Read Ngaju SAKHARIA 7 Bible Online

SAKHARIA 7 - Ngaju bible

SAKHARIA 7

¹Hong tanggal epat bulan Kislew, iete bulan kajalatien, intu nyelo kaepat kahum Raja Darius marentah, TUHAN manenga peteh tinai akangku.

²Oloh intu Betel jari manyoho Sareser tuntang Regem-Melekh hayak kare oloh ayun ewen akan Human TUHAN Je Jaton Tikas Kuasae uka balaku berkat Ayue.

³Ewen kea manyoho misek kare imam tuntang kare nabi kalotoh, “En magon perlu ikei manatum karusak Human TUHAN hayak puasa hong genep bulan kalime kilau je jari iawi ikei banyelo-nyelo katahie?”

⁴Jetoh peteh TUHAN je dumah talih aku.

⁵Koae, “Nyampai akan oloh hapus lewu toh tuntang akan kare imam, iete tahiu puasa tuntang tatum je ilalus awi ewen hong bulan kalimee tuntang kaujue katahin uju puluh nyelo toh dia ie taloh gawi je mahormat Aku.

⁶Tuntang kea metoh ewen kuman tuntang mihop, ewen mameda belaie akae kabuat.”

⁷Jetoh je insanan TUHAN mahalau kare nabi intu katika je halau metoh Yerusalem magon ielai tuntang oloh lewu te belom sanang. Intu katika te oloh dia baya melai intu kare kampung tokep lewu hai, tapi intu hila salatan haream, tuntang intu kare pain bukit hong hila barat.

⁸TUHAN Je Jaton Tikas Kuasae manenga peteh toh akangku.

⁹“Banyelo-nyelo je halau Aku jari manenga parentah toh akan ungkup-Ku, ‘Keton musti malalus taloh je adil, masi tuntang tau dengan sama arep keton.

¹⁰Ela manyusah kare balo, kare anak nule, kare oloh asing je manetep marak keton, atawa eweh bewei je huang kasusah. Tuntang ela kea marencana taloh je papa sama arep keton.’

¹¹Tapi ungkup-Ku badungil tuntang samasinde dia maku mahining; ewen manyumbel pindinge mangat dia tau mahining.

¹²Ewen manekang atei sampai batekang sama kilau katekang batu. Aku sangit toto awi ewen dia manumon kare ajar je jari inenga-Ku akan ewen hajamban kare nabi je helo.

¹³Aku dia tombah lakudoan ewen awi ewen dia manyeneh auh-Ku katika Aku hakotak.

¹⁴Kilau galombang hai Aku jari manambalang ewen, sampai ewen tarapaksa melai intu kare lewun oloh bangsa beken. Petak je basiwoh toh jari benyem-tunis jaton oloe tuntang keang-kamahau.”