Read Ngaju SAKHARIA 9 Bible Online

SAKHARIA 9 - Ngaju bible

SAKHARIA 9

¹ Jetoh peteh TUHAN. Ie jari manukas handak mahukum lewu Hadrakh tuntang lewu Damaskus. Dia baya kare bangsa Israel bewei, tapi lewu hai eka raja Siria marentah, jete ain TUHAN kea.

²Hamat je hinje helat dengan Hadrakh, Ayue kea, kalote kea kare lewu Tirus tuntang Sidon dengan kare kapintar oloh ayue je melai intu hete.

³Tirus jari mamangun kare kota akae kabuat. Ie manuyok are toto amas tuntang perak, sampai ingkeme kilau ramo je dia barega, sama kilau baras tuntang petak kisak intu karatak.

⁴Tapi TUHAN kareh manjadian ewen belom susah. Hapus panatau lewu te kareh inganae akan tasik tuntang lewu te kabuat kareh lepah kinan apui.

⁵ Lewu Askelon tuntang Gasa kareh mitee tuntang balalu mikeh. Ekron kareh mitee kea tuntang lepah nihau kare kaharape. Gasa kareh nihau rajae, tuntang Askelon kareh benyem tunis jaton oloh melaie.

⁶Asdod kareh ielai awi kare oloh je bangsae hewoi. TUHAN hamauh, “Oloh Pilistin je bajoho te kareh impalomos-Ku.

⁷Ewen kareh dia kuman isin meto je magon badaha atawa taloh kinan beken je pali. Uras oloh je melai hete kareh iitong kilau oloh bara bangsa Yuda kea. Ekron kareh manjadi oloh ungkup aing-Ku, kilau oloh Yebus[11] intu jaman helo.

⁸Aku kareh manjaga ungkup-Ku tuntang mangahana kare tantara bangsa beken je handak mahalaue. Aku dia tinai manyoho kare oloh panindas mahajipen ungkup-Ku. Awi kapehen ewen jari gitang-Ku.”

⁹ O oloh je intu Sion, keleh hanjak! O oloh je intu Yerusalem, keleh basasurak! Ite! Rajam dumah mimbit kamanang! Ie raja adil je mimbit salamat. Tapi ie dumah kontep karandah atei. Ie manongkang kalidai, ije kongan kalidai tabela.

¹⁰ TUHAN hamauh, “Kare kareta parang bara Epraim kareh inganang-Ku, uras kuda hongYerusalem kareh intarik-Ku tuntang uras panah kareh impahancor-Ku. Rajam kareh mansanan kasanang marak kare bangsa. Bara tasik akan tasik ie kareh marentah, bara Sungei Euprat sampai akan tapakan kalunen.”

¹¹ TUHAN hamauh dengan ungkup Ayue, “Tagal janji je iawi-Ku dengan keton, janji je indehen dengan dahan parapah, kareh ilapas-Ku rayatm je kapehe huang tawanan sama kilau oloh je tangkeng huang kalin danum je keang.

¹²Keleh haluli, o kare oloh tawanan, toh keton aton kaharap. Keleh haluli akan eka kalindongm Aku kareh tetep mamberkat keton. Hining: Due lipet keton kareh imberkat-Ku tagal kare kapehe je jari ingkeme keton.

¹³Yuda kareh ihapang-Ku kilau panah oloh menteng, tuntang Israel sama kilau isin panah je handak ilekas. Oloh Sion ihapang-Ku kilau padang: dengan padang te Aku manyarang oloh Yunani.”

¹⁴TUHAN kareh mamparahan arep akan ungkup Ayue sama kilau kilat kare isin panah Ayue ilekas Awie. TUHAN Pangkahai kareh mahimon tarompet tanda manyarang palus miar sama kilau galombang hai bara salatan.

¹⁵Ungkup Ayue batantu inenga kalindong, sampai uras kare musoh olih impakalah awi ewen. Sama kilau lahap oloh je babusau taloh ihop, tumon te lahap ewen huang parang. Sama kilau dahan oloh inusoh akan hunjun mesbeh, tumon te kea dahan musoh ewen kareh batusoh.

¹⁶Amon andaue sampai, TUHAN kareh manyalamat ungkup Ayue, sama kilau sakatik manyalamat tabirie bara bahaya. Ewen kareh hasangkowong intu tanah TUHAN, sama kilau permata je mamancar intu makota.

¹⁷Lalehan kahalape lewun TUHAN kareh, lalehan kahalape tuntang kahaie! Intu hete anggor tuntang gandombelom bajewong, mawi oloh tabela sasar abas.