Read Ngaju SAKHARIA 6 Bible Online

SAKHARIA 6 - Ngaju bible

SAKHARIA 6

¹Aku mandino paite ije beken. Sinde toh gitangku epat kareta parang balua bara helat due bukit gantong bara tambaga.

² Gagenep kareta te inunda awi ije kapasang kuda, kuda je solake bahandang, je kaduee kuda babilem,

³ je kateloe kuda baputi, tuntang je kaepate kuda je habelang.

⁴Aku misek dengan malekat te, “Tuan narai riman kare kareta parang toh?”

⁵ Ie tombah, “Ewen haguet manintu akan hila epat tintue limbah ewen manaharep TUHAN salepah langit tuntang petak.

⁶Kareta parang je inunda awi kuda babilem manintu Babel intu utara. Kuda baputi manintu akan barat tuntang kuda habelang manintu kare karajaan intu salatan.”

⁷Metoh kuda je habelang te balua, ewen gitan dia sabar uka haguet mariksa kalunen. Malekat te hamauh, “Keleh haguet uka mariksa petak!” Palus ewen haguet.

⁸Limbah te malekat te mangkariak hakotak dengangku, “Kuda je haguet akan Babel te jari mampaterai kasangit TUHAN.”

⁹TUHAN manenga peteh toh akangku.

¹⁰Koae, “Duan parapah je inenga awi Heldai, Tobia tuntang Yedaya, iete kare oloh je harue buli bara eka tawanan intu Babel. Imbit gulong parapah ewen te akan human Yosia anak Sepanya.

¹¹Bara amas tuntang perak panengan ewen te, tampa ije makota tuntang kepan intu takolok Imam Hai Yosua anak Yosadak.

¹² Nyampai akae je aku toh TUHAN Je Jaton Tikas Kuasae hamauh, ‘Oloh je inyewut Salundik, kareh olih malalus gawie hong eka ie aton tuntang ie kareh mamangun haluli Human TUHAN.

¹³Ie te je kareh mamangun Humang-Ku tuntang manarima hormat kilau ije biti raja, tuntang ie kareh marentah rayat ayue. Ije biti imam kareh mandengan ie tuntang sama-sama bagawi dengan kasanang atei.’

¹⁴Ingkes makota te intu Humang-Ku akan mampingat Heldai,[7] Tobia, Yedaya, tuntang Yosia.[8]

¹⁵Kare oloh kareh dumah bara eka je kejau tuntang mandohop mamangun Humang-Ku. Amon gawi mamangun te hapus, ewen kareh katawan je Aku TUHAN Je Jaton Tikas Kuasae jari manyoho ikau talih ewen. Uras taloh te kareh manjadi amon ewen toto-toto manumon parentah-Ku, TUHAN, Hatallan ewen.”