Read Ngaju SAKHARIA 4 Bible Online

SAKHARIA 4 - Ngaju bible

SAKHARIA 4

¹Malekat je jari bapander dengangku te dumah tinai tuntang mampisik aku kilau mampisik oloh je metoh batiroh.

²“Narai taloh gitam?” koae misek aku. “Ije tantahan sumbo bara amas,” koangku tombah, “Intu tapakan tantahae te aton eka minyake, tuntang hakalilinge aton uju sumbo tuntang gagenep sumbo te aton uju eka hampulur.

³ Intu sambil tuntang gantaun tantahan sumbo te aton due batang saitun.”

⁴Limbah te aku misek dengan malekat te, “Narai je inanda awi kare pakakas te, Tuan?”

⁵“En ikau dia katawan?” paiseke dengangku, “Dia Tuan,” tombah aku.

⁶ Malekat te manyoho aku manyampai akan Serubabel peteh TUHAN toh, “Dia awi kaabas tantara tuntang dia kea awi kaabasm kabuat ikau kareh olih malaluse, malengkan awi Rohku.

⁷Halangan kahain bukit gantong mahin kareh tambalang bara hila baum. Ikau kareh mamangun haluli Humang-Ku, tuntang metoh ikau mandak batu je mambatang intu ekae, kare oloh kareh manangkariak, ‘Lalehan kahalape!’

⁸Palus dumah tinai peteh je beken bara TUHAN,

⁹Koae, “Serubabel jari mandak galang Humang-Ku, tuntang ie kareh mampajadi hapus Humang-Ku te. Amon jete manjadi, ungkup-Ku kareh katawan, je Aku jari manyoho ikau Sakharia akan ewen.

¹⁰Aton je manawah kajadian toh. Tapi ewen kareh mite Serubabel manontong gawi mamangun Humang-Ku, tuntang ewen kareh hanjak. Malekat te hamauh dengangku, “Uras uju sumbo te iete uju matan TUHAN je mananture hapus kalunen.”[5]

¹¹ Limbah te aku misek ie tinai, “Narai riman kadadue batang saitun intu sambil gantau tantahan sumbo te?

¹²Narai tinai riman kadadue edan saitun intu balikat due eka hampulur bara amas eka undus saitun te mahasor?”

¹³Tombah ie, “Diakah ikau mangatawae?” “Dia Tuan,” koangku tombah.

¹⁴Ie palus hamauh, “Jete due biti oloh je jari iintih awi TUHAN hapus langit tuntang petak je inukas uka bagawi Akae.”