Read Ngaju MIKHA 6 Bible Online

MIKHA 6 - Ngaju bible

MIKHA 6

¹Keleh hining taloh je indawa TUHAN akan Israel. Keleh misik, o TUHAN, tuntang imbit auh dawa Aim! Keleh bukit tuntang lungkoh mahining taloh je handak insanan Awim.

²O kare bukit, o kare galang petak, hining auh dawan TUHAN! Ie aton pakara dengan Israel ungkup Ayue tuntang kareh akan mahukum ewen.

³TUHAN hamauh, “O ungkup-Ku, narai taloh je jari ilalus-Ku dengam? Huang perkara en Aku manyusah ikau? Keleh tombah auh-Ku!

⁴ Aku jari mimbit ikau balua bara Misir, tuntang maliwus ikau bara ekam jadi jipen; Aku jari manyoho Moses, Aron tuntang Miryam uka mamimpin ikau.

⁵ Ungkup-Ku ingat taloh je irencana awi Balak raja Moab dengam, tuntang taloh je inombah Bileam anak Beor akae. Ingat taloh je manjadi intu benteng jalan helat Sitim tuntang Gilgal. Amon ikau mingat taloh handiai te, ikau kareh harati taloh je jari ilalus-Ku hapa manyalamat ikau.”

⁶Narai je patut iluput itah akan TUHAN, Hatalla intu sorga, amon itah dumah handak sombayang manyembah Ie? En musti itah mimbit sapi tabela je pangkahalape akan iluput kilau parapah je ingehu Akae?

⁷En TUHAN kareh sanang amon itah maluput Akae bakoya-koyan tabiri atawa are toto undus saitun? En musti itah maluput Akae anak tambakas ain itah kilau tewus akan kare dosan itah?

⁸Dia! TUHAN jari mamparahan akan itah narai taloh je bahalap. Taloh je ilaku bara itah iete uka itah malalus kaadilan, harajur malalus gawin sinta, tuntang dengan randah atei belom hinje dengan Hatallan itah.

⁹Bahalap toto jaka oloh tau belom mikeh dengan TUHAN. Ie matehau oloh hapus lewu, “Hining, o keton je hapumpong intu lewu!

¹⁰Intu human kare oloh papa aton ramo je dinon oloh hapan tipu. Ewen mahapan takar je dia bujur, gawi je inyingi-Ku. Oloh je malalus gawi te kareh ihukum-Ku.

¹¹En patut amon Aku mampun oloh je mahapan timbangan je dia bujur?

¹²Kare oloh tatau intu humam mangapehe oloh je belom susah, tuntang keton uras pananjaro.

¹³Toh Aku nampara mamukul tuntang mambinasa ikau awi kare dosam.

¹⁴Ikau kareh kuman, tapi dia tau besoh — tetep balau haream. Ikau kareh munda kare ramo, tapi dia tau mahagae. Narai bewei je ihagam kareh akan irusak awiku hong parang.

¹⁵Ikau kareh manawor gandom, tapi dia kareh manggetem hasile. Ikau kareh mawi undus bara bua saitun, tapi dia tau mahapan unduse. Ikau kareh mahamis danum anggor, tapi dia mihope.

¹⁶ Kakare taloh te majadi awi ikau manumon kare gawi papa je iawi Raja Omri tuntang anake, iete Raja Ahab. Ikau manumon hadat ewen. Awi te Aku kareh manjera belaim, tuntang ikau kareh ihababaka hayak inawah awi kakare bangsa.”