Read Ngaju NAHUM 3 Bible Online

NAHUM 3 - Ngaju bible

NAHUM 3

¹Calaka lewu toh je kontep dengan tanjaro tuntang pampatei; kontep ramo je irabut atawa irampok.

²Hining auh letap tali cambuk tuntang gohop roda, darin kuda tuntang garatik kareta.

³Kawan tantara je manongkang kuda manyarang hayak dengan kahanyie, padang mamancar tuntang lunju mangilat. Oloh je matei dia taraise, hantun ewen batuyok, sampai oloh je mananjong tantarang hantu.

⁴Niniwe lontei te metohe kana hukum. Kahalape puna mampahengan. Are bangsa jadi impalemoe, tuntang ingataue[8] dengan kamanis auhe.

⁵TUHAN Je Jaton Tikas Kuasae hamauh, “O Niniwe, ikau kareh ingapehe-Ku! Tapihm intapei-Ku intu taharep kare bangsa, sampai kahawem gitan ewen.

⁶Ikau iawi-Ku sama kilau taloh je injilek, ikau imedak-Ku hapan tai; ikau iawi-Ku akan indu tampayah.

⁷Je mite ikau kareh mangejau arepe tuntang hamauh, ‘Niniwe te batisa duroh derepe bewei! Eweh omba kapehe atei dengae? Jaton je nahuang mampong ie.’ ”

⁸O Niniwe, en ikau labih bahalap bara Tebe, eka raja Misir marentah? Tebe kea aton intu saran sungei je mangalindonge sama kilau dinding. Toto, sungei Nil te kota ekae bakalindong.

⁹Tebe marentah Sudan tuntang Misir, tuntang kuasae jaton bara tikas; Libia tuntang Put iete bangsa je manjadi pakate.

¹⁰Aloh kalote oloh Tebe imbit tuntang iunda akan eka tawanan. Intu genep simpang jalan kare anake imukul sampai matei. Kare oloh hai ayue imasong hapan rantai tuntang imbagi-bilah marak kare oloh je manawae.

¹¹O Niniwe, ikau kea kareh tujah awi babusau. Ikau kea kareh mancoba maliwus arepm bara kare musohm.

¹²Kare kotam kareh sama kilau batang sikon je kontep bua masak. Amon batange te iongge, kare buae te manjato akan nyaman oloh je nahuang kumae.

¹³Kare tantaram balemo sama kilau oloh bawi tuntang lewum samasinde dia olih manaharep musoh. Apui kareh mangehu kare huit lawangm.

¹⁴Asip wei danum akan iingkes katahin ikau ingapong, tuntang keleh mandehen kare kotam! Hunje-hunjeng petak kisak hapa manampa kare batu bata tuntang manatap kare lambagae!

¹⁵En bewei je iawim, kareh hayang bewei, awi ikau batantu kareh lepah bakehu atawa matei huang eka parang. Ikau kareh lingis sama kilau hasil tana je lepah kinan sangkalap. Ikau jari manak-manaka kilau sangkalap!

¹⁶Kare sudagar ayum labih are bara kare bintang intu langit! Tapi toh ewen lilap, sama kilau sangkalap je mambirang palapase palus tarawang lilap.

¹⁷Kare oloh hai tuntang kare oloh ayum je marentah sama kilau kawan sangkalap je bakalindong intu kare dinding metoh wayah sadingen. Tapi limbah matanandau lembut, ewen tarawang balalu lilap; jaton oloh je katawan akan kueh tintun ewen.

¹⁸O raja lewu Asur! Kare gubernur ayum jari matei, tuntang kare bupatim tapatiroh katatahie. Rayatm pisah darai intu kare bukit, tuntang jaton oloh je tau mimbit ewen haluli.

¹⁹Himangm dia tau impakeleh. Uras oloh je mahining karusakm manapok lokape hanjak. Awi uras oloh jari buah kapehe tagal kapapam je dia lepa-lepah te.