Read Ngaju MIKHA 7 Bible Online

MIKHA 7 - Ngaju bible

MIKHA 7

¹Calaka aku! Aku sama kilau oloh balau je haguet mamutik bua limbah halau wayahe. Jaton tinai bua intu kare upoe. Bua anggor tuntang bua ara je bahala-halap uras jari lepah imutik.

²Oloh bujur ateie jari lilap bara lewu, oloh je baketep dengan Hatalla jadi jaton. Genep oloh mentai katika akan mampatei. Gagenep bitie manenan jarat akan sama arepe.

³Uras oloh apik nguan gawin kapapa. Oloh panguasa tuntang hakim balaku duit suap. Oloh hai hajajuan kanahuange, kalote ampie ewen nguan kapakat.

⁴Oloh ije pangkabujure tuntang pangkaadile bara ewen mahin sama kilau onak duhi je dia baguna. Jari sampai katikae Hatalla mahukum ungkup Ayue kilau je jari impingate akan ewen mahalau kare nabie. Toh jari lembut karidu marak ewen.

⁵Ela percaya dengan sobatm, ela harap dengan kapatuh. Bua-buah dengan kare auhm aloh je mahininge sawam kabuat.

⁶ Awi hong wayah je kalotoh oloh ije kahuma hamusoh sama arepe; anak hatue manawah bapae, anak bawi malawan indue, tuntang manantu bawi hasoal dengan empoe je bawi.

⁷Tapi itah harap dengan TUHAN; hapan kontep kapercaya itah mentai Hatallan itah. Ie kareh mahining lakudoan itah tuntang manyalamat itah.

⁸Dia aton sababe akan kare musoh itah tau hanja-hanjak tagal kakalah itah. Awi aloh itah manjato, itah kareh hingkat tinai. Toh itah aton huang kakaput, tapi TUHAN kareh mampalawa itah.

⁹Itah jari badosa intu taharep TUHAN, awi te itah metoh toh patut mangkeme kasangit Ayue. Dia tahi tinai Ie kareh mawat itah tuntang manenga kaadilan akan itah. Ie kareh mimbit itah balua akan kalawa; itah kareh mangkeme kabuat je Ie manyalamat itah.

¹⁰Bihin musoh manawah itah hapan auh, “Kueh TUHAN, Hatallam te?” Tapi toh ewen kareh mite taloh je ilalus TUHAN akan itah, tuntang ewen kareh mahamen. Itah kareh manampayah kare musoh itah impakalah tuntang ihunje-nandik sama kilau petak kisak intu karatak.

¹¹O Yerusalem! Jari sampai katikae ikau mamangun haluli kare dinding lewun keton. Hong andau te petak danum keton kareh impalombah.

¹²Kare oloh ayum kareh haluli talih ikau bara hete-hete, bara Asur hila timor, bara Misir intu hila salatan, bara batang danum Euprat, bara dipah tasik tuntang bara kare bukit je kejau.

¹³Tapi kareh kalunen palus jadi padang tunis benyem tagal kapapan gawin oloh are je melai hete.

¹⁴O TUHAN, keleh manyakatik ungkup Ayum, ungkup je iintih Awim. Ewen melai kejau intu parak kayu, intu bentok petak je bahalap. Nauhe ewen mandino panginae hong padang oru Basan tuntang hong Gilead sama kilau jaman horan.

¹⁵Keleh mawi taloh heran akan ikei, o TUHAN, sama kilau je ilalus Awim horan katika ikau mimbit ikei bara Misir.

¹⁶Kare bangsa kareh mite taloh te tuntang mahamen awi katawan je kare kaabas ewen jaton rimae. Ewen kareh dia olih bapikir sampai dia tau hakotak atawa mahining.

¹⁷Ewen kareh manggayar intu petak kilau handipe. Hayak kagenjeh awi kikehe ewen kareh balua bara kota ain ewen, palus manalih Ikau, o TUHAN, Hatallan ikei.

¹⁸Jaton Hatalla sama kilau Ikau, o TUHAN, je mampun dosan ungkup paintih Aim je batisa. Dia sampai katatahie Ikau sangit; tapi Ikau sanang mamparahan sintan Aim je jaton bara tikas te.

¹⁹Ikau kareh masi tinai dengan ikei tuntang mampun ikei. Kare dosan ikei kareh impijak tuntang inakir Awim akan penda tasik!

²⁰Akan ungkup Ayum turonan Abraham tuntang Yakob, Ikau kareh mamparahan kakatep Aim tuntang sintan Aim je jaton bara tikas te kilau je injanji Awim dengan tato hiang ikei horan.