Read Ngaju SAKHARIA 1 Bible Online

SAKHARIA 1 - Ngaju bible

SAKHARIA 1

¹ Hong bulan kahanya intu nyelo kaduee Raja Darius marentah intu Persia, TUHAN manyampai peteh toh akangku, Nabi Sakharia anak Barekhya tuntang eson Ido.

²TUHAN marentah aku uka hakotak kalotoh akan ungkup Ayue, “Intu jaman je halau, Aku, TUHAN Je Jaton Tikas Kuasae, sangit toto dengan tato hiangm.

³Tapi toh Aku hamauh dengan keton: Keleh mules haluli talih Aku, palus Aku kea kareh haluli manarima keton.

⁴Ela sama kilau tato hiang keton. Horan kare nabi manyampai peteh-Ku akan ewen uka ewen ela tinai malalus kapapa tuntang mawi dosa. Tapi ewen dia paduli tuntang dia maku manumon auh-Ku.

⁵Kueh kare tato hiang keton tuntang kare nabi te metoh toh? Ewen jari jaton.

⁶Mahalau kare nabi, rewar-Ku te, Aku manyampai kare parentah tuntang pampingat akan tato keton. Tapi ewen dia padulie sampai ewen musti mananggong kajariae iete hukuman. Palus ewen manyasal tuntang mangaku je Aku, TUHAN Je Jaton Tikas Kuasae, jari mahukum ewen tumon kasalan ewen, tuntang hasaroroi dengan tukas-Ku.”

⁷Hong tanggal due puluh epat bulan Sebat, iete bulan sawalas, hong nyelo kaduee kahum Raja Darius marentah, TUHAN manyampai petehe akangku. Huang ije paite metoh hamalem,

⁸ aku mite malekat TUHAN manongkang ije kongan kuda bahandang. Ie tende intu ije janah marak kare batang kambang tanjong. Intu likute mendeng pire-pire kongan kuda je beken, aton je bahandang, aton je bahandang mangor tuntang je baputi.

⁹Aku misek dengae, “Tuan, narai riman kare kuda toh?” Ie tombah, “Kareh aku mansanan rimae akam.

¹⁰Ewen ingirim TUHAN uka mariksa petak.”

¹¹Uras kuda te mansanan akan malekat, “Ikei jari mangombang hapus kalunen, ampie kalunen toh sanang landang bewei.”

¹²Palus malekat te hamauh, “TUHAN Je Jaton Tikas Kuasae, uju puluh nyelo katahie Ikau sangit dengan Yerusalem tuntang kare lewu intu Yuda. Sampai hamparea Ikau kareh tetep sangit tuntang dia mampun ewen?”

¹³TUHAN tombah auh malekat te dengan auh je mampong,

¹⁴tuntang malekat te manyoho aku manyampai taloh je insanan awi TUHAN Je Jaton Tikas Kuase, “Aku paham sinta tuntang manantuani lewu Yerusalem, lewung-Ku je barasih.

¹⁵Tapi Aku sangit toto dengan kare bangsa je mangkeme sanang landang. Awi metoh Aku manyarenan kasangit-Ku akan ungkup-Ku, kare bangsa te mandahang kapehen ungkup-Ku.

¹⁶Toh aku haluli akan Yerusalem uka manenga ampun akan lewu te. Humang-Ku kareh imangun haluli tuntang lewu Yerusalem kareh ingambuah tinai.”

¹⁷Malekat te manyoho aku manyampai peteh toh kea, “TUHAN Je Jaton Tikas Kuasae hajanji je kare lewu kareh sanang haluli tuntang sinde tinai ie kareh mandohop Yerusalem tuntang mangakue kilau ayue kabuat.”

¹⁸Huang paite ije beken, aku mite epat tandok sapi.

¹⁹Aku misek malekat je jari hakotak dengangku, “En riman kare tandok te?” Ie tombah, “Kare tandok te iete tanda kare karajaan je abas je mamisah-darai oloh Yuda, Israel tuntang Yerusalem.”

²⁰Palus TUHAN mamparahan akangku epat biti tukang sanaman je mimbit tasal.

²¹Aku misek, “Narai maksud panumah ewen?” Ie tombah, “Aku akan mampikeh tuntang mampalongkang kare bangsa je jari mamparotek Yuda tuntang mawi oloe pisah-darai.”