Read Ngaju SEPANYA 1 Bible Online

SEPANYA 1 - Ngaju bible

SEPANYA 1

¹ Sepanya te anak Kusi. Jerehe bara penda akan hunjun iete Kusi, Gedalya, Amasia tuntang Raja Hiskia. Toh auh peteh TUHAN akan Sepanya kahum Raja Yosia anak Amon marentah intu Yuda.

²TUHAN hamauh, “Aku kareh mampalomat taloh samandiai hong kalunen: uras olon tuntang meto,

³tamput burong tuntang lauk. Oloh papa kareh impatei-Ku. Uras olon kareh imbinasa awi-Ku,[1] jaton ije je inalua-Ku belom. Aku, TUHAN jari hakotak.

⁴Aku kareh mahukum lepah oloh lewu Yerusalem tuntang hapus oloh Yuda. Ampin kare tisan gawi je magon ihapan manyembah Baal kareh inganang-Ku bara kare eka te. Kare imam je bagawi akan Baal kareh ingalapeang-Ku samasinde.

⁵Aku kareh mampalomat eweh bewei je mandai akan hunjun sapau handak manyembah matanandau, bulan tuntang kare bintang. Kareh impalomosku kea ewen je manyembah Aku tuntang sumpah beketep dengang-Ku, tapi kea basumpah tagal aran Dewa Milkom.

⁶Aku kareh mambinasa ewen je dia manalih Aku atawa balaku tirok dengang-Ku tuntang je jari malihi Aku tuntang dia nahuang tinai manuntut Aku.”

⁷Andau TUHAN jari tokep, hong andau te Hatalla kareh mawi; awi te suni ih intu taharep Ie. TUHAN kanjerae tata-tatap handak manyambalih ungkup Ayue sama kilau parapah tuntang Ie jari marawei kare musoh Yuda.

⁸“Hong andau sambalih te,” koan TUHAN, “Aku kareh mahukum kare oloh hai, kare anak hatue ain raja tuntang uras oloh je mahapan jalan hadat oloh beken.

⁹Aku kareh mahukum kakare oloh je sombayang sama kilau oloh je dia kasene Aku, tuntang je manakau hayak mampatei uka mangontep human tempoe[2] dengan kare ramo rampasan.”

¹⁰“Andau te,” kalote koan TUHAN, “Kareh tarahining auh tangis intu Bauntonggang eka oloh palauk. Auh tatum kareh tarahining bara eka kare lewu taheta, tuntang auh kaduroh-derep hai hatugoh bara kare bukit.

¹¹Keleh manatum tuntang manangis metoh keton mahining taloh te, o oloh lewu hila penda, awi uras oloh dagang tuntang oloh je manjahaman duit jari buah patei!

¹²Metoh te Aku kareh manduan sumbo, tuntang mariksa lewu Yerusalem. Aku kareh mahukum kare oloh lewue je dia paduli taloh te tuntang je sanang dengan arepe kabuat, tuntang je manirok je Aku, TUHAN dia puji mawi kalotoh atawa kalote.

¹³Ramon ewen kareh induan tuntang kare human ewen kareh imparotek. Ewen kareh mamangun huma tapi dia ewen melaie. Ewen kareh mawi kabon anggor, tapi dia mihop anggore.”

¹⁴Andau TUHAN mahakim jari tokep, je kareh dumah bajeleng. Andau te kontep kapehe, sampai kare tantara je pangka mentenge mahin[3] manambawai awi bageto kaharape!

¹⁵Andau te andau kalait, kasusah tuntang kajake, andau karusak tuntang kabinasa, andau kakaput tuntang kaderem.

¹⁶Katahin andau te tarahining auh tarompet tuntang lahap parang bara kare oloh je manyarang kare lewu je hakota tuntang kare candi je gantong.

¹⁷TUHAN hamauh, “Aku kareh mawi are calaka akan oloh kalunen, sampai ewen kareh gaya-gayap sama kilau oloh babute. Ewen jari badosa dengang-Ku, tuntang toh dahan ewen kareh batusoh sama kilau danum, tuntang kare hantun ewen kareh maram hunjun petak.”

¹⁸Hong andau kikeh te TUHAN kareh mamparahan kasangit Aie, palus kare amas tuntang perak ewen dia olih manyalamat ewen. Hapus kalunen kareh rotek-ramok ingehu awi apui kasangit Aie. Salenga ih kareh Ie manggeto kare tahaseng hong kalunen toh.