Read Ngaju SAKHARIA 2 Bible Online

SAKHARIA 2 - Ngaju bible

SAKHARIA 2

¹Huang paite limbah te aku mite ije biti oloh hatue je mimbing tali ukur.

²“Handak akan kueh?” pisekku dengae. “Handak mukur Yerusalem,” koae tombah auhku, “aku handak katawan pire kapanjang tuntang kabuka lewu te.”

³Limbah te aku mite malekat je jari hakotak dengangku te, mingkang miar, tuntang ije biti malekat beken manyondau ie.

⁴Malekat je solake hamauh dengan malekat je kadue, “Lius bajeleng talih oloh tabela te, tuntang sanan akae je Yerusalem kareh seke dengan olon tuntang meto sampai dia tau imangon dinding hakalilinge.

⁵TUHAN jari hajanji je Ie kabuat kareh jadi dinding apui je mangaliling lewu te uka mangalindonge tuntang Ie kareh melai intu hete huang kare kuasan Aie tuntang kahain Aie.”

⁶TUHAN hamauh dengan ungkup Ayue, “Aku jari mawi keton pisah-darai akan hete-hete. Tapi toh, o oloh tawanan, dari bara Babel tuntang buli akan Yerusalem.

⁸Eweh je manyarang keton, manyarang oloh je eka kakenang atei-Ku.” Palus TUHAN Je Jaton Tikas Kuasae[1] manyoho aku manyampai peteh toh akan kare bangsa je jari marampok ungkup Ayue.

⁹“TUHAN kabuat kareh malawan keton! Tuntang keton kareh irampok awi awan kare rewar keton kabuat. Amon taloh te manjadi, keton kareh katawan iete TUHAN Je Jaton Tikas Kuasae jari manyoho aku.”

¹⁰TUHAN hamauh, “Keleh manyanyi, hanja-hanjak o oloh Yerusalem! Aku kareh melai intu marak keton!”

¹¹Hong wayah te are bangsa kareh manalih TUHAN uka menjadi ungkup Ayue. Ie kareh melai intu marak keton, tuntang keton kareh katawan je TUHAN jari manyoho aku talih keton.

¹²Sinde tinai Yuda kareh tantai jadi ayun TUHAN intu tanah Ayue je barasih, tuntang Yerusalem kareh jadi lewu je puna paling eka kasayang Aie.

¹³Suni keton intu taharep TUHAN! Awi Ie jari haguet bara ekae melai intu sorga.”