Read Ngaju HABAKUK 1 Bible Online

HABAKUK 1 - Ngaju bible

HABAKUK 1

¹Jetoh peteh je insanan awi TUHAN akan Nabi Habakuk.

²O TUHAN sampai hamprea aku magon mantehau balaku awat? Hamprea Ikau kareh mahining tuntang manyalamat ikei bara kahajipen?

³Mbuhen Ikau manalua aku mite kapapa kalote karee? Lalehan kaolih Ikau mite kalote kare gawi malanggar? Hong hete-hete aton kahancor tuntang kakaras, kalahi tuntang kapaut kabantah.

⁴Kare atoran inawah tuntang kaadilan dia puji indehen. Oloh papa manang hunjun oloh bujur, palus kaadilan iobah jadi kasalan.

⁵ Limbah te TUHAN hamauh dengan ungkup Ayue, “Item kare bangsa hakalilingm, palus ikau kareh hengan. Awi intu pangereng ayum Aku kareh malalus taloh je dia ikau percaya amon baya inyarita akam.

⁶ Bangsa Babel je karas te kareh iawi-Ku jadi bangsa je kuasa. Ewen babaris balua bara lewue tuntang mangumbang hapus kalunen uka mampakalah kare bangsa beken.

⁷Hong hete-hete ewen mampalembut kikeh; dengan kajohoe ewen dia mahapan kakare atoran, kacuali je hakabuah dengan kahandak ewen.

⁸Kudae labih balias bara haramaung, tuntang labih basiak bara sarigala je matoh balau. Tantara je manongkang kuda dumah bara kare lewu kejau; ewen dumah kilau burong antang je manyambar taloh kinae.

⁹Tantarae manyarang tuntang mawi kakaras. Uras oloh hagenjeh mite panumah ewen.[1] Oloh je inawan ewen dia taraise karee.

¹⁰Ewen mahalalea kare raja tuntang manatawe kare pagawai gantong. Inawahe genep kota, tuntang inuyoke petak jalae mandai palus irabute kota te.

¹¹Kare oloh je manara kaabase kabuat te balalu pijir darie haguet.”

¹²TUHAN, bara horan Ikau puna Hatalla. Ikau Hatallangku je barasih tuntang katatahie.[2] TUHAN, Hatallangku tuntang eka kalindongku, bangsa Babel te intih Awim tuntang impamenteng Awim uka mahukum ikei.

¹³Tapi kilen ampie Ikau tau tahan mite oloh papa je karas te? En dia Ikau tangkalau barasih mite kapapa? En dia Ikau bajilek mite katulas? Jadi, mbuhen Ikau manyuni arepm metoh oloh je bujur imbinasa awi oloh darhaka?

¹⁴Mbuhen olon iitong Awim kilau lauk hong tasik? Tuntang kilau bitik je jaton pamimpie?

¹⁵Bangsa Babel manawan oloh mahapan pisi, kilau jaka ewen te lauk. Kare oloh te iihir huang kare lunta tuntang bangsa Babel hanja-hanjak dengan hasil ewen.

¹⁶Limbah te lunta te inyembah tuntang iluput ewen parapah akae, awi dengan lunta te ewen mandino rajaki je malabien palus manjadi sanang.

¹⁷Lalehan kea sampai ewen kareh harajur manyilak padange tuntang mampatei kare bangsa, jaton bara kamasie?