁸Israel kareh mampakalah kare musohe hayak manasang-maraga ewen samandiai.

⁹TUHAN hamauh, “Metoh te Aku kareh mampalomos kare kuda ayum, tuntang mambinasa kare kareta parang ayum.

¹⁰Kare lewu hakota intu tanahm kareh imparusak awi-Ku, tuntang kakare kota ije dehen kareh inderep-Ku.

¹¹Kare paramon karoheim kareh imparotek-Ku tuntang kare oloh tukang manujum kareh inganang-Ku.

¹²Aku kareh mamparamok kare hampatong dewam tuntang pantare; ikau dia kareh manyembah kare pakakas tampan lengem kabuat.

¹³Kare pantar Dewi Asera intu tanahm kareh inderep awi-Ku, tuntang kare lewum ije hakota kareh impahancor awi-Ku.

¹⁴Huang kasangit-Ku je hasep Aku kareh mambaleh kapapan kakare bangsa je dia manumon auh-Ku.”