Read Ngaju SAKHARIA 13 Bible Online

SAKHARIA 13 - Ngaju bible

SAKHARIA 13

¹TUHAN Je Jaton Tikas Kuasae hamauh, “Hong andau te kareh mamancar ije tahasak danum hapa mamparasih turonan Dawid tuntang oloh je melai Yerusalem bara dosa tuntang gawi manyembah hampatong dewa je jari ilalus ewen.

²Hong andau te akan inganang-Ku kare aran dewa bara tanah toh, sampai jaton tinai je mingat jete. Uras oloh je mangaku arepe nabi kareh iharakku hayak oloh je irasuk roh tanjaro.

³Tuntang amon magon aton oloh je hamauh je ie manyampai peteh, indu bapae kabuat je kareh mansanan akae je ie patut ihukum matei, awi je insanae te tanjaro. Amon ie tetep mangaku arepe kilau nabi kea, ie kareh inyodok sampai matei awi indu bapae kabuat.

⁴Andau te, kare nabi kareh mahamen mawi arepe sama kilau nabi. Ewen dia kea mahapan pakaian nabi uka manipu tuntang tara-tara tagal kare paitee.

⁵Kabalikae, ewen akan hamauh, ‘Aku dia nabi. Aku baya ije biti oloh pamalan je bagawi intu tana sampai hapus umur.’

⁶Tuntang amon oloh misek dengae, ‘Himang narai je aton hong usokm te?’, ie kareh tombah, ‘Aku buah himang te intu human sobatku.’ ”

⁷ TUHAN Je Jaton Tikas Kuasae hamauh, “Keleh misik, o padang, tuntang nyarang sakatik[17] je bagawi akang-Ku. Patei ie, palus kare tabirie kareh pisah darai. Aku kareh mantakan ungkup-Ku,

⁸tuntang intu hapus petak danum due bagi telo bara kare oloh je belom hete akan matei.

⁹Baya ije bagi telo kareh salamat. Tuntang ewen te kareh irasih-Ku sama kilau perak je imparasih awi apui. Ewen akan iuji-Ku sama kilau oloh mauji amas. Palus ewen kareh balakudoa intu Aku tuntang Aku kareh manombah lakudoan ewen. Aku kareh mansanan akan ewen je ewen te ungkup-Ku, tuntang ewen kea kareh mangaku je Aku TUHAN, Hatallan ewen.”