Read Ngaju HAGAI 1 Bible Online

HAGAI 1 - Ngaju bible

HAGAI 1

¹ Hong nyelo kaduee kahum Raja Darius marentah intu Persia, hong tanggal ije bulan kajahawen, TUHAN hakotak hajamban Nabi Hagai. Peteh TUHAN te inintu akan Serubabel anak Sealtiel, gubernur Yuda, tuntang akan imam hai Yosua anak Yosadak.

²TUHAN Je Jaton Tikas Kuasae hamauh dengan Hagai, “Bangsa toh hamauh je hindai katikae uka mamangun haluli Humang-Ku.”

³Limbah te hajamban Nabi Hagai TUHAN hamauh dengan ungkup Ayue,

⁴“O ungkup-Ku, en jari sampai katikae akan keton melai huang huma je dehen tuntang segah, tapi Humang-Ku magon kilau taloh je baduroh baderep?

⁵Coba ite ampim!

⁶Keton jari manawor are binyi, tapi getem keton isut. Keton aton panginan, tapi dia sukup akan mambesoh kanaim. Keton aton anggor, tapi dia sukup akan manyanang ateim. Keton aton pakaian, tapi dia sukup akan mangalasut bitim. Tuntang upah je inarima panggawi dia sukup akan manontong pambelom ewen.

⁷En dia keton kasene, mbuhen taloh te manjadi?

⁸Toh, lius mandai kare bukit akan manduan kayu, palus pendeng Humang-Ku; palus Aku kareh sanang tuntang inyembah tinai tumon kapatute. Coba, ite ampin keton!

⁹Keton maharap hasil getem je are, salenga je dinon keton baya isut toto; keton mimbite buli, tapi hasil getem keton te ihimongku sampai lepah iimbit riwut.[1] Mbuhen Aku malalus taloh te? Panombahe iete: Awi Humang-Ku magon kilau tunggul rebok, padahal keton uras rajin mamangun human keton kabuat-kabuat.

¹⁰Jete bukue ujan dia kea dumah sampai jaton taloh imbul je tau belom.

¹¹Aku jari mampakeang kare petak tuntang kare bukit, akan kare tana gandom tuntang kare kabon anggor hayak kare kabon saitun, tuntang akan kakare taloh imbul hong petak toh, kalote kea akan olon tuntang meto hayak taloh samandiai je iawi keton.”

¹²Limbah te Serubabel tuntang Yosua hayak hapus ungkup Israel je jari buli bara eka tawanan[2] intu Babel, manumon kare auh Hagai, sarohan TUHAN te. Ewen malalus taloh je irentah TUHAN dengan ewen, awi ewen mikeh dengan TUHAN.

¹³Palus Hagai manyampai akan rayat peteh TUHAN je TUHAN jari hajanji kareh mangalindong ewen.

¹⁴Tumon te TUHAN manggerek atei gubernur Serubabel, Imam Hai Yosua hayak kakare oloh je jari haluli bara eka tawanan, uka ewen uras bagawi mamangun Human TUHAN Je Jaton Tikas Kuasae, Hatallan ewen.

¹⁵Ewen manampara bagawi hong tanggal due puluh epat, bulan kajahawen nyelo kaduee kahum Raja Darius marentah.