Read Ngaju SAKHARIA 11 Bible Online

SAKHARIA 11 - Ngaju bible

SAKHARIA 11

¹O Libanon bangah kare bauntonggangm mangat apui mangehu kare batang sederm![13]

²O batang camara, keleh manatum, awi jari balihang kare batang seder. Kare batang je labat jari balongkang. O kare batang hai intu Basan, keleh manangis. Awi kare parak kayu hai jari ineweng rata.

³Hining tangis kare oloh panguasa lilap jari kapercayan ewen! Hining sakungkong kare singa hong parak kayu; awi rusak eka melai ain ewen hapus Sungei Yordan.

⁴TUHAN Hatalla hamauh dengangku, “Awi arepm kilau sakatik[14] je manyakatik tabiri je akan inyambalih.

⁵Kare oloh je mamilie akan mampatei tabiri te tapi dia buah hukum. Ewen je manjual kare isin tabiri te hamauh, ‘Tara TUHAN! Toh itah sasar tatau!’ Kare sakatik te dia masi dengan tabiri pahagan ewen.”

⁶Aku dia maku tinai masi dengan eweh bewei hong lewu toh. Aku kabuat kareh manyarah kakare oloh je melai hete akan kare oloh panguasa. Ewen te kareh mamparotek lewu toh, tuntang Aku dia akan marabute bara kuasan ewen.”

⁷Aku, Sakharia, palus iupah awi kare oloh dagang tabiri uka manyakatik kare tabiri je kareh akan inyambalih. Aingku aton due sukah; sukah ije inggareku “Asi” tuntang sukah ije tinai inggareku “Kahinje”. Limbah te aku manampara manjaga tuntang mahaga kare tabiri te.

⁸Telo biti sakatik je basingi dengangku mampalepah kasabarku. Katahin ije bulan aku jari maharak telo biti sakatik te.

⁹Limbah te aku hamauh dengan kawan tabiri te, “Aku dia maku manyakatik keton tinai. Je patut matei nauhe ih matei, je patut binasa nauhe ih binasa. Palus tisae te tau ih impatei.”

¹⁰Palus sukah je inggareku “Asi” te induangku tuntang imelekku uka mambalang janji je iawi TUHAN dengan kakare bangsa.

¹¹Andau te kea janji te imbalang. Kare oloh je manjual tabiri te mananture aku, tuntang ewen harati je TUHAN metoh hakotak hajamban kare gawingku.

¹² Aku hamauh dengan ewen, “Amon kare tuan maku, tenga upahku; amon dia, dia usah.” Palus ewen manenga akangku telo puluh duit perak akan upahku. TUHAN hamauh dengangku, “Tamean duit te akan huang patin Human TUHAN.”[15] Baya kahain te ih regangku intu ewen!

¹⁴Limbah te aku mamelek sukahku je kaduee, je inggareku “Kahinje”, palus pusit kahinjen Yuda dengan Israel.

¹⁵Palus TUHAN hamauh dengangku, “Awi sinde tinai arepm kilau sakatik, tapi sinde toh kilau sakatik je dia bahalap.

¹⁶Awi aku kareh manyoho ije biti sakatik uka manjaga kawan tabiring-Ku, tapi ie dia paduli tabiri je nihau; ie dia manggau tabiri je layang, dia kea manatamba tabiri je bahimang, tuntang dia mampakanan tabiri je magon belom. Ie haream kuman isin tabiri je paling baseput tuntang manjawut kare silon meto te.

¹⁷Tarasapa sakatik je dia baguna te! Ie jari malihi kawan tabirie. Parang kareh mahapus kuasae. Lengee kareh palus balemo tuntang matae gantau palus babute.”