Read Ngaju NAHUM 2 Bible Online

NAHUM 2 - Ngaju bible

NAHUM 2

¹O Niniwe, keleh mahining! Je nahuang marusak ikau jari dumah! Jaga kare kotam! Ite-ite karatak! Keleh batatap akan parang. (

²Toto TUHAN kareh mahalalian kahain Israel, uka jadi sama kilau horan, helo bara ie irampok awi kare musohe.)

³Talawang musoh bahandang, tuntang pakaiae bahandang sama kilau daha. Musoh jari tatap mimpa. Sama kilau apui, sanaman karetae mangilat. Kakare kudae[5] uras balias.

⁴Intu karatak, kare karetae miar laju. Intu alun-alun, ewen te hagagoang. Ampie kilau colok je ganda-gandang, salanja balias kilau kilat.

⁵Kare tantara je bahanyi inyoho maju; ewen hadari longkang-lihang katika manyarang.[6] Kaje-kajeng ewen manintu dinding kota, pakakas hapan manelak impendeng bajeleng.

⁶Kare tabat sungei jari batelak, palus hapus istana ridu!

⁷Ratu olih inyingkap, kare dayange manarahing tuntang manangis, ewen manarahing sama kilau burong dara, tuntang menega-negah usuke awi kapehen atei.

⁸Rayat Niniwe hadari kasaburan, sama kilau danum je balua bara tabat je batelak.[7] Aton auh oloh mangkariak, “Tende, tende!” Tapi jaton je maku haluli.

⁹Rampas urase amas tuntang perak ayue! Panatau lewu hai toh are toto!

¹⁰Niniwe jari hancor, benyem tuntang keang. Atei jadi batawah awi mikeh. Utut balemo tuntang hagenjeh, baun oloh samandiaie jadi kalas mucat.

¹¹Kueh lewu te metoh toh? Lewu je kilau guha eka singa manyarangan? Eka kare anak singa impakanan, eka je inalih singa hatue tuntang bawi, eka je aman akan kare anake?

¹²Bihin intu hete singa manangkarap meto akan kinae, tuntang mamisake akan singa bawie tuntang anake. Ie mangontep sarangae dengan bisak isie dinoe mimpa.

¹³“Aku toh musohm,” koan TUHAN Je Jaton Tikas Kuasae. “Kare kareta ayum kareh ingehu-Ku lepah. Tantara ayum kareh matei huang parang, tuntang Aku kareh manduan lepa-lepah kakare taloh je jari induam bara oloh beken. Palakun kare saroham jaton tarahining tinai.”