Read Ngaju SEPANYA 3 Bible Online

SEPANYA 3 - Ngaju bible

SEPANYA 3

¹Tarasapa Yerusalem, lewu papa je rajin marisang malawan TUHAN tuntang je mangapehe oloh lewue kabuat!

²Calaka Lewi je dia maku manarima pampingat TUHAN, tuntang dia kea paduli kare tingak Aie, je dia manyarah pambelome akan TUHAN, tuntang dia balaku dohop intu Ie!

³Kare oloh hai intu lewu te kilau singa je manyakungkong. Kare hakime sama kilau sarigala meher balau; ewen paham basulok sampai ije tolang mahin jaton je inisa akan andau jewue.

⁴Kare nabi dia aton mangkeme tanggongae tuntang dia tau imercaya; kare imam mamapa taloh je tantai inyarah akan TUHAN tuntang manambalik kare parentah Hatalla hapa mampaontong arep ewen kabuat.

⁵Tapi TUHAN magon aton intu lewu te; Ie harajur malalus je buah tuntang dia puji je sala. Genep hanjewu batantu Ie manenga kaadilan akan ungkup Ayue. Tapi oloh je dia kasene kadilan intu kota te tetep mawi kapapa tuntang jaton pangkemee je mahamen.

⁶TUHAN hamauh, “Aku jari manganan are bangsa; kare lewun ewen imparotek awi-Ku, tuntang kare dinding dengan kare candin ewen iawi-Ku sampai batisa tunggule. Kare lewun ewen suni jaton oloe, tuntang kare karatake benyem.

⁷Tirok-Ku, ‘Toh batantu ungkup-Ku mahormat Aku tuntang manumon kare tingak-Ku. Batantu ewen mingat[5] auh ajar-Ku je inenga-Ku akan ewen. Tapi ampie ewen labih paham tinai mawi kapapa bara je jadi-jadi.

⁸Tapi ingat! Entai ih andaue Aku dumah kilau pandawa. Awi Aku jari manukas akan mamumpong kare bangsa tuntang kare karajaan uka manusoh kalait-Ku akan ewen. Hapus kalunen kareh lepah kinan apui kalait-Ku.

⁹Tapi limbah te Aku kareh mobah atei kare bangsa te, sampai ewen balakudoa manintu Aku bewei, tuntang dia manintu kare hatalla beken. Kare bangsa te kareh uras manumon auh-Ku.

¹⁰Aloh bara Sudan je kejau, ungkup-Ku je pisah darai te akan dumah tuntang maluput parapah akang-Ku.

¹¹Metoh te, o ungkup-Ku, keton dia usah mahamen tinai tagal kadarhakan keton malawan Aku. Aku kareh maharak gagenep oloh je bajoho tuntang balecak, tuntang keton dia mampajoho arep keton tinai dengang-Ku intu bukit-Ku je barasih.[6]

¹²Intu hete Aku manalua ije bangsa je randah atei tuntang je maandal pandohop aing-Ku mangat melai manetep hete. Ewen tau melai intu hete.

¹³ Oloh Israel je magon batisa, dia akan mawi kapapa tinai aloh akan eweh bewei. Ewen dia akan mananjaro tinai tuntang dia kea manipu. Ewen kareh belom mangat tuntang sanang, tuntang dia mikeh dengan eweh bewei.”

¹⁴O Israel, keleh basasurak tuntang manyanyi! O Yerusalem keleh hanjak dengan salepah atei!

¹⁵Awi TUHAN terai mahukum ikau; Ie jari maharak kare musohm. Ikau ingalindong awi raja Israel, TUHAN ayum kabuat. Toh ikau dia usah mikeh tinai.

¹⁶Kareh sampai katikae kare oloh akan hamauh, “O Yerusalem, ela mikeh tuntang batawah atei.

¹⁷Ikau ingalindong awi TUHAN, Hatalla je menteng. Ikau manang awi kuasan Aie. TUHAN hanjak rantang tagal ikau, huang sintan Aie Ie manenga akam pambelom taheta.

¹⁸Tagal ikau Ie manyanyi hanjak sama kilau oloh hong pesta.” Koan TUHAN, “Calaka je maancam ikau inganang-Ku. Kahina aim jari impanihau-Ku.[7]

¹⁹Katikae kareh dumah oloh je mawi ikau imparotek-Ku, tuntang oloh batimpang inyalamat-Ku; uras oloh tawanan ingagalang-Ku buli. Kahina ewen iobahku jadi hormat; hong kueh bewei, hong hapus kalunen haream, ewen kareh impahai tuntang inara.

²⁰Katikae kareh dumah, oloh ayum je kasaburan ingagalang-Ku buli. Ikau injadiang-Ku basewut hong hapus kalunen, tuntang kamangatm kareh ihalaliangku tinai.” TUHAN jari hakotak.