Read Ngaju HAGAI 2 Bible Online

HAGAI 2 - Ngaju bible

HAGAI 2

¹Hong tanggal due puluh ije, bulan uju intu nyelo te kea, TUHAN hakotak tinai mahalau Nabi Hagai.

²TUHAN manyoho Hagai hakotak dengan gubernur Serubabel, Imam Hai Yosua, tuntang dengan rayat uka manyampai peteh toh,

³ “En aton marak keton je magon mingat kapaham kahalap Humang-Ku toh bihin? Metoh toh kilen ampie manumon koan keton? En dia paham karusake?

⁴Tapi, ela korik atei, o keton samandiai! Nontong gawi te, awi Aku kareh tetep mandohop keton.

⁵ Metoh keton balua bara Misir, Aku jari hajanji uka harajur mampahayak keton. Tuntang toh, Aku magon mangalindong keton. Awi te, dia perlu keton gaer.

⁶ Hong katika je dia tahi tinai Aku kareh mongge langit tuntang petak, tasik tuntang hunjun petak.

⁷Kakare bangsa kareh inareweng-Ku tuntang panatau ewen kareh iunda akan hetoh, sampai Humang-Ku kareh kontep dengan panatau ewen.

⁸Uras amas tuntang perak intu kalunen toh jete ayung-Ku.

⁹Humang-Ku je taheta kareh labih bahalap bara je helo, tuntang hong hetoh Aku kareh manenga kasanang tuntang kamangat akan bangsa ayung-Ku.” TUHAN Je Jaton Tikas Kuasae jari hakotak.

¹⁰Hong tanggal due puluh epat bulan jalatien intu nyelo kaduee kahum Raja Darius marentah, TUHAN Je Jaton Tikas Kuasae hakotak tinai dengan Nabi Hagai:

¹¹Koae, “Laku katukas auh bara kare imam tahiu taloh toh:

¹²Paribasae aton oloh je manduan ije kasayat isin meto bara parapah je iluput akan TUHAN, palus imbite buli huang lipet jubahe, tuntang limbah te dengan jubahe te ie manigong rote atawa taloh pakasak, atawa anggor, atawa undus saitun, atawa panginan en bewei; en urase te kareh jadi barasih kea?” Katika Hagai misek te, kare imam tombah, “Dia.”

¹³ Limbah te Hagai misek tinai, “Amon aton oloh je papa awi ie manigong hantu, limbah te ie manigong panginan en panginan te papa kea?” Kare imam tombah, “Yoh, batantu bewei!”

¹⁴Limbah te Hagai hamauh tinai, “TUHAN hamauh je atoran te buah kea akan ungkup Israel hong lewu toh tuntang akan taloh samandiai je ihasil ewen. Jadi, taloh je iluput ewen intu mesbeh toh jete papa.”

¹⁵TUHAN hamauh, “Nantuani taloh je manjadi helo bara andau toh, iete helo bara Humang-Ku toh ingambuah! Kilen ampin keton metoh te?

¹⁶Keton jari haguet manampayah tuyok gandom tuntang manyangka kareh mandino 200 kilogram gandom, tapi ampie baya aton 100 kilogram. Keton haguet uka mangaut 100 liter anggor bara tong anggor, tapi je aton baya 40 liter.

¹⁷Aku jari mawi riwut balasut tuntang ujan batu uka marusak hasil taloh imbul, tapi keton dia maku kea haluli omba Aku.

¹⁸Hong andau te, tanggal due puluh jalatien, galang Humang-Ku jari iandak! Nantuani narai je kareh manjadi nampara bara metoh toh.

¹⁹Aloh jaton tinai gandom je batisa, tuntang batang anggor, batang sikon, batang dalima tuntang batang saitun hindai mamua, tapi nampara bara toh Aku kareh mamberkat keton!”

²⁰Hong andau te kea, iete tanggal due puluh epat bulan jalatien, TUHAN manenga peteh akan Hagai,

²¹uka inyampai akan gubernur Serubabel. Koan TUHAN, “Dia tahi tinai langit tuntang petak kareh iongge-Ku.

²²Kare karajaan inderep-Ku tuntang kuasan ewen impalenyoh-Ku. Kare kareta parang dengan oloh je manongkange kareh inambalik-Ku; uras kuda kareh matei tuntang kare oloh je manongkange kareh hapatei sama arepe.

²³Hong andau te, ikau Serubabel, rewar-Ku, kareh inggatang-Ku marentah hapan arang-Ku. Awi ikau je jari iintih-Ku.” TUHAN Je Jaton Tikas Kuasae jari hakotak.