Read Ngaju SAKHARIA 8 Bible Online

SAKHARIA 8 - Ngaju bible

SAKHARIA 8

¹TUHAN Je Jaton Tikas Kuasae manenga peteh toh akangku,

²“Aku handak toto mandohop Yerusalem awi aku masi toto dengan kakare oloh je melai hete. Awi sintang-Ku te, ateiku balait dengan kare musoh lewu te.

³Aku kareh haluli akan Yerusalem, lewung-Ku je barasih te, tuntang melai intu hete. Yerusalem kareh ingatawan kilau lewu je baketep. Tuntang bukit TUHAN Je Jaton Tikas Kuasae[9] kareh inyewut Bukit Barasih.

⁴Intu alun-alun lewu Yerusalem kareh mondok tinai kare tambi tuntang bue je jari bakas toto sampai mananjong mahin mahapan sukah.

⁵Kare jalan intu lewu kareh kontep tinai dengan anak oloh je bangang.

⁶Kare taloh te ampi-ampie dia baka tau manjadi manumon tirok kare oloh je magon belom bara bangsa toh, tapi akang-Ku jaton taloh je dia tau manjadi.

⁷Aku kareh manyalamat ungkup-Ku bara kare lewu eka ewen jari iunda.

⁸Aku mimbit ewen haluli bara timor tuntang bara barat, sampai ewen melai intu Yerusalem tinai. Ewen kareh jadi ungkup-Ku tuntang Aku Hatallan ewen. Aku kareh marentah ewen dengan kaketep tuntang kaadilan.”

⁹TUHAN hamauh dengan ungkup Ayue, “Paabas ateim, toh ikau jari mahining kare auh je jari kea insanan kare nabi metoh galang iandak, uka mamangun haluli Humang-Ku.

¹⁰Helo bara wayah te, jaton je olih mupah olon atawa meto hapa bagawi, tuntang jaton je mangkeme bebas bara kare musoh je harajur manderoh. Aku jari mawi ewen hakapaut sama arepe.

¹¹Tapi toh kare oloh je magon belom bara bangsa toh iawiku beken bara je helo.

¹²Ewen kareh manawor binyi dengan pangkeme je sanang. Kare batang anggor ewen kareh mamua, petak kareh manenga hasile, tuntang ujan kareh mahin labat. Uras berkat te inenga-Ku akan kare oloh je magon belom bara bangsa toh.

¹³O oloh Yuda tuntang Israel! Intu katika je halau, amon kare oloh bangsa beken manyapa, ewen hamauh, ‘Keleh calaka je buah Israel tuntang Yuda buah ikau kea!’ Tapi aku kareh manyalamat keton, sampai kare oloh bangsa beken te kareh hamauh sama arep ewen, ‘Keleh berkat je mohon akan Yuda tuntang Israel, mohon kea akam.’ Awi te, paabas ateim, ela mikeh!”

¹⁴TUHAN Je Jaton Tikas Kuasae hamauh, “Metoh tato hiangm mampalembut kasangit-Ku, Aku manukas akan mahukum ewen toto-toto. Aku dia mobah tukas-Ku te, malengkan malaluse.

¹⁵Tapi toh Aku handak mamberkat oloh Yerusalem tuntang Yuda. Jadi, ela mikeh.

¹⁶ Jetoh kare parentah je musti keton malaluse ie te: Amon hakotak, sanan je toto sama arep keton. Tenga putusan pengadilan je adil tuntang mimbit kadamai.

¹⁷Ela marencana taloh je papa sama arep keton. Ela mawi sumpah tanjaro. Aku basingi dengan tanjaro tuntang je dia adil hayak tinai kare kakaras tuntang katulas.”

¹⁸TUHAN Je Jaton Tikas Kuasae manenga peteh toh akangku akan ungkup Ayue.

¹⁹“Puasa je ilalus huang bulan kaepat, kalime tuntang kauju, tuntang kasapuluh kareh jadi kare pesta je kontep kahanjak tuntang kasanang akan oloh intu tanah Yuda. Keleh sinta katoto tuntang kadamai!”

²⁰TUHAN Je Jaton Tikas Kuasae hamauh, “Katikae kareh sampai, oloh bara are lewu[10] kareh dumah akan Yerusalem.

²¹Oloh bara lewu je ije kareh hamauh dengan oloh lewu je beken, ‘Ayo itah manyembah TUHAN Je Jaton Tikas Kuasae tuntang balaku berkat intu Ie. Keleh omba ikei!’

²²Palus are oloh tuntang are bangsa je abas kareh dumah akan Yerusalem uka manyembah Aku TUHAN Je Jaton Tikas Kuasae tuntang balaku berkat-Ku.

²³Hong kare andau te sapuluh oloh bangsa beken kareh dumah talih ije biti oloh Yehudi tuntang hamauh, ‘Ikei nahuang kea belom ontong kilau ikau; awi ikei mahining je Hatalla mamberkat ikau.’ TUHAN Je Jaton Tikas Kuasae jari hakotak.