Read Ngaju HABAKUK 2 Bible Online

HABAKUK 2 - Ngaju bible

HABAKUK 2

¹Aku handak mandai akan candi jajaga, tuntang mentai narai taloh je handak insanan TUHAN akangku, hayak kilen auh panombah Ayue akan kakotokku.

²TUHAN manombah auhku kalotoh, “Pahat tara-tarang intu bintap petak liat, taloh je insanang-Ku akam, uka tau purah imbasa.

³ Nyurat jete, awi metoh toh hindai katikae. Tapi katikae te bagulong dumah, tuntang taloh je insanang-Ku akam batantu manjadi. Aloh ampie magon tahi, tapi entai ih! Katika te batantu dumah tuntang dia landar tinai.

⁴ Tuntang ingat: Oloh je papa dia akan salamat,[3] tapi oloh je malalus kahandak Hatalla kareh belom awi katetepe dengan Hatalla.”

⁵Panatau [4] te harajur manipu oloh. Oloh je bakoho te bajoho tuntang balisah. Kilau pampatei, ie kea mahin dia puji ombet angat huange; mije-mije bangsa oloh irentahe.

⁶Tapi kakare bangsa oloh je impakalah ie te kareh manyindir tuntang mahalalea ie. Ewen kareh hamauh, “Tarasapa ikau awi manuyok ramo je dia ayum! Pire katahie tinai ikau mampatatau arepm awim mamaksa kare oloh je butang dengam uka mambayar utang ewen?”

⁷Tapi dia ingatawan, ikau je jari mampakalah oloh beken, kareh butang kea tuntang imakasa mambayar anak duit. Kare musohm kareh dumah tuntang mampikeh ikau. Ewen kareh marampok ramom!

⁸Ikau jari marampok are bangsa, tapi kare bangsa je olih liwus kareh marampok ikau, tagal pampatei je iawim, tuntang tagal kare kakaras gawim dengan kare petak danum, kare lewu tuntang dengan kare oloh ije melai huange.[5]

⁹Tarasapa ikau! Ikau mampatatau keluargam dengan ontong je dinom hapan kakaras, mangat humam kabuat dia calaka tuntang liwus bara kasusah tuntang kajake.

¹⁰Tapi rencanam te baya mampahawen keluargam. Ganan mambigal are bangsa, ikau mamparugi arepm kabuat.

¹¹Tinai kare batu intu dinding manyapa ikau, tuntang kare jihin huma mambarita auh te.

¹²Tarasapa ikau! Ikau mampendeng lewu hunjun kapapa tuntang mamangue dengan pampatei.

¹³Kare bangsa je impakalahm heka-heka jaton gunae, tuntang uras taloh je imangun ewen lingis kinan apui. Urase taloh te kanahuang TUHAN Je Jaton Tikas Kuasae.

¹⁴ Tapi kilau tasik ingontep awi danum, kalote kea kalunen kareh ingontep dengan pangatawan tahiu TUHAN tuntang kuasan Ayue.

¹⁵Tarasapa ikau! Ikau manawah tuntang mampahawen kare sobatm; ikau mawi ewen ruyong-rayang kilau oloh babusau.

¹⁶Toh sampai katikae ikau akan impahawen, tuntang dia akan ihormat. Hormatm kareh hobah jadi kajilek. TUHAN kareh mamaksa ikau mihop bara sangkir je basuang hukuman akam. Ikau kareh mihop tuntang ruyong-rayang.

¹⁷Ikau je maneweng kare batang kayu intu parak kayu Libanon, tuntang toh ikau kabuat je kareh ineweng. Ikau mampatei kare metoe, tuntang toh kare meto mampikeh ikau. Uras taloh te manjadi awi kakaras tuntang pampatei je jari ilalusm dengan kare tanah, kare lewu tuntang oloh ije melai huange.[6]

¹⁸Tarasapa ikau! Ikau hakotak dengan ije katetek kayu, “Misik!” atawa akan ije kabutup batu hai, “Harikas!” En tau hampatong mansanan taloh en-en akam? Aloh hampatong te balapis amas atawa perak, tapi tahaseng jaton intu ie. Narai gunae hampatong dewa? Jete baya tampan olon bewei. Je dinom bara ie baya tanjaro. Hayang bewei kapercayan oloh je manampae dengan tampan lengee, ije dia tau hakotak te.

²⁰TUHAN aton intu huang Human Ayue je barasih; keleh oloh samandiai hong hunjun petak suni intu taharep Aie.