Read Ngaju SAKHARIA 14 Bible Online

SAKHARIA 14 - Ngaju bible

SAKHARIA 14

¹Andau mahakim ain TUHAN jari tokep. Palus Yerusalem kareh irampok, tuntang panataue kareh imbagi-bagi intu taharep keton.

²TUHAN akan mamumpong kakare bangsa uka manyarang Yerusalem. Lewu te kareh irabut, kare huma irampok, tuntang kare oloh bawie irayap. Saparo bara kare oloh je melai hete kareh iunda akan eka tawanan, tapi tisae kareh melai intu lewu te.

³Palus TUHAN kareh miar tuntang parang malawan kare bangsa te, kilau je ilaluse hong jaman horan.

⁴Hong andau te Ie mendeng intu Bukit Saitun, hila timor Yerusalem. Palus Bukit Saitun kareh inyila awi janah je lombah, nampara bara hila timor sampai akan hila barat. Saparo bara bukit te kareh miar akan utara, tuntang saparo tinai akan salatan.

⁵Keton kareh hadari mahalau janah je manyila bukit te jadi due kabagi.[18] Keton kareh hadari kilau tato hiang keton metoh gerek petak hong jaman Usia marentah Yuda. Palus dumah TUHAN, Hatallangku, impahayak uras kare malekat.

⁶Amon andau te sampai, dia aton tinai kasadingen atawa es.[19]

⁷Hong andau te jaton tinai kakaput. Andau akan tetep balawa, aloh tumon katikae puna hamalem. Tapi baya TUHAN je katawan hamparea andau te sampai.

⁸ Hong andau te danum sadingen kareh mahasor mahalau Yerusalem; saparo bara danum te kareh mahasor manintu Tasik Matei tuntang saparo tinai mahasor manintu Tasik Bentok. Danum te harajur mahasor ije nyelo-nyelo, aloh hong wayah pangujan atawa hong wayah pandang.

⁹Palus TUHAN kareh marentah kilau raja intu hapus kalunen; genep bitin oloh kareh manyembah Ie kilau Hatalla tuntang mangasene Ie dengan aran je sama.

¹⁰Uras lewu bara Geba hila utara sampai Rimon hila salatan, kareh jadi janah. Tapi Yerusalem kareh gantong haliai, labih gantong bara petak hakalilinge; lewu te kareh mampalombah ekae bara Lawang Benyamin sampai Lawang Puting, iete eka lawang ije Solake tuntang bara candi Hananel sampai eka mahamis anggor ayun raja.

¹¹ Kare oloh akan melai dengan kasanang intu lewu te, jaton kikeh tuntang kabinasa.

¹²TUHAN kareh mampadumah panyakit je bakaike-ikeh akan kakare bangsa je jari parang malawan Yerusalem. Mata tuntang jelan ewen, tinai hapus bitin ewen haream kareh maram metoh ewen magon belom.

¹³Hong andau te TUHAN kareh mawi kare bangsa te paham bingung tuntang mikeh sampai genep bitie akan manyingkap kawale je aton intu balikate balalu kalahi sama arepe.

¹⁴Kare hatuen oloh Yuda akan omba parang mandohop Yerusalem. Tuntang ewen manduan, mamumpong kare panatau bangsa je hakalilinge iete amas, perak tuntang pakaian je are toto.

¹⁵Tinai lembut panyakit je paham, mawi kuda, bagal, onta tuntang kalidai; hayak uras meto je intu kare kemah musoh.

¹⁶ Limbah te uras kare oloh je magon belom marak kare bangsa je manyarang Yerusalem, kareh haguet akan lewu te uka manyembah Raja, TUHAN Je Jaton Tikas Kuasae, uka mahaga Pesta Tingkap Dawen.

¹⁷Amon aton bangsa je dia maku haguet akan Yerusalem uka manyembah Raja, TUHAN Je Jaton Tikas Kuasae, maka hong lewu jaton mohon ujan.

¹⁸Tuntang amon oloh Misir dia maku mahaga Pesta Tingkap Dawen, palus ewen kea buah panyakit je iawi TUHAN akan genep bangsa je dia maku haguet sombayang.

¹⁹Jete hukuman akan Misir tuntang kakare bangsa je dia maku mahaga Pesta Tingkap Dawen.

²⁰Hong andau te kare garanohing hong pakaian kuda kareh iukir dengan kare bawak kotak “Tantai akan TUHAN”. Kare ketel intu Human TUHAN kareh irega sama kilau kare mangkok parapah intu baun mesbeh.

²¹Uras ketel intu Yerusalem tuntang intu hapus Yuda kareh iawi tantai akan TUHAN Je Jaton Tikas Kuasae. Kare oloh je maluput parapah kareh mahapan ketel te malontoh isin parapah. Amon katika te sampai, dia aton tinai oloh je badagang intu Human TUHAN Je Jaton Tikas Kuasae.