Read Ngaju SAKHARIA 12 Bible Online

SAKHARIA 12 - Ngaju bible

SAKHARIA 12

¹Jetoh peteh TUHAN tahiu Israel. TUHAN je mambirang langit, manjapa petak hayak je manenga pambelom akan olon, hamauh,

²“Aku akan mawi Yerusalem sama kilau sangkir basuang anggor; kare lewu hakalilinge kareh mihope tuntang ruyong-rayang kilau oloh babusau. Tuntang amon Yerusalem ingapong, kare lewu intu Yuda je magon batisa, kareh ingapong kea.

³Tapi amon katika andau te dumah, Aku kareh mawi Yerusalem sama kilau batu je babehat; bangsa je kueh bewei je mancoba manggatange kareh mandino calaka. Uras bangsa hong kalunen kareh pakat uka manyarang Yerusalem.

⁴Hong andau te kare kuda impabingung-Ku tuntang kare oloh je manongkange impagila-Ku, oloh je melai intu Yuda kareh injaga-Ku tapi uras kudan musohe imbute-Ku.

⁵Palus hapus suku Yuda kareh hamauh huang atei, ‘Baya TUHAN Je Jaton Tikas Kuasae ih je manenga kaabas akan ungkup Ayue je melai intu Yerusalem.’

⁶Hong andau te hapus suku Yuda iawi-Ku jadi sama kilau apui huang tuyok pandok apui atawa sumbo hanyala penda kare peteng gandom; ewen kareh mambinasa kare bangsa hakalilinge. Tapi oloh je melai Yerusalem kareh tetep melai intu lewu dengan kasanang.

⁷Aku, TUHAN, kareh je pangkasolake manenga kamanang akan tantara Yuda, uka horumat je inarima awi turonan Dawid tuntang Yerusalem dia labih bara horumat je inarima awi oloh Yuda je beken.

⁸Hong andau te Aku kareh mangalindong oloh je melai Yerusalem; tuntang je paling balemo marak ewen kareh jadi sama kilau kaabas Dawid. Ewen kareh ingagalan awi turonan Dawid sama kilau je awi malekat ayung-Ku, mahin sama kilau je puna Aku mawie kabuat.

⁹Hong andau te Aku akan manyarang gagenep bangsa je handak manyarang Yerusalem.

¹⁰ Limbah te akan turonan Dawid tuntang oloh je melai Yerusalem inenga-Ku atei je rajin masi tuntang rajin balakudoa. Ewen kareh mite ie je jari inyodok ewen tuntang manatume sama kilau oloh je manatum ije biti anak tunggal. Ewen kareh manatum toto-toto, sama kilau oloh je jari nihau anak tambakase.

¹¹Hong andau te kareh lembut tangis je paham intu Yerusalem, kilau tatum akan Hadad-Rimon[16] intu Janah Megido.

¹²Palus genep keluarga intu lewu te manatum kabuat-kabuat; kare keluarga bara turonan Dawid, kare keluarga turonan Natan, kare keluarga turonan Lewi, kare keluarga turonan Simei, tuntang uras kare keluarga je beken. Genep keluarga kareh manatum kabuat-kabuat, tuntang kare oloh hatue bara genep keluarga kareh manatum kabuate hapisah bara kare oloh bawi.”