Read Ngaju SAKHARIA 3 Bible Online

SAKHARIA 3 - Ngaju bible

SAKHARIA 3

¹ Huang paite je beken tinai, TUHAN mamparahan akangku Imam Hai Yosua metoh ie mendeng intu taharep malekat TUHAN. Intu balikat Yosua, mendeng Setan[2] je jari tatap mandawa ie.

² Malekat TUHAN[3] hamauh dengan setan, “Keleh TUHAN mahukum ikau, o Setan! Keleh TUHAN je manyayang Yerusalem mahukum ikau. Oloh toh kilau pondok apui je inyintak bara nyalan apui.”

³Yosua mendeng intu hete mahapan pakaian je papa toto.

⁴Palus malekat te hamauh dengan malekat beken je mandohop ie intu sorga, “Kanan pakaian papa je hapan oloh toh.” Tuntang dengan Yosua ie hamauh, “Dosam jari inganangku, ikau kareh inengaku pakaian je taheta.”

⁵Ie palus marentah kare malekat je madohop ie uka mangkepan[4] saruban je barasih intu takolok Yosua. Ewen manumon auhe tuntang limbah te ewen mangkepan pakaian je taheta intu ie je inampayah awi malekat TUHAN.

⁶Limbah te malekat te manyampai auh TUHAN akan Yosua,

⁷“Amon ikau manumon kare parentah-Ku tuntang malalus kare gawi je inenga-Ku akam, palus sampai katatahie ikau tau jadi pamimpin intu huang Humang-Ku tuntang manantuani parantaran Aie. Aku kareh mahining kare auh lakudoam, kilau Aku mahining lakudoan kare malekat je aton tokep Aku.

⁸ Hining, o Imam Hai Yosua, tuntang keton kare imam je jadi pajake, keton tamunan bara wayah je naharep je bahalap. Hong wayah te Aku kareh manyoho rewar-Ku je inyewut ‘Salundik.’

⁹Aku mingkes hila baun Yosua ije bintap batu lapak uju je kareh intu batu te aku maukir surat. Huang ije andau kareh inganang-Ku dosa bara lewu toh.

¹⁰ Amon andau te sampai, maka genep biti kareh marawei oloh darah humae uka dumah hakaja dengan kolae penda batang anggor tuntang sikon aie-aie tagal pambelom je sanang landang.”