Read Ngaju NAHUM 1 Bible Online

NAHUM 1 - Ngaju bible

NAHUM 1

¹ Jetoh peteh Hatalla tahiu Niniwe. Peteh te imparahan dengan paite je inenga akan Nahum, ije biti nabi bara Elkos.

²TUHAN Hatalla dia maku aton saingan Akae oloh je malawan Ie batantu mandino hukuman. Hapan kasangit ije paham Ie mamaleh gawin ewen.

³Sapunae TUHAN dia purah sangit; tapi Ie kea paham kuasan Aie sampai ewen je mawi kasalan dia Ie mempase bara hukum. Hong kueh TUHAN mananjong, intu hete lembut riwut barat; eka paie bahunje, hete kawo jadi baun andau.

⁴Ie malait tasik balalu mampateahe, kakare sungei impalepah danume. Bukit Karmel tuntang kare janah intu Basan uras keang, tuntang kare kambang intu Libanon palus balayu.

⁵Kare bukit hagenjeh intu taharep Ie; tuntang bukit mahin lenyoh urase. Amon TUHAN mamala, petak hagerek, kalunen tuntang kakare oloh huange hagenjeh.

⁶Eweh tau tahan amon TUHAN rahas? Jaton ije je tau liwus bara kasingit Aie. Ie manusoh kasangit Aie je hasep, batu lenyoh tuntang jadi kawo intu taharep Ie.

⁷TUHAN te bahalap, Ie mangalindong ungkup Ayue metoh ewen susah. Ie manjaga oloh je bakalindong intu Ie.

⁸Sama kilau danum soho hai je manepe, Ie mamparotek kare musoh Ayue.[1] Ewen je bahanyi malawan ie intakan Awie hapan pampatei sampai binasa.

⁹Rencana en bewei je iawim malawanTUHAN, batantu kareh jaton hasile. Ie dia akan mambaleh[2] sampai due kali taharep musoh Ayue.[3]

¹⁰Ikau kareh imapui sama kilau tampilai je keang kilau onak duhi je sangkahut.[4]

¹¹Bara ikau, o Niniwe, lembut ije biti je kontep dengan tirok papa. Ie mawi rencana akan malawan TUHAN.

¹²Palus koan TUHAN dengan Israel, ungkup Ayue, “Aloh kare oloh Asur te abas tuntang are bitie, tapi ewen kareh impakalah palus lilap. O bangsa aing-Ku, aku jari mangapehe ikau, tapi aku dia kareh malalus te tinai.

¹³Toh Aku akan mampaterai kuasan Asur je mawi ikau, tuntang inggeto-Ku rantai je mamasong ikau.”

¹⁴Jetoh tukas ain TUHAN tahiu bangsa Asur, “Ewen jaton turonae je akan manuntong pambelom bangsae. Kare hampatong dewa je aton intu kare human dewae, kareh imparotek-Ku. Kubur akan bangsa Asur kanjerang-Ku manatape, awi ewen dia patut belom.”

¹⁵ Item, ije biti sarohan dumah mahalau kare bukit, mimbit barita kamanang. O bangsa Yuda, haga andau hai ayum tuntang bayar janjim akan Hatalla. Lewum dia tinai irentah awi oloh papa. Ewen jari imparamok samasinde.